ມອບ-ຮັບອຸປະກອນກໍ່ສ້າງ ມູນຄ່າ 1,29 ຕື້ກີບໃຫ້ແຂວງອັດຕະປື


ອັດຕະປື: ເພື່ອປະຕິບັດຕາມແຈ້ງການຂອງຫ້ອງວ່າການສຳນັກງານນາຍົກລັດຖະມົນຕີ ແລະ ຂໍ້ຕົກລົງຂອງກະຊວງແຮງງານ ແລະສະຫວັດດີການສັງຄົມ (ຮສສ), ໃນໂອກາດທີ່ ທ່ານນາງ ໃບຄຳ ຂັດທິຍະ ຮອງລັດຖະມົນຕີກະຊວງ ຮສສ ພ້ອມຄະນະລົງ ເຮັດວຽກຢູ່ 4 ແຂວງພາກໃຕ້ ໃນລະຫວ່າງວັນທີ 20 - 24 ພືກສະພາ ທີ່ຜ່ານມານີ້, ກໍໄດ້ຖືໂອກາດດັ່ງກ່າວມອບອຸປະກອນກໍ່ສ້າງໃຫ້ແຂວງອັດຕະປື ມູນຄ່າ 1,29 ຕື້ກີບ, ໂດຍຕາງໜ້າຮັບແມ່ນທ່ານ ອຸ່ນຫຼ້າ ໄຊຍະສິດ ຮອງເຈົ້າແຂວງອັດຕະປື, ພ້ອມນັ້ນ ຍັງມີພາກສ່ວນທີ່ກ່ຽວຂ້ອງເຂົ້າຮ່ວມ.



ທ່ານນາງ ໃບຄຳ ຂັດທິຍະ ກ່າວວ່າ: ການມາມອບວັດຖຸສົມທົບປຸກສ້າງໃຫ້ປະຊາຊົນທີ່ປະສົບໄພ ພິບັດ ທີ່ພັກອາໄສຢູ່ 5 ສູນພັກຊົ່ວຄາວ ໃນຄັ້ງນີ້ ແມ່ນປະຕິບັດຕາມແຈ້ງການຂອງຫ້ອງວ່າການສຳນັກ ງານນາຍົກລັດຖະມົນຕີ ແລະ ຂໍ້ຕົກລົງເຫັນດີຂອງກະຊວງ ຮສສ ເພື່ອມອບວັດຖຸສົມທົບປຸກສ້າງ ເປັນຕົ້ນແມ່ນ ສັງກະສີ 37,92 ພັນແຜ່ນ, ເຫຼັກຕະປູຕອກສັງກະສີ 5,47 ພັນກັບ ແລະ ເຫຼັກຕະປູຕອກໄມ້ 5,95 ພັນກິໂລ ລວມມູນຄ່າ 1,29 ຕື້ກີບ ໃຫ້ແກ່ປະຊາຊົນທີ່ປະສົບໄພພິບັດ ເພື່ອນຳໄປຕໍ່ເຕີມເຮັດເທີບມຸງເຮືອນ,



ຊຶ່ງໄພພິບັດທີ່ເກີດຂຶ້ນມາຮອດປະຈຸບັນເກືອບເປັນເວລາໜຶ່ງປີແລ້ວ, ຍາມໃດພັກ ແລະລັດຖະ ບານ ກໍໄດ້ໃຫ້ຄວາມສຳຄັນ ແລະຖືເປັນບູລິມະສິດໜຶ່ງ ໃນການເບິ່ງແຍງຊີວິດການເປັນຢູ່ຂອງປະຊາຊົນຜູ້ປະສົບໄພພິບັດຕະຫຼອດມາ, ໃນນາມກະຊວງ ຮສສ ທີ່ເຮັດໜ້າທີ່ ບົດບາດໃຫ້ການຊ່ວຍເຫຼືອສົງເຄາະ ແມ່ນຝາກວຽກດັ່ງກ່າວນີ້ ໃຫ້ກັບແຂວງ ໂດຍສະເພາະ ຂະແໜງການ ຮສສ ໃຫ້ສືບຕໍ່ເຮັດໜ້າທີ່ຂອງຕົນໃຫ້ປະສົບຜົນສຳເລັດກ້າວໄປເລື້ອຍໆ ຈາກປະສົບການ ແລະການເຮັດວຽກຕົວຈິງຢູ່ຂັ້ນທ້ອງຖິ່ນ, ດັ່ງນັ້ນ ຈຶ່ງເຊື່ອແນ່ວ່າ ການຊ່ວຍເຫຼືອວັດຖຸສົມທົບໃນເທື່ອນີ້ ຈະມີປະໂຫຍດສູງສຸດ ສຳລັບການແກ້ໄຂຊີວິດການເປັນຢູ່ຂອງປະຊາຊົນ ໃຫ້ນັບມື້ດີຂຶ້ນເທື່ອລະກ້າວ.



ພ້ອມດຽວກັນນັ້ນ ກະຊວງ ຮສສ ໃນນາມປະທານຄະນະກຳມະການຄຸ້ມຄອງໄພພິບັດແຫ່ງຊາດ ແມ່ນຈະພະຍາ ຍາມຂົນຂວາຍຊອກປຫຼ່ງທຶນທັງພາຍໃນ ແລະຕ່າງປະເທດ ເພື່ອນຳມາພັດທະນາຊີວິດການເປັນຢູ່ຂອງປະຊາຊົນທີ່ປະສົບໄພພິບັດໃຫ້ກ້າວເຂົາສູ່ສະພາບປົກກະຕິໂດຍໄວ, ທ່ານນາງ ໃບຄຳ ຂັດທິຍະ ກ່າວຢ້ຳຕື່ມ.








ຂ່າວ ຮສສ: ເພັດສະໄໝ


------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
Twitter ID: @tholakhong
tholakhong@gmail.com | www.tholakhong.com




Post a Comment

0 Comments