Header Ads

ກະຊວງ ຮສສ ຮ່ວມກັບ ສະພາແຫ່ງຊາດ ກວດກາເນື້ອໃນຮອບດ້ານຂອງ ຮ່າງ ກົດຫມາຍວ່າດ້ວຍການຄຸ້ມຄອງໄພພິບັດ




ໃນວັນທີ 29 - 30 , ມີນາ 2019, ນີ້ ຢູ່ ທ່າລາດ, ແຂວງວຽງຈັນ. ໄດ້ຈັດກອງປະຊຸມກວດກາເນື້ອໃນຮອບດ້ານຂອງ ຮ່າງ ກົດຫມາຍວ່າດ້ວຍການຄຸ້ມຄອງໄພພິບັດ, ໂດຍການເປັນປະທານກ່າວເປີດຂອງ ທ່ານ ສົມພັນ ແພງຄຳມີ ຮອງປະທານສະພາແຫ່ງຊາດ ແລະ ທ່ານ ນາງ ໃບຄຳ ຂັດທິຍະ ຮອງລັດຖະມົນຕີ ກະຊວງ ແຮງງານ ແລະ ສະຫວັດດີການສັງຄົມ, ປະທານຄະນະຊີ້ນຳ, ມີບັນດາ ທ່ານລັດຖະມົນຕີ, ຮອງລັດຖະມົນຕີ, ພ້ອມດວ້ຍຄະນະກຳມະການສ້າງກົດໝາຍ ຂອງຄະແໜງການກຽ່ວຂ້ອງເຂົ້າຮ່ວມ.


ຮ່າງ ກົດໝາຍດັ່ງກ່າວ, ໄດ້ກຳນົດ, ຫຼັກການ, ລະບຽບການ ແລະ ມາດຕະການ ທີ່ກຽ່ວກັບການຄຸ້ມຄອງໄພພິບັດ, ໂດຍປະກອບມີ 11 ພາກ, 8 ໝວດ, 82 ມາດຕາ.




ທ່ານ ນາງ ໃບຄຳ ຂັດທິຍະ ໄດ້ກ່າວຈຸດປະສົງຂອງການສ້າງຮ່າງກົດໝາຍດັ່ງກ່າວ ວ່າ: ໄພພິບັດແມ່ນເຫດການຮ້າຍແຮງທີ່ເກີດຂື້ນຈາກທຳມະຊາດ ແລະ ຈາກນໍ້າມືຂອງມະນຸດສ້າງຂື້ນ ຈາກເຫດການດັ່ງກ່າວ, ເຮັດໃຫ້ບັນດາປະເທດໃນໂລກ ລວມທັງ ສປປ ລາວ ຕ້ອງປະເຊີນກັບບັນຫາໄພພິບັດທໍາມະຊາດຕ່າງໆ ເຊັ່ນ: ນໍ້າຖ້ວມ, ແຜ່ນດິນໄຫວ, ພູເຂົາໄຟລະເບີດ, ລົມພະຍຸ, ອື່ນໆ. ຊື່ງສ້າງຄວາມເສຍຫາຍຢ່າງຫຼວງຫລາຍ ຕໍ່ຊີວິດ, ຊັບສິນ, ເສດຖະກິດ, ສິ່ງແວດລ້ອມ, ພື້ນຖານໂຄງລ່າງ ພ້ອມທັງພື້ນຟູ, ບູລະນະ, ກໍ່ສ້າງຄືນຫຼັງໄພພິບັດ, ສະໜອງຂໍ້ມູນຂ່າວສານ ວອ່ງໄວ, ສັດເຈນ, ສາມາດເຊື່ອມໂຍງກັບພາກພື້ນ ແລະ ສາກົນ ແລະ ການດຳລົງຊີວິດຂອງສັງຄົມ ທັງໄລຍະສັ້ນ ແລະ ໄລຍະຍາວ, ທັງເປັນການທ່ວງດຶງ ຕໍ່ການພັດທະນາປະເທດຊາດ, ການພັດທະນາເສດຖະກິດ-ສັງຄົມ ຕາມທິດສີຂຽວ, ຍືນຍົງ ແລະ ຄວາມໝັ້ນຄົງຂອງຊາດ.




ທ່ານ ນາງ ໃບຄຳ ຂັດທິຍະ ກ່າວຕື່ມວ່າ: ຕໍ່ກັບສະພາບການທີ່ໄດ້ກ່າວມານັ້ນ, ອົງການຈັດຕັ້ງລັດທຸກຂັ້ນ ພາຍໃຕ້ການຊີ້ນໍາ ຂອງ ຄະນະພັກ-ຄະນະນໍາ ຂັ້ນຕ່າງໆ ກໍ່ໄດ້ສຸມໃສ່ຈັດຕັ້ງປະຕິບັດ, ໂດຍເລັ່ງໃສ່ມາດຕະການກຽມພ້ອມຕອບໂຕ້ສຸກເສີນ, ການປ້ອງກັນ ແລະ ຫລຸດຜ່ອນຄວາມສ່ຽງໄພພິບັດ. ລັດຖະບານຖືກເອົາວຽກງານຄຸ້ມຄອງຄວາມສ່ຽງໄພພິບັດ ເປັນບູລິມະສິດສໍາຄັນ ໃນການພັດທະນາປະເທດ ແລະ ໄດ້ເຊື່ອມສານວຽກງານຫລຸດຜ່ອນຄວາມສ່ຽງໄພພິບັດ ເຂົ້າໃນແຜນພັດທະນາເສດຖະກິດ-ສັງຄົມ ໃນແຕ່ລະໄລຍະ, ໂດຍສະເພາະ ໃນແຜນພັດທະນາເສດຖະກິດ-ສັງຄົມ ໄລຍະ 5 ປີ ຄັ້ງທີ 8 ຂອງ ລັດຖະບານ. ໜຶ່ງໃນບັນດາຄາດໝາຍທີ່ສໍາຄັນ ແມ່ນການສ້າງກົດໝາຍ ວ່າດ້ວຍການການຄຸ້ມຄອງໄພພິບັດ.



ສະນັ້ນ, ກອງປະຊຸມໃນຄັ້ງນີ້, ສຸດທີ່ມີຄວາມໝາຍສໍາຄັນ, ໄດ້ພ້ອມຮ່ວມກັນປະກອບຄວາມຄິດເຫັນນໍາສະເໜີ ແລະ ປະກອບຄໍາຄິດຄໍາເຫັນ ເພື່ອຮັບປະກັນ, ກວດກາເນື້ອໃນ ຂອງ ຮ່າງກົດໝາຍວ່າດ້ວຍການຄຸ້ມຄອງໄພພິບັດ ມີຄວາມສົມບູນ, ຖືກຕ້ອງກັບສະພາບຄວາມເປັນຈິງຂອງປະເທດເຮົາ ແລະ ສາມາດຈັດຕັ້ງປະຕິບັດໄດ້ຢ່າງມີປະສິດທິີຜົນ. ພ້ອມນີ້, ກໍ່ເພື່ອຮັບປະກັນໃຫ້ຮ່າງກົດໝາຍດັ່ງກ່າວ ໄດ້ຖືກນໍາສະເໜີ ແລະ ຮັບຮອງໂດຍກອງປະຊຸມສະພາ 2019ນີ້.

ພາບ-ຂ່າວ: ນ. ເພັດສະໄໝ



------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
Twitter ID: @tholakhong
tholakhong@gmail.com | www.tholakhong.com

No comments

Powered by Blogger.