Header Ads

ອັດຕະປື ປ່ອຍຂະບວນຈະລາຈອນປ້ອງກັນ ສະກັດກັ້ນອຸບັດຕິເຫດ



ກອງບັນຊາການ ປ້ອງກັນຄວາມສະຫງົບແຂວງອັດຕະປື ສົມທົບກັບຫ້ອງຕໍາຫຼວດພະແນກຈະລາຈອນ ໄດ້ຈັດພິທີປ່ອຍກໍາລັງຕໍາຫຼວດຈະລາຈອນ ເພື່ອປ້ອງກັນ ແລະ ສະກັດກັ້ນອຸບັດຕິເຫດໃນໄລຍະບຸນປີໃໝ່ລາວ ຂື້ນໃນວັນທີ 9 ເມສາ 2019 ທີ່ເດີ່ນກອງບັນຊາການ ປ້ອງກັນຄວາມສະຫງົບ ແຂວງອັດຕະປື.  




ໂດຍເປັນກຽດ ເຂົ້າຮ່ວມຂອງທ່ານ ພັນໂທ ບັນດິດ ສີວີໄລ ຮອງກອງບັນຊາການ ປ້ອງກັນຄວາມສະຫງົບແຂວງຜູ້ອັດຕະປື,ຫົວໜ້າຫ້ອງຕຳຫຼວດ,ຫົວໜ້າພະແນກຈະລາຈອນແຂວງ ພ້ອມດ້ວຍກໍາລັງຕໍາຫຼວດຈະລາຈອນພາຍໃນພະແນກຈະລາຈອນເເຂວງເຂົ້າຮ່ວມ. 




ທ່ານ ພັນຕີ ເພັດສະໄໜ ໄຊຍະກຸນ ຫົວໜ້າພະແນກຕໍາຫຼວດຈະລາຈອນກອງບັນຊາການປ້ອງກັນຄວາມສະຫົງບແຂວງອັດຕະປື ໄດ້ກ່າວວ່າ: ການປ່ອຍຂະບວນຈະລາຈອນ ຄັ້ງນີ້ກໍເພື່ອແນໃສ່ເຮັດໃຫ້ສະພາບການສັນຈອນໃນຂອບເຂດທົ່ວແຂວງອັດຕະປື ໄລຍະປີໃໝ່ລາວທີ່ຈະມີເຖິງນີ້ ມີຄວາມເປັນລະບຽບຮຽບຮ້ອຍ ແລະ ປອດໄພ ທັງເປັນການຊຸກຍູ້ແນະນໍາໃຫ້ຜູ້ໃຊ້ລົດ-ໃຊ້ຖະໜົນ ຍົກສູງສະຕິເຄົາລົບຕໍ່ກົດລະບຽບຈະລາຈອນຢ່າງເຂັ້ມງວດ, ມີສ່ວນຮ່ວມເປັນເຈົ້າການໃນການສະກັດກັ້ນ, ເພື່ອປ້ອງກັນສະກັດກັ້ນຄວາມຮຸນແຮງ ຈາກການເກີດອຸບັດຕິເຫດໃຫ້ຫຼຸດລົງເທື່ອລະກ້າວ ທັງເປັນການຊອກໃຫ້ຮູ້ສາເຫດ, ເງື່ອນໄຂ ຕໍ່ການລະເມີດສາເຫດທີ່ພາໃຫ້ເກີດອຸບັດຕິເຫດ ເພື່ອມາວາງແຜນສະກັດກັ້ນ.ພ້ອມດຽວກັນນັ້ນກໍ່ເພື່ອເປັນການຫັນກໍາລັງລົງໂຄສະນາຕາມສາຍທາງ,ຕະຫຼາດ,ເຂດຊຸມຊົນ,ບ້ານ ແລະບັນດາຕົວເມືອງ.




 ທ່ານ ພັນຕີ ເພັດສະໄໜ ໄຊຍະກຸນ ຫົວໜ້າພະແນກຕໍາຫຼວດຈະລາຈອນກອງບັນຊາການປ້ອງກັນຄວາມສະຫົງບແຂວງອັດຕະປື ຍັງໄດ້ກ່າວຕື່ມວ່າ: ໃນໄລຍະຊຸມປີຜ່ານມາສະພາບອຸບັດຕິເຫດຈະລາຈອນທາງບົກທີ່ເກີດຂື້ນຊ່ວງປີໃໜ່ລາວ ເຫັນວ່າມີຄວາມຮຸນແຮງພໍສົມຄວນ,ຊຶ່ງໄດ້ສ້າງຜົນເສຍຫາຍໃນດ້ານສຸຂະພາບ ຊິວິດ ແລະຊັບສິນຂອງປະຊາຊົນບັນດາເຜົ່າ,ສະເພາະປີ 2018 ຜ່ານມາໄລຍະບຸນປີໄໝ່ຢູ່ແຂວງອັດຕະປື ມີອຸບັດຕິເຫດເກີດຂື້ນທັງໜົດ 10 ລາຍ,ພາຫະນະເປ້ເພ 19 ຄັນ,ຄົນໄດ້ຮັບບາດເຈັບ 20 ຄົນ,ເສຍຊິວິດ 1 ຄົນ.ລວມມູນຄ່າເສຍຫາຍ 2 ຮ້ອຍ 50 ລ້ານກີບ.   


ສໍາລັບຂະບວນຈະລາຈອນ ທີ່ປ່ອຍຄັ້ງນີ້ ມີໜ້າທີ່ຫຼັກຄື ເຮັດວຽກງານໂຄສະນາຢ່າງກວ້າງຂວາງ ພ້ອມທັງເຄື່ອນໄຫວຊຸກຍູ້ທ້ອງຖິ່ນປຸກລະດົມຮ່ວມກັນປ້ອງກັນສະກັດກັ້ນການລະເມີດຢ່າງຕັ້ງໜ້າ,ຈັດຕັ້ງພະ ນັກງານລົງເຜີຍແຜ່ລະບຽບກົດໝາຍ, ແຈ້ງການ,ຄໍາແນະນໍາຕ່າງໆໃຫ້ຜູ້ຂັບຂີ່ມີຄວາມເຂົ້າໃຈລະບຽບການສັນຈອນຢ່າງເຂັ້ມງວດ,ເຮັດໜ້າທີ່ອໍານວຍຄວາມສະດວກຈຸດທີ່ມີຄວາມສ່ຽງ, ຄວາມແອອັດ, ວາງກໍາລັງປະຈໍາເສັ້ນທາງ 3 ແຍກ, 4 ແຍກ, ປະຈໍາການປ້ອມທີ່ຈະມີການລະເມີດກົດລະບຽບການສັນຈອນທີ່ຈະພາໃຫ້ເກີດອຸບັດຕິເຫດ. ນອກນັ້ນເຮັດໜ້າທີ່ກວດກາພາຫະນະ, ຜູ້ຂັບຂີ່, ການບັນທຸກສິນຄ້າ, ຜູ້ໂດຍສານເກີນ, ຄວາມໄວເກີນ, ກວດທາດເຫຼົ້າ, ບໍ່ຮັດສາຍນິລະໄພ, ໜວກກັນກະທົບ ແລະອື່ນໆ.  


ທ່ານ ພັຕ ເພັດສະໄໜ ໄຊຍະກຸນ ໄດ້ກວດກາພາຫະນະ ແລະ ເຄື່ອງມືທີ່ກຽມພ້ອມປະຕິບັດໜ້າທີ່ທັງເນັ້ນໃຫ້ກໍາລັງຈົ່ງເອົາໃຈໃສ່ຈັດຕັ້ງປະຕິບັດວຽກງານວິຊາສະເພາະຢ່າງຕັ້ງໜ້າໃຫ້ຄວາມຊ່ວຍ ເຫຼືອບໍລິການປະຊາຊົນ, ອໍານວຍຄວາມສະດວກ-ປອດໄພໃນການສັນຈອນ, ສຶກສາອົບເຂົາເຈົ້າມີຄວາມເຂົ້າໃຈກ່ຽວກັບການປ້ອງກັນ, ສະກັດກັ້ນອຸບັດຕິເຫດໃຫ້ຫຼຸດລົງ ແລະ ໃຫ້ຖືເອົາການປັບ ໃໝເປັນມາດຕະການ.
#ຂ່າວ:ມະນີວອນ

No comments

Powered by Blogger.