Header Ads

ເມືອງເງິນ ມີຄວາມພ້ອມຮອບດ້ານໃນການເປີດວັນ ວສຊ


ກອງປະຊຸມກະກຽມເປີດວັນສັກຢາກັນພະຍາດແຫ່ງຊາດ(ວສຊ) ກັນພະຍາດໝາກແດງໃຫຍ່-ໝາກແດງນ້ອຍ ປະຈຳປີ 2019 ໄດ້ຈັດຂື້ນຢ່າງເປັນທາງການ. ໃນວັນທີ 11 ເມສາ 2019 ນີ້ ຢູ່ທີ່ສະໂມສອນໃຫຍ່ ເມືອງເງິນ ແຂວງ ໄຊຍະບູລີ. ພາຍໃຕ້ການເປັນປະທານຂອງທ່ານ ສອນສຸກ ພວງແກ້ວ ຮອງເລຂາພັກເມືອງ ຮອງເຈົ້າເມືອງ ທັງເປັນປະທານຄະນະກຳມາທິການເພື່ອຄວາມກ້າວໜ້າຂອງແມ່ຍິງ ວຽກແມ່ ແລະ ເດັກຂັ້ນເມືອງ, ມີກຳມະການພັກເມືອງ, ຫົວໜ້າຫ້ອງການ, ເລຂາຄະນະພັກຮາກຖານ ເລຂາໜ່ວຍພັກນາຍບ້ານ, ອົງການຈັດຕັ້ງມາຫາຊົນ ບ້ານ ແລະ ພະນັກງານແພດໝໍເຂົ້າຮ່ວມ.

ທ່ານ ດຣ ບຸນເລື່ອນ ບົວໄລ ກຳມະການພັກເມືອງ ຫົວໜ້າຫ້ອງການສາທາລະນະສຸກເມືອງ ໃຫ້ຮູ້ວ່າ ການກະກຽມເປີດວັນສັກຢາກັນພະຍາດແຫ່ງຊາດ(ວສຊ) ກັນພະຍາດໝາກແດງໃຫຍ່-ໝາກແດງນ້ອຍ ປະຈຳປີ 2019 ຢູ່ເມືອງເງິນ ແມ່ນມີຜົນສຳເລັດຫຼາຍດ້ານເປັນຕົ້ນແມ່ນ ການເກັບກໍາຂໍ້ມູນເປົ້າໝາຍ ເດັກອາຍຸ 6 ເດືອນ - 10 ປີ ທີ່ຈະສັກຢາກັນພະຍາດໝາກແດງໃຫຍ່-ໝາກແດງນ້ອຍ. ສຳເລັດການຂື້ນແຜນການກຳນົດຈັດວາງວຽກງານດ້ານບຸກຄາລະກອນ ແລະ ອຸປະກອນຮັບໃຊ້. ພ້ອມທັງອອກຂໍ້ຕົກລົງຂອງທ່ານເຈົ້າເມືອງ ວ່າດ້ວຍການແຕ່ງຕັ້ງຄະນະຮັບຜິດຊອບແຕ່ລະເຂດບໍລິການສັກຢາ.  

 ເມືອງເງິນ ປະກອບມີ 22 ບ້ານ,  ມີປະຊາກອນທັງໝົດ 18,919 ໃນນີ້ ມີເດັກໃນກຸ່ມເປົ້າໝາຍສັກຢາກັນພະຍາດໝາກແດງໃຫຍ່-ໝາກແດງນ້ອຍ ອາຍຸ ແຕ່ 6 ເດືອນ ຫາ 10 ປີ ທັງໝົດ 3,870 ຄົນ, ເຊີ່ງຈະໄດ້ແບ່ງອອກເປັນ 45 ຈຸດບໍລິການ.

ຈາກນັ້ນ ຜູ້ເຂົ້າຮ່ວມກອງປະຊຸມຍັງໄດ້ຮັບຟັງການສະຫຼຸບລາຍງານການຈັດຕັ້ງປະຕິບັດວຽກງານປ້ອງກັນ ແລະ ຄວບຄຸ້ມພະຍາດໄຂ້ຍຸງລາຍ ແລະ ທິດທາງແຜນການ ຕ້ານ ແລະ ສະກັດກັ່ນພະຍາດໄຂ້ຍຸງລາຍ ປະຈຳປີ 2019 ອີກດ້ວຍ.

ພາບ+ຂ່າວ ໂດຍ: ອິນແປງ ແຫວນຄຳ 
ຫ້ອງການ ຖວທ ເມືອງເງິນ

No comments

Powered by Blogger.