Header Ads

ເມືອງອາດສະພອນ ຈັດຄະຣະວານທ່ອງທ່ຽວ ທຳມະຊາດ ດານຜາເຜິ້ງ.



ຄະຣະວານທ່ອງທ່ຽວທຳມະຊາດ ຜາເຜິ້ງ ທີ່ບ້ານນາຍອນ ເມືອງອາດສະພອນ ແຂວງສະຫວັນນະເຂດ ໄດ້ຈັດຂື້ນໃນລະຫວ່າງວັນທີ 29-30 ມີນາ 2019 ນີ້ ໂດຍການນຳທ່ຽວຂອງ ທ່ານ ປອ ແສງທອງ ວັງແກ້ວມະນີ ກຳມະການພັກແຂວງ ເລຂາພັກເມືອງ ເຈົ້າເມືອງອາດສະພອນ, ມີບັນດາທ່ານ ພະນັກງານການນຳຂອງເມືອງ, ນັກທ່ອງທ່ຽວຈາກແຂວງ, ນັກທ່ອງທ່ຽວພາຍໃນເມືອງອາດສະພອນເຂົ້າຮ່ວມຢ່າງຫຼວງຫຼາຍ.



ໃນພິທີເປີດຄະຣະວານທ່ອງທ່ຽວທຳມະຊາດ ຕິດພັນກັບວິຖີຊີວິດບັນດາເຜົ່າຊາວເມືອງອາດສະພອນ ທ່ານ ສີສຸກ ເທບທານີ ກຳມະການພັກເມືອງ ຮອງເຈົ້າເມືອງ ກໍ່ໄດ້ມີຄຳເຫັນໂອ້ລົມ ຕໍ່ພິທີດັ່ງກ່າວ ເຊິ່ງທ່ານ ກໍ່ໄດ້ຍົກໃຫ້ເຫັນຄວາມໝາຍຄວາມສຳຄັນຂອງ ການທ່ອງທ່ອງທ່ຽວ ບໍ່ວ່າຈະເປັນທາງດ້ານທຳມະຊາດ, ປະຫວັດສາດ ແລະ ວັດທະນະທຳ ກໍ່ລ້ວນແລ້ວແຕ່ມີຄວາມໝາຍຄວາມສຳຄັນ ເຊິ່ງມັນເປັນການສົ່ງເສີມໃຫ້ພໍ່ແມ່ປະຊາຊົນທີ່ຢູ່ໃນພື້ນຮູ້ຮັກສາຊັບພະຍາກອນທຳມະຊາດ ພູຜາ-ຜ່າໄມ້ ແລະວັດທະນະທຳຮີດຄອງປະເພນີອັ່ນດີງາມ ເພື່ອເອກອ້າງໃຫ້ສັງຄົມພາຍນອກໄດ້ຮັບຮູ້, ອີກທັງເປັນການສ້າງລາຍຮັບໃຫ້ແກ່ຊຸມຊົນ ແລະເປັນການດຶງດູເອົານັກລົງທຶນທາງດ້ານການທ່ອງທ່ຽວ ເຂົ້າມາລົງທຶນໃນເມືອງອາດສະພອນ ໃຫ້ຫຼາຍຂື້ນ.




 ໃນພິທີດັ່ງກ່າວກໍ່ໄດ້ຮັບຟັງແຜນການເຄື່ອນໄຫວ ຂອງຂະບວນຄະຣະວານທ່ອງທ່ຽວໃນຄັ້ງນີ້ ເຊິ່ງໄດ້ຈັດຂື້ນ 2 ວັນ ແລະໄດ້ກຳນົດຈຸດທ່ອງທ່ຽວຈາກເທດສະບານເມືອງອາດສະພອນຫາບ້ານນາຍອນ ໂດຍຕອນເຊົ້າຂອງວັນທີ 29 ມີນາ ຫຼັງຈາກທີ່ເປີດພິທີສຳເລັດແມ່ນຈະໄດ້ໄປສັກກະລະບູຊາພຣະທາດດອກແກ້ວ ຢູ່ທີ່ວັດທາດດອກແກ້ວ ເຊິ່ງເປັນພຣະທາດທີ່ຊາວເມືອງ ໃຫ້ການສັກກະລະບູຊາ, ຈາກນັ້ນ ກໍ່ໄດ້ເດີນທາງຕໍ່ໄປທີ່ບ້ານນາປອດ ເພື່ອທ່ຽວຊົມຕົ້ນຂາມເປ້ຍ ຈາລຶກຮອຍຊ້າງນາງລາວ ຕາມທີ່ປະຫວັດສາດໄດ້ຈາລຶກໄວ້ວ່າ: ນາງລາວ(ນາງຄຳເພົາ) ໄດ້ແຫ່ຂະບວນມາສຳຫຼວດເຂດເດນເມືອງວັງ-ອ່າງຄຳ ເມືອມາຮອດຈຸດນີ້ ຊ້າງຂອງນາງລາວ ກໍ່ໄດ້ມາຢຽມຕົ້ນຂາມ ເຮັດໃຫ້ຕົ້ນຂາມເປ້ຍ ຈຶ່ງເອີ້ນຕົ້ນຂາມນີ້ວ່າ: ຕົ້ນຂາມເປ້ຍ, 




ພ້ອມນັ້ນ ກໍ່ໄດ້ມີການມອບອຸປະກອນ ການຮຽນ ໃຫ້ນ້ອງນັກຮຽນ ໂຮງຮຽນປະຖົມນປອດ, ຈາກນັ້ນຂະບວນຄະຣະວານກໍ່ໄດ້ເດີນທາງໄປທີ່ບ້ານນາຍອນ ເພື່ອມອບອຸປະກອນ ການຮຽນການສອນແລະອຸປະກອນກິລາ ໃຫ້ໂຮງຮຽນປະຖົມນາຍອນ, ແລ້ວກໍ່ເດີນທາງ ໄປທ່ຽວຊົມ ວັດເກົ່າແກ່ຂອງບ້ານນາຍອນ ທີ່ສ້າງຂື້ນໃນສະໄໝຂອມ, 




ຈາກນັ້ນ ກໍ່ເດີນທາງຕໍ່ໄປທ່ຽວຊົມທຳມະຊາດ ຍອດເຊຈຳພອນ ເຊິ່ງເປັນຈຸດທີ່ຈະສ້າງເປັນອ່າງເກັບນ້ຳເພື່ອຮັບໃຊ້ເຂົ້າໃນການຜະລິດຂອງພໍ່ແມ່ປະຊາຊົນ, ຂະບວນໄດ້ເດີນທາງຕໍ່ໄປທີ່ດານຫ້ວຍໄຟ ທ່ຽວຊົມຂຸມສະຄຶ, ເຮືອຊາວວາ ແລະ ຕັ້ງແຄັ້ມ ພັກຜ່ອນແຮມຄືນ ແລະ ຮ່ວມກັນສ້າງກິດຈະກຳອ້ອມກອງໄຟໃນຍາມຄ່ຳຄືນ, ຈາກນັ້ນ ໃນວັນທີ 30 ມີນາ ຂະບວນຄະຣະວານທ່ອງທ່ຽວ ກໍ່ໄດ້ເດີນທາງດ້ວຍການຍ່າງ ໄປທີ່ຜາເຜິ້ງ ເຊິ່ງຈາກຈຸດພັກແຮມປະມານ 4 ກມ, ເພື່ອທ່ຽວຊົມຄວາມສວຍງາມຂອງພູຜາປ່າໄມ້, ຈຸດພິເສດແມ່ນຜາເຜິ້ງ ແລະຖ້ຳເພຍຫົດ-ເພຍໄຊ ຜາເຜິ້ງເປັນໜ້າຜາທີ່ສູງຊັນ ຄາດວ່າສູງປະມານ 70 ກວ່າແມັດ, ຕາມການບອກເລົ່າຂອງເຖົ້າແກ່ບ້ານນາຍອນ ທີ່ເອີ່ນຊື່ວ່າ: ຜາເຜີ້ງ ກໍ່ຍ້ອນ ເມື່ອກ່ອນ ໜ້າຜາດັ່ງກ່າວ ມັກມີເຜິ້ງມາອາໄສຢູ່ຈຳນວນຫຼາຍ ເລີຍພາກັນເອີ້ນວ່າຜາເຜິ້ງ.
ພາບ ແລະ ຂ່າວ
ສົມຈິດ ແກ້ວສີຖາທິລາດ




No comments

Powered by Blogger.