Header Ads

ປະຊາຊົນຫຼາຍບ້ານ ແຂວງສາລະວັນ ໄດ້ຮັບຜົນກະທົບຢ່າງໜັກໜ່ວງຈາກລົມພາຍຸລະດູຮ້ອນ


ປະຊາຊົນຫຼາຍບ້ານ ແຂວງສາລະວັນ ໄດ້ຮັບຜົນກະທົບຢ່າງໜັກໜ່ວງຈາກລົມພາຍຸລະດູຮ້ອນ
----------------------------------
ປະຊາຊົນບ້ານນາໄຊໃຫຍ່ ເມືອງ ແລະ ແຂວງສາລະວັນ ແຕກຕື່ນກັບເຫດການພາຍຸພັດເຂົ້າບ້ານ ໃນລະຫວ່າງວັນທີ 21 ເມສານີ້, ເວລາ 15:30 ນາທີ ເຮັດໃຫ້ເຮືອນຂອງພໍ່ແມ່ປະຊາຊົນພາຍໃນບ້ານເສຍຫາຍຢ່າງໜັກໜ່ວງ ແລະ ເປັນຄັ້ງທີ 2 ໃນຮອບ 10 ປີ ຄາດຄະເນມູນຄ່າເສຍຫາຍເບື້ອງຕົ້ນ 280 ລ້ານກີບ. ນອກຈາກຈະມີລົມພາຍຸພັດແຮງແລ້ວ ຍັງມີໝາກເຫັບ ຂະໜາດໃຫຍ່ ຕົກໃສ່ເຮືອນຂອງປະຊາຊົນ ເກືອບທຸກບ່ອນ


 ທ່ານ ອັອກເອ ແກ້ວສົມພູ ນາຍບ້ານໆນາໄຊໃຫຍ່ ໄດ້ເປີດເຜີຍຂໍ້ມູນໃຫ້ຮູ້ວ່າ: ເວລາ 15:30 ນາທີ ໃນວັນທີ 21 ເມສານີ້ ໄດ້ເກີດມີລົມພາຍຸລະດູຮ້ອນພັດເຂົ້າບ້ານຢ່າງແຮງ ເຮັດໃຫ້ເຮືອນຊານບ້ານຊ່ອງຂອງພໍ່ແມ່ປະຊາຊົນເສຍຫາຍຫຼາຍຫຼັງຄາເຮືອນ, ໃນນັ້ນເສຍຫາຍໜັກ 12 ຫຼັງຄາເຮືອນ, ເຮືອນຊັ້ນເຄີ່ງ 4 ຫຼັງ, ເຮືອນວິນລາ 2 ຫຼັງ ແລະ ເຮືອນໄມ້ 6 ຫຼັງ, ສ່ວນໃຫຍ່ເສຍຫາຍແມ່ນປະເພດຫຼັງຄາເຮືອນ ແລະ ໂຄງຫຼັງຄາເຮືອນເຊັ່ນ: ກະເບື້ອງ, ສັງກະສີ ແລະ ເສົາໄຟຟ້າຫັກ, ສາຍໄຟຂາດ, ເລົ້າເຂົ້າເສຍຫາຍເລັກນ້ອຍ. ເຫດການຄັ້ງນີ້ເປັນຄັ້ງທີ່ຮ້າຍແຮງທີ່ສຸດ ໂຊກດີພໍ່ແມ່ປະຊາຊົນຫຼົບໜີທັນ ບໍ່ມີໃຜໄດ້ຮັບບາດເຈັບ ຫຼື ເສຍຊີວິດ ເນື່ອງຈາກວ່າເຫດການເກີດຂຶ້ນຕອນກາງເວັນ ສຳລັບປະຊາຊົນທີ່ໄດ້ຮັບຜົນກະທົບ ມີ 84 ຄົນ, ຍິງ 45 ຄົນ, ຄາດຄະເນມູນຄ່າເສຍຫາຍ 280.000.000 ກີບ. ປະຈຸບັນອຳນາດການປົກຄອງບ້ານໄດ້ລະດົມກຳລັງຊາວໜຸ່ມ ແລະ ປະຊາຊົນໃນບ້ານ ຊ່ວຍເຫຼືອເຊີ່ງກັນ ແລະ ກັນ. ພ້ອມນັ້ນອຳນາດການປົກຄອງເມືອງ ກໍ່ໄດ້ລົງຕິດຕາມ ແລະ ເກັບກຳຂໍ້ມູນ ເພື່ອໃຫ້ການຊ່ວຍເຫຼືອຕື່ມອີກ.

ເຊັ່ນດຽວກັນ ເມືອງຕຸ້ມລານ ກໍ່ໄດ້ຮັບຜົນກະທົບຈາກລົມພາຍຸລະດູຮ້ອນ ປະຊາຊົນ 10 ບ້ານ ກໍ່ໄດ້ຮັບຜົນກະທົບຢ່າງໜັກໜ່ວງເຊັ່ນກັນ. ປະຈຸບັນອຳນາດການປົກຄອງເມືອງ, ບ້ານ ແລະ ຂະແໜງການທີ່ກ່ຽວຂ້ອງ ກໍ່ໄດ້ລົງສົມທົບ ແລະ ເກັບກຳຂໍ້ມູນຕົວຈິງ ແລະ ລົງໃກ້ຊິດໃຫ້ກຳລັງໃຈ, ໃຫ້ການຊ່ວຍເຫຼືອເບື້ອງຕົນ ແລະ ປະເມີນຄ່າເສຍຫາຍຕື່ມອີກ.



ສ່ວນເມືອງຄົງເຊໂດນ ຕາມການລາຍງານຂອງນັກຂ່າວເມືອງ ໃຫ້ຮູ້ວ່າ: ເມືອງຄົງເຊໂດນ 150 ກວ່າຫລັງຄາເຮືອນ ກໍ່ໄດ້ຮັບຜົນກະທົບຢ່າງໜັກຈາກລົມພະຍຸ #ປະຊາຊົນຫຼາຍບ້ານ ທົ່ວເມືອງຄົງເຊໂດນ ໄດ້ຮັບຄວາມເສຍຫາຍຫລາຍພໍສົມຄວນ ຈາກລົມພະຍຸພັດ ໃນເມື່ອວັນທີ 22 ເມສາ ຜ່ານມາແລ້ວນີ້ ເຮັດໃຫ້ເຮືອນປະຊາຊົນ ແລະ ເລົ້າເຂົ້າຈຳນວນໜຶ່ງ ໄດ້ຮັບຄວາມເສຍຫາຍ ແຕ່ກະຍັງໂຊກດີບໍ່ມີຜູ້ໃດໄດ້ຮັບບາດເຈັບ ຫຼືເສຍຊີວິດ ຕາມການລາຍງານຂອງທ່ານ ບົວພັນ ໄຊຍະວົງ ຫົວໜ້າແຮງງານສະຫວັດດີການ ແລະ ສັງຄົມ ເມືອງຄົງເຊໂດນ ໄດ້ໃຫ້ຂໍ້ມູນວ່າ: ເມື່ອວັນຈັນປະມານ 4 ໂມງແລງຂອງວັນທີ 22 ເມສາຜ່ານມາ ໄດ້ເກີດມີລົມພະຍຸຣະດູຮ້ອນ ມີຝົນຕົກໜັກ ແລະລົມພັດແຮງ ຢູ່ແຕ່ລະບ້ານໃນທົ່ວເມືອງຄົງເຊໂດນ ເຊິ່ງພາຍຸດັ່ງກ່າວໄດ້ສ້າງຄວາມເສຍຫາຍໃຫ້ແກ່ບ້ານເຮືອນຂອງປະຊາຊົນ



 ຕາມການໃນງານເບື້ອງຕົ້ນຂອງຫົວໜ້າຫ້ອງການແຮງງານສະຫວັດດີການ - ສັງຄົມເມືອງ ບ້ານທີ່ຖືກຜົນກະທົບແມ່ນມີຢູ່ 7 ບ້ານໃນທົ່ວເມືອງ ໃນນີ້ມີບ້ານຄົງໃຫຍ່ 17 ຫຼັງຄາເຮືອນ, ບ້ານຄົງນ້ອຍ 5 ຫຼັງຄາເຮືອນ, ບ້ານບຶງກາງ 63 ຫຼັງຄາເຮືອນ, ບ້ານຄຳໄຮ 6 ຫຼັງຄາເຮືອນ ແລະບ້ານນາເມັກ 8 ຫຼັງຄາເຮືອນ, ໃນນີ້ມີບ້ານທີ່ໄດ້ຜົນເສຍຫາຍໜັກຈາກລົມພະຍຸພັດມີບ້ານບຶງກາງຈຳນວນ 63 ຫຼັງຄາເຮືອນ ເສຍຫາຍໜັກ 19 ຫຼັງຄາເຮືອນ ແລະບ້ານນາເຕີຍມີຈຳນວນ 43 ຫຼັງຄາເຮືອນ ເສຍຫາຍໜັກ 24 ຫລັງຄາເຮືອນ, ມາເຖິງປະຈຸບັນຍັງບໍ່ທັນມີການປະເມີນຄວາມເສຍຫາຍທັງໝົດ ນັ້ນໄດ້ເທື່ອ ທາງຄະນະນຳ ແລະເຈົ້າຫນ້າທີ່ກ່ຽວຂ້ອງຂັ້ນເມືອງ ກຳລັງເກັບກຳ ແລະຮິບໂຮມຜົນເສຍຫາຍ ເພື່ອຫາທາງຊ່ວຍເຫຼືອຜູ້ເຄາະຮ້າຍ.


ພາບ: Cr: mam manisone
             : ນັກຂ່າວເມືອງຕຸ້ມລານ-ເມືອງຄົງເຊໂດນ

No comments

Powered by Blogger.