Header Ads

ກະຊວງການຕ່າງປະເທດ ແລະ ບັນດາທູຕານຸທູດຕ່າງປະເທດ ສະເຫຼີມສະຫຼອງບຸນປີໃໝ່ລາວ





   ໃນວັນທີ 06 ເມສາ 2019, ກະຊວງການຕ່າງປະເທດ ຮ່ວມກັບ ບັນດາທູຕານຸທູດ ແລະ ອົງການຈັດຕັ້ງສາກົນ ປະຈໍາ ສປປ ລາວ ໄດ້ຈັດພິທີບາສີສູ່ຂວັນສະເຫຼີມສະຫຼອງບຸນປີໃໝ່ລາວ ທີ່ ສວນພຶກສາ, ບ້ານໃໝ່ດ່ານຊີ, ເມືອງນາຊາຍທອງ, ນະຄອນ ຫຼວງວຽງຈັນ, ເພື່ອເປັນການສົ່ງທ້າຍປີເກົ່າ ພ.ສ 2561 ແລະ ຕ້ອນຮັບປີໃໝ່ ພ.ສ 2562. 
   ໃຫ້ກຽດເຂົ້າຮ່ວມງານສະເຫຼີມສະຫຼອງບຸນປະເພນີປີໃໝ່ລາວໃນຄັ້ງນີ້, ທ່ານ ສະເຫຼີມໄຊ ກົມມະສິດ, ກໍາມະການສູນກາງພັກ, ເລຂາຄະນະພັກກະຊວງ, ລັດຖະມົນຕີກະຊວງການຕ່າງປະເທດ ພ້ອມດ້ວຍພັນລະຍາ,ຄະນະພັກ-ຄະນະນໍາກະຊວງ ພ້ອມດ້ວຍຄອບຄົວ ແລະ ບັນດາພະນັກງານອາວຸໂສບໍານານ, ຄະນະນຳຫ້ອງການ, ກົມກອງ, ພະແນກການຕ່າງໆອ້ອມຂ້າງ, ບັນດາອົງການຈັດຕັ້ງມະຫາຊົນ ແລະ ພະນັກງານ ກະຊວງການຕ່າງປະເທດ ເຂົ້າຮ່ວມຢ່າງພ້ອມພຽງ. 


   ບັນດາທູຕານຸທູດຕ່າງປະເທດ, ກົງສູນ-ກົງສູນກິດຕິມະສັກ, ແລະ ຜູ້ຕາງໜ້າອົງການຈັດຕັ້ງສາກົນຕ່າງໆປະຈໍາ ສປປ ລາວ ພ້ອມດ້ວຍຄອບຄົວ ແລະ ແຂກຮັບເຊີນ ກໍ່ໄດ້ໃກ້ກຽດເຂົ້າຮ່ວມເຊັ່ນດຽວກັນ. 


   ໃນໂອກາດນີ້, ທ່ານລັດຖະມົນຕີ ສະເຫຼີມໄຊ ກົມມະສິດ ໄດ້ຕາງ ຫນ້າໃຫ້ຄະນະພັກ-ຄະນະນໍາກະຊວງການຕ່າງປະເທດ ສະແດງຄວາມຍິນດີຕ້ອນຮັບ ແລະ ອວຍພອນປີໃໝ່ລາວ ຕໍ່ບັນດາພະນັກງານ, ທູຕານຸທູດ ແລະ ແຂກທີ່ເຂົ້າຮ່ວມ ດ້ວຍຄວາມອົບອຸ່ນ ແລະ ສະໜິດສະໜົມ. 


   ພ້ອມນີ້, ທ່ານລັດຖະມົນຕີ ຍັງໄດ້ຍົກໃຫ້ເຫັນເຖິງຄວາມໝາຍຄວາມສໍາຄັນຂອງບຸນປີໃໝ່ລາວ, ຊຶ່ງແມ່ນບຸນປະເພນີຫນຶ່ງທີ່ສໍາຄັນຂອງຊາດລາວ ຊຶ່ງໄດ້ສືບສານກັນມາຕັ້ງແຕ່ບູຮານນະການ. 


ບັນດາ​ສຳນັກງານ​ອົງການ​ຕ່າງໆ​ທັງ​ພາກ​ລັດ ແລະ ເອກະ​ຊົນ, ຫົວໜ່ວຍ​ທຸລະ​ກິດ ຕະຫຼອດ​ຮອດ​ພໍ່​ແມ່​ປະຊາຊົນ ຕ່າງກໍ່ຈັດພິທີບາສີສູ່ຂວັນ  ແລະ ຫົດສົງ​ນ້ຳ​ໃຫ້ການ​ນຳ​ພັກ-ລັດ, ຜູ້​ອາວຸໂສ, ຜູ້​ເຖົ້າ​ຜູ້​ແກ່ ແລະ ຜູ້​ເປັນ​ພໍ່​ເປັນ​ແມ່ ກໍ​່ຄື​ ຜູ້​ທີ່​ມີ​ບຸນຄຸນ ເພື່ອ​ເປັນ​ການ​ປັດ​ເປົ່າ​ສິ່ງ​ທີ່​ບໍ່​ດີ​ບໍ່​ງາມ​ໃຫ້​ໄປ​ຕາມ​ປີ​ເກົ່າ ແລະ ອວຍພອນ​ປີ​ໃໝ່​ຊື່ງກັນ ແລະກັນໃຫ້ມີ​ແຕ່​ໂຊກ​ແຕ່​ໄຊ. 



   ພ້ອມດຽວກັນນັ້ນ, ໃນໂອກາດສະເຫຼີມສະຫຼອງບຸນປີໃໝ່ລາວ ໃນຄັ້ງນີ້ ຍັງເປັນໂອກາດທີ່ດີໃນການເຜີຍແຜ່ມູນເຊື້ອວັດທະນະທໍາ ແລະ ຮີດຄອງປະເພນີອັນດີງາມຂອງລາວ ໃຫ້ແກ່ ບັນດາທູຕານຸທູດ ແລະ ອົງການຈັດຕັ້ງສາກົນປະຈໍາ ສປປ ລາວ ກໍ່ຄື ຊາວຕ່າງຊາດ ໃຫ້ໄດ້ຮັບຮູ້, ໄດ້ສໍາຜັດແລະ ໄດ້ເຂົ້າໃຈຢ່າງເລິກເຊິ່ງ ກ່ຽວກັບ ບຸນປະເພນີດັ່ງກ່າວຂອງລາວເຮົາ, ພ້ອມທັງເປັນການສົ່ງເສີມຄວາມເຂົ້າອົກເຂົ້າໃຈ ແລະ ການຮັດແໜ້ນການພົວພັນຮ່ວມມືອັນດີງາມລະຫວ່າງ ພະນັກ ງານກະຊວງການຕ່າງປະເທດ ກໍ່ຄືນັກການທູດລາວ ກັບບັນດາທູຕານຸທູດ ແລະ ອົງການຈັດຕັ້ງສາກົນ ປະຈໍາ ສປປ ລາວ ແລະ ບັນດາປະເທດເພື່ອນມິດໃນພາກພື້ນ ແລະ ໃນໂລກ.


   ໃນຕອນທ້າຍ, ທ່ານລັດຖະມົນຕີ ກໍ່ໄດ້ອວຍພອນໄຊປີໃຫມ່ອັນປະເສີດ ໃຫ້ແກ່ ທຸກໆທ່ານທີ່ໄດ້ມາຮ່ວມງານ ຈົ່ງມີສຸຂະພາບແຂງແຮງ, ມີພະລານາໄມທີ່ສົມບູນ, ມີ​ຄວາມ​ເບີກບານ​ມ່ວນຊື່ນ, ປະສົບຜົນສໍາເລັດໃນໜ້າທີ່ວຽກງານ ແລະ ມີຄວາມຜາສຸກໃນຊີວິດສ່ວນຕົວ ແລະ ຄອບຄົວ ທຸກປະການ ຕະຫຼອດປີ ພ.ສ 2562 ແລະ ຕະຫຼອດໄປ.


    ຈາກນັ້ນ, ກໍ່ໄດ້ມີພິທີບາສີສູ່ຂວັນ ແລະ ອວຍພອນປີໃໝ່ ຊຶ່ງກັນ ແລະ ກັນ,  ມີພາເຂົ້າສາມັກຄີອາຫານທ່ຽງ, ພ້ອມທັງ ການສະແດງສີລະປະວັນນະຄະດີແລະ ການຟ້ອນລຳຮ່ວມກັນຢ່າງເບີກບານມ່ວນຊື່ນ ໃນບັນຍາກາດທີ່ເຕັມໄປດ້ວຍໄມຕີຈິດມິດຕະພາບອັນດີ ແລະ ຄວາມໝາຍອັນສໍາຄັນຍິ່ງ.

No comments

Powered by Blogger.