Header Ads

ຢຸດຂຸດເຈາະອຸໂມງມິດຕະພາບ ລາວ-ຈີນ ຊົ່ວຄາວຍ້ອນພົບ ເກືອປະລິມານສູງ:



 
ພາຍຫລັງທີ່ໄດ້ດຳເນີນການກໍ່ສ້າງອຸໂມງມິດຕະພາບແຫ່ງທຳອິດ ເຊື່ອມຕໍ່ສອງປະເທດ ລາວ-ຈີນ ຈຸດບໍ່ເຕ່ນ-ບໍ່ຫານ ນັບແຕ່ປີ 2017 ເປັນຕົ້ນມາ ເຊິ່ງໃນເບື້ອງປະເທດລາວ ອຸໂມງ ມີຄວາມຍາວ 1.200 ກວ່າແມັດ ແລະ ເບື້ອງປະເທດຈີນ ຍາວ 7.000 ກວ່າແມັດ ລວມ 9.000 ກວ່າແມັດ, ມາຮອດປະຈຸບັນ ແມ່ນໄດ້ສຳເລັດການຂຸດເຈາະໄປ ແລ້ວກວ່າ 60%. 



ທ່ານ ຫວາງ ສ້ຽວຕົ່ງ, ຜູ້ບໍລິຫານຫ້ອງການຄຸ້ມຄອງໂຄງການລົດ ໄຟລາວ - ຈີນເລກ 2 ໄລຍະທີ 1 ເສັ້ນທາງບໍ່ເຕັນ - ນະຄອນຫຼວງວຽງຈັນ ໄດ້ໃຫ້ສໍາພາດວ່າ: ໃນການສຳຫຼວດເບື້ອງຕົ້ນ ແມ່ນສາມາດພົບເຫັນເກືອປະລິມານໃດຫນຶ່ງ ແຕ່ກໍ່ບໍ່ຫຼາຍປານໃດ; ແຕ່ຜ່ານການຂຸດເຈາະຕົວຈິງ ເຫັນວ່າ ມີປະລິມານເກືອຫຼາຍ ຖ້າທຽບໃສ່ການຂຸດເຈາະຢູ່ແຂວງຊານຊີ ສປ ຈີນ, ເຊິ່ງຖືວ່າ ເປັນແຫ່ງໜຶ່ງທີ່ມີທາດເກືອຫຼາຍທີ່ສຸດອີກແຫ່ງໜຶ່ງຂອງໂລກ; ທິມງານວິຊາການໄດ້ຂຸດເຈາະຢາມລົງໄປເລິກຮອດ 50 ແມັດ ແຕ່ກໍ່ຍັງມີເກືອປະລິມານຫຼາຍຢູ່; ດ້ວຍເຫດນັ້ນ ຈຶ່ງເຮັດໃຫ້ການກໍ່ສ້າງ ຕ້ອງໄດ້ຢຸດຕິລົງຊົ່ວຄາວ ເມື່ອຕົ້ນປີ 2019 ນີ້.



ປະຈຸບັນ, ທາງບໍລິສັດກຳລັງປະສານສົມທົບກັບທາງພາກລັດ ກໍ່ຄື ຂະແໜງຊັບພະຍາກອນ ແລະ ສິ່ງແວດລ້ອມ ເພື່ອປຶກສາຫາລືກ່ຽວກັບການປັບປຸງແກ້ໄຂ, ການຍົກລະດັບວິທີການກໍ່ສ້າງ ແລະ ການຜະລິດອຸປະກອນທີ່ມີ ຄວາມທົນທານຕໍ່ການກັດຂອງທາດເກືອສູງ ເພື່ອໃຫ້ມີການຮັບປະກັນໃນໄລຍະຍາວ, ກ່ອນຈະມີການສືບຕໍ່ການກໍ່ສ້າງໃນກາງປີນີ້ , ເພື່ອເຮັດໃຫ້ການຂຸດເຈາະອຸໂມງມິດຕະພາບແຫ່ງນີ້ສຳເລັດຕາມແຜນການທີ່ໄດ້ວາງໄວ້ໃນທ້າຍປີ 2019 ນີ້.
ຂ່າວ - ພາບ : ອະພິນຍາ ສຸລິຍະວົງ

No comments

Powered by Blogger.