Header Ads

ປະທານສະພາແຫ່ງຊາດ ເຄື່ອນໄຫວ,ຢ້ຽມຢາມ ແລະ ເຮັດວຽກຢູ່ເມືອງ  ປາກແຊງ


ປະທານສະພາແຫ່ງຊາດ ເຄື່ອນໄຫວ,ຢ້ຽມຢາມ ແລະ ເຮັດວຽກຢູ່ເມືອງ  ປາກແຊງ,ແຂວງຫຼວງພະບາງ
-----------------------------------------
         ໃນວັນທີ 25 ເມສາ 2019, ທ່ານ ນາງ ປານີ ຢາທໍ່ຕູ້ , ກຳມະການ ກົມການເມືອງ ສູນກາງພັກ,  ປະທານສະພາແຫ່ງຊາດໄດ້ລົງ ເຄື່ອນໄຫວ,ຢ້ຽມຢາມ ແລະ ເຮັດວຽກຢູ່ເມືອງ  ປາກແຊງ,ແຂວງຫຼວງພະບາງ, ໂດຍການຕ້ອນຮັບຢ່າງອົບອຸ່ນຈາກທ່ານ ຈັນສຸກ ພັນໂດລັກ, ເຈົ້າເມືອງ-ເມືອງປາກແຊງ,  ທ່ານ ສິງຕັນ ໄຊລືຊົ່ງ ຮອງສະພາປະຊາຊົນ ແຂວງຫຼວງພະບາງ,ພ້ອມດ້ວຍການນໍາທຸກຂັ້ນຂອງເມືອງ ແລະ ພະນັກງານບຳນານ, ອົງການປົກຄອງບ້ານອ້ອມຂ້າງ ເຂົ້າຮ່ວມ.       





 ໃນໂອກາດທີ່ມາເຄື່ອນໄຫວ,ຢ້ຽມຢາມ ແລະ ເຮັດວຽກຄັ້ງນີ້,ກໍ່ໄດ້ຮັບຟັງການລາຍງານສະພາບພົ້ນເດັ່ນ ໃນການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ໃນໄລຍະ 5 ປີ (2014-2019)ຜ່ານມາໂດຍຫໍ້ຍ, ຈາກ ທ່ານ ຈັນສຸກ ພັນໂດລັກ, ເຈົ້າເມືອງ-ເມືອງປາກແຊງ, ເຊິ່ງທ່ານໄດ້ກ່າວວ່າ: ທົ່ວເມືອງມີ 8 ກຸ່ມພັດທະນາ, 52 ບ້ານ, ມີ 4,292 ຄອບຄົວ,ພົນລະເມືອງ 23,248 ຄົນ,ຍິງ 11,628 ຄົນ, ປະຊາຊົນສ່ວນໃຫ່ຍ ຍັງຍຶດຖືອາຊີບກະສິກຳດ້ວຍການເຮັດໄຮ່ປູກເຂົ້າເປັນຕົ້ນຕໍ, ມາເຖິງປະຈຸບັນຄວາມທຸກຍາກຂອງປະຊາຊົນຍັງເປັນສິ່ງທ້າທາຍຕໍ່ກັບການພັດທະນາເສດຖະກິດ-ສັງຄົມຂອງເມືອງ, 


ປະຈຸບັນຍັງມີບ້ານທຸກຍາກ 22 ບ້ານ,ເທົ່າກັບ 42,3%,  ທຽບໃສ່ປີ 2014 ບ້ານທຸກຍາກລຸດລົງ 9 ບ້ານ,  ດ້ານເສດຖະກິດຂອງເມືອງໄດ້ສືບຕໍ່ຂະຫຍາຍຕົວໃນລະດັບ 8,3%,ລາຍຮັບ ສະເລ່ຍຕໍ່ຫົວຄົນ ເທົ່າກັບ 1,300 ໂດລາສະຫະລັດ, ໂຄງປະກອບເສດຖະກິດໄດ້ຫັນປ່ຽນໄປຕາມທິດທີ່ຕັ້ງໜ້າ ໂດຍສຸມໃສ່ຂະແໜງກະສິກຳ ແລະ ປ່າໄມ້, ຂະແໜງອຸດສາຫະກຳ, ການບໍລິການ, ການສຶກສາ, ສາທາລະນະສຸກ ແລະ ການພັດທະນາແຫຼ່ງທ່ອງທ່ຽວທາງທຳມະຊາດ,  ດ້ານລາຍຮັບເຂົ້າງົບປະມານ ປີ2018 ຄາດໝາຍສູ້ຊົນ 2, 645.378.000 ກີບ, ປະຕິບັດໄດ້ 3 ຕື້ 018.373 ກີບ, ເທົ່າກັບ 107%.          




ຈາກນັ້ນ  ທ່ານ ນາງ ປານີ ຢາທໍ່ຕູ້ , ກຳມະການ ກົມການເມືອງ ສູນກາງພັກ,  ປະທານສະພາແຫ່ງຊາດກໍ່ໄດ້ກ່າວຍ້ອງຍໍຊົມເຊີຍຕໍ່ຜົນງານທີ່ເມືອງປາກແຊງ ຍາດມາໄດ້ ແລະ ໄດ້ເນັ້ນໜັກໃຫ້ການນໍາຂອງເມືອງທຸກພາກສ່ວນຈົ່ງເອົາໃຈໃສ່ຕໍ່ວຽກງານປກຊ-ປກສ ລົງສູ່ຮາກຖານ, ເຜີຍແພ່ວຽກງານດັ່ງກ່າວສູ່ປະຊາຊົນໃຫ້ເຂົ້າໃຈ, ເອົາໃຈໃສ່ປັບປຸງກໍ່ສ້າງພັກໃຫ້ມີຄວາມເຂັ້ມແຂງ ແລະ ໜັກແໜ້ນ, ພ້ອມທັງ ເອົາໃຈໃສ່ຕໍ່ວຽກງານເສດຖະກິດ-ສັງຄົມໃຫ້ເຂັ້ມແຂງ, ດ້ວຍການສົ່ງເສີມອາຊີບປະຊາຊົນບັນດາເຜົ່າປູກພືດເປັນສິນຄ້າສົ່ງອອກ, ເພຶ່ອແນ່ໃສ່ເຮັດໃຫ້ຊີວິດການເປັນຢູ່ຂອງປະຊາຊົນພາຍໃນເມືອງລຸດພົ້ນອອກຈາກຄວາມທຸກຍາກ ແລະ ເອົາໃຈໃສ່ໃນການກະກຽມດໍາເນີນກອງປະຊຸມໃຫ່ຍຄັ້ງທີ່ 6 ຂອງເມືອງໃຫ້ໄດ້ຮັບຜົນສໍາເລັດ.

ໂດຍ: ສົມພົງ ແກ້ວມະນີທອງ (ນັກຂ່າວເມືອງ)

No comments

Powered by Blogger.