Header Ads

ນັກທ່ອງທ່ຽວໃຫ້ຄວາມສົນໃຈພິທີແຫ່ນາກຈາກພະທາດຈອມສີ ປີນີ້ຢູ່ຫຼວງພະບາງເປັນຢ່າງດີ



ພິທີແຫ່ພະຍານາກຈາກພະທາດຈອມສີລົງສູ່ໜອງເທິງເກດ, ບໍລິ ເວນຫໍພິພິທະພັນແຫ່ງຊາດ, ນະຄອນຫຼວງພະບາງ, ແຂວງຫຼວງພະບາງ ໄດ້ຖືກຈັດຂື້ນເປັນປະຈຳທຸກໆປີ ໃນມື້ສັງຂານຂື້ນປີໃໝ່ລາວ, ໂດຍມີກິດຈະກຳຫຼາກ ຫຼາຍຢ່າງ, ໂດຍສະເພາະ ການສະແດງຂອງຄະນະສະແດງໂຮງລະຄອນພະລັກພະລາມ ຢູ່ໜ້າຫໍພະບາງ; ການສະແດງດັ່ງກ່າວຖືວ່າ ເປັນການເຜີຍແຜ່ວັດທະ ນະທຳ ແລະ ຮີດຄອງປະເພນີອັນດີງາມຂອງລາວເຮົາ, ທັງເປັນການປະຕິບັດຕາມພິທີກຳທາງສາສະໜາ ກ່ອນທີ່ຈະມີການອັງເຊີນອົງພຣະບາງລົງຫົດສົງຢູ່ວັດໃໝ່ ສຸວັນນະພູມມາລາມ. 

ຕາມການເລົ່າຂານສືບຕໍ່ກັນມາ, ການແຫ່ພະຍານາກ ຈາກພະທາດຈອມສີ ລົງສູ່ໜອງເທິງເກດໃນບໍລິເວນຫໍພິພິດທະພັນແຫ່ງຊາດ ຫຼື ພະລາດສະວັງເກົ່ານັ້ນ ແມ່ນມີມູນເຫດມາຈາກທ້າວໃຈຈຳນົງຮັກສາພະບາດ ສີສັກຕະນາກເຈົ້າຢູ່ເຝົ້າຈອມສີ ກົງທະນາບໍດີເປັນເຄົ້າ, ໝາຍເຖີງວ່າ ຕົນນີ້ໃຫ່ຍກ່ວາເພີ່ນ, ດັ່ງນັ້ນ ໃນ ມື້ສັງຂານຂື້ນ ຈຶ່ງຈະຕ້ອງໄດ້ແຫ່ຈາກພະທາດຈອມສີ ລົງມາສູ່ໜອງເທິງເກດ ເພື່ອສະແດງຄວາມເກັ່ງກ້າ ປີຊາສາມາດ.

ມາຮອດປະຈຸບັນ, ຄະນະຟື້ນຟູ ຂອງໂຮງລະຄອນພະລັກ-ພະລາມ ໄດ້ມີການສືບສານປະເພນີ ແລະ ພິທີກຳດັ່ງກ່າວ ໃຫ້ຍືນຍົງຕໍ່ໄປ, ໂດຍສະເພາະ ກໍ່ແມ່ນກິດຈະກຳແຫ່ນາກໃນມື້ສັງຂານຂື້ນປີໃໝ່ລາວ ແລະ ການສະແດງຢູ່ວັດໃໝ່ສຸວັນນະພູມມາຣາມ ໃນໄລຍະຫົດສົງອົງພະບາງຈຳນວນ 3 ຄືນ. 

ສຳລັບກິດຈະກຳໃນຕອນຄໍ່າຂອງມື້ສັງຂານຂື້ນ ຈະມີການແຫ່ນາກ, ກາາຟ້ອນລໍາໂຄມ, ການຟ້ອນອວຍພອນ, ການສະແດງລະຄອນຕອນພະລາມຕາມຫາກວາງຄໍາ ແລະ ການລັກພາຕົວນາງສີດາ, ການຟ້ອນຍັກ, ການຟ້ອນລີງ ແລະ ການຟ້ອນນາງແກ້ວ. 

ເຂົ້າຮ່ວມຊົມການແຫ່ນາກ ແລະ ການສະແດງ ໃນຄັ້ງນີ້, ມີ ທ່ານ ສຸລິທີບ ໜໍ່ຄຸນຜົນ, ຫົວໜ້າພະແນກ ຖວທ ແຂວງຫຼວງພະບາງ, ພ້ອມດ້ວຍມວນຊົນບັນດາເຜົ່າ, ແລະ ແຂກທັງພາຍໃນ ແລະ ຕ່າງປະເທດ ເປັນຈຳນວນຫຼາຍ.

ຂ່າວ,ພາບ: ອາພຸດເດດ ບຸບຜາ


No comments

Powered by Blogger.