Header Ads

ປກສ ນະຄອນຫຼວງ ປະກາດການໂຍກຍ້າຍ ແລະ ແຕ່ງຕັ້ງ ຮອງຫົວໜ້າກອງບັນຊາການ



ກອງບັນຊາການ ປກສ ນະຄອນຫຼວງວຽງຈັນ ໄດ້ຈັດພິທີປະກາດການໂຍກຍ້າຍແລະ ແຕ່ງຕັ້ງຮອງຫົວໜ້າກອງບັນຊາການ ປກສ ນວໂດຍອີງຕາມຂໍ້ຕົກລົງສະບັບເລກທີ 660/ ປກສ, ລົງວັນທີ 12 ເມສາ 2019 ວ່າດ້ວຍການໂຍກຍ້າຍນາຍຕໍາຫຼວດ ທີ່ຂຶ້ນກັບກອງບັນຊາການ ປກສ ນວ ໄປຮັບໜ້າທີ່ໃໝ່ຢູ່ກະຊວງ ປ້ອງກັນຄວາມສະຫງົບຄື: ພັອ ທົງສະຫວັດ ຫຼວງຈັນດາວົງສ໌ ແລະ ພັທ ສົມສັກ ປັນຍາສີ ແລະ ໄດ້ຜ່ານຂໍ້ຕົກລົງສະບັບເລກທີ661/ປກສ, ລົງວັນທີ 12 ເມສາ 2019 ວ່າດ້ວຍການແຕ່ງຕັ້ງນາຍຕໍາຫຼວດ ທີ່ຂຶ້ນກັບກອງບັນຊາການ ປ້ອງກັນຄວາມສະຫງົບ ນວ ເປັນຮອງຫົວໜ້າກອງບັນຊາການ ປກສ ນວ ຄື: ພັທ ສຸກພະຈັນ ບຸດດາຄໍາ ແລະ ພັທ ຈັນຫອມ ແກ້ວສຸລິໄຊ, ສ່ວນຫົວໜ້າ ແລະ ຮອງທີ່ມີຢູ່ແລ້ວແມ່ນຮັກສາໄວ້ຄືເກົ່າ.



ໃນພິທີການໂຍກຍ້າຍ ແລະ ແຕ່ງຕັ້ງຄັ້ງນີ້ໂດຍການເປັນປະທານຂອງ ພົຕ ກົງທອງ ພົງວິຈິດ ຮອງລັດຖະມົນຕີ ກະຊວງ ປກສ ມີບັນດາຫົວໜ້າ ແລະ ຄະນະຫ້ອງກອງບັນຊາການ, ກອງພັນເຄື່ອນທີ່ , ຄ້າຍຄຸມຂັງ-ດັດສ້າງ ແລະ ປກສ 9 ຕົວເມືອງ, ມີຫົວໜ້າຫ້ອງວ່າການ ນວ, ຮອງຄະນະຈັດຕັ້ງ ນວ ແລະ ຫົວໜ້າພະແນກສະຖານີຮັບແກ້ໄຂເຫດສຸກເສີນ 1191 ແລະ ຮອງຫົວໜ້າກົມຈັດຕັ້ງ ກະຊວງ ເຂົ້າຮ່ວມ./




ທ່ານ ພົຕ ກົງທອງ ພົງວິຈິດ ຮອງລັດຖະມົນຕີກະຊວງ ປກສ ໄດ້ກ່າວວ່າ: ໂດຍອີງຕາມຄວາມຮຽກຮ້ອງຕ້ອງການຂອງໜ້າທີ່ວຽກງານໃຫ້ມີຄວາມໜັກແໜ້ນທາງດ້ານແນວຄິດ, ມີຄວາມເຂັ້ມແຂງທາງດ້ານການຈັດຕັ້ງ ແລະ ສາມາດຕອບສະໜອງກັບຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່ ແລະ ເພື່ອເປັນການສ້າງສາພັດທະນາປະເທດຊາດໃຫ້ມີຄວາມສະຫງົບປອດໄພ ແລະ ມີຄວາມເປັນລະບຽບຮຽບຮ້ອຍ; ບັນດາສະຫາຍທີ່ຖືກໂຍກຍ້າຍ ແລະ ຖືກແຕ່ງຕັ້ງຈົ່ງພ້ອມກັນສືບຕໍ່ເອົາໃຈໃສ່ປະຕິບັດໜ້າທີ່ວຽກງານທີ່ການຈັດຕັ້ງມອບໝາຍໃຫ້ມີຜົນສໍາເລັດ ເຊິ່ງພິທີດັ່ງກ່າວໄດ້ຈັດຂຶ້ນທີ່ກອງບັນຊາການ ປກສ ນວ ໃນເຊົ້າຂອງວັນທີ 24 ເມສານີ້



------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
Twitter ID: @tholakhong
tholakhong@gmail.com | www.tholakhong.com


No comments

Powered by Blogger.