Header Ads

ມອບ-ຮັບໜ້າທີ່ຜູ້ອໍານວຍການລັດວິສາຫະກິດລົດເມຜູ້ໃໝ່



 ພິທີປະກາດການຈັດຕັ້ງ ແລະ ມອບ-ຮັບໜ້າທີ່ຜູ້ອໍານວຍການລັດວິສາຫະກິດລົດເມ ນະຄອນຫຼວງວຽງຈັນ (ນວ) ຜູ້ເກົ່າ ແລະ ຜູ້ໃໝ່ ຈັດຂຶ້ນວັນທີ 8 ເມສາ 2019 ຢູ່ລັດວິສາຫະກິດລົດເມ ນວ ໂດຍມີທ່ານ ບຸນທອງ ພົມມະຈັນ ຫົວໜ້າຄະນະຈັດຕັ້ງ ນວ ທ່ານ ຈັນທະລາ ພິມມະຈັກ ຮອງຫົວໜ້າກົມຈັດຕັ້ງ ແລະ ພະນັກງານ ກະຊວງໂຍທາທິການ ແລະ ຂົນສົ່ງ ທ່ານ ເດດສົງຄາມ ທໍາມະວົງ ຫົວໜ້າພະແນກໂຍທາທິການ ແລະ ຂົນສົ່ງ ພ້ອມດ້ວຍຄະນະອໍານວຍການ ພະນັກງານ ແລະ ກໍາມະກອນພາຍໃນລັດວິສາຫະກິດລົດເມ ເຂົ້າຮ່ວມ. 

 ທ່ານ ຄໍາພູນ ເຕເມລາດ ຜູ້ອໍນວຍການລັດວິສາຫະກິດລົດເມ ນວ ຜູ້ເກົ່າ ກ່າວວ່າ: ຕະຫຼອດໄລຍະການນໍາພາແຕ່ມື້ຮັບຜິດຊອບຈົນເຖິງປັດຈຸບັນ (1993-2018) ຂ້າພະເຈົ້າໄດ້ອອກແຮງນໍາພາພະນັກງານ ກໍາມະກອນ ເຄື່ອນໄຫວທຸລະກິດຕາມການມອບໝາຍ ແລະ ສາມາດປະຕິບັດແຜນການເຄື່ອນໄຫວໄດ້ບາງໂຕເລກ ເຊັ່ນ: ຂົນສົ່ງຜູ້ໂດຍສານໄດ້ທັງໝົດ 122.965.062 ຄົນ ບໍລິມາດຈໍລະຈອນທັງໝົດ 5.633.838.713 ຄົນ/ກິໂລແມັດ ສ້າງລາຍຮັບໄດ້ທັງໝົດ 544,38 ຕື້ກີບ ມອບພັນທະຕໍ່ລັດທັງໝົດ 56,07 ຕື້ກີບ ປັດຈຸບັນລັດວິສາຫະກິດລົດເມມີພະນັກງານ-ກໍາມະກອນ ທັງໝົດ 258 ຄົນ ຍິງ 43 ຄົນ ພະນັກງານຕາມສັນຍາ 32 (ກະເປົາລົດເມ 21 ຄົນ) ມີລົດເມທີ່ຂຶ້ນແຜນ ປີ 2019 ຈໍານວນ 106 ຄັນ ມີສາຍທາງບໍລິການໃນປັດຈຸບັນທັງໝົດ 22 ສາຍທາງ ເພື່ອປັບປຸງການຂົນສົ່ງໂດຍສານສາທາລະນະໃນ ນວ ໃຫ້ດີຂຶ້ນກວ່າທີ່ຜ່ານມາ.

  ໃນພິທີ ຍັງໄດ້ມີການເຊັນສັນຍາມອບ-ຮັບໜ້າທີ່ລະຫວ່າງ ທ່ານ ຄໍາພູນ ເຕເມລາດ ຜູ້ອໍານວຍການລັດວິສາຫະກິດລົດເມ ນວ ຜູ້ເກົ່າ ແລະ ທ່ານ ແກ້ວວັນພອນ ວອນທິວົງສີ ຜູ້ອໍານວຍການລັດວິສາຫະກິດລົດເມ ນວ ຜູ້ໃໝ່.

No comments

Powered by Blogger.