ສກຂ ຫຼວງພະບາງ ຕີລາຄາຄືນວຽກງານຊາວໜຸ່ມ ພ້ອມຍ້ອງຍໍຜູ້ດີເດັ່ນໄລຍະ 2015-2019



ຫຼວງພະບາງ: ພະແນກສຶກສາທິການ ແລະ ກິລາແຂວງຫຼວງພະບາງໄດ້ຈັດກອງປະຊຸມໃຫ່ຍຄະນະບໍລິຫານງານຊາວໜຸ່ມພະແນກ ເພື່ອຕີລາຄາຄືນວຽກງາານທີ່ພົ້ນເດັ່ນ ພ້ອມທັງວາງທິດທາງແຜນການໃນຕໍ່ໜ້າ ສ້າງເປັນກຳລັງແຮງເຮັດໃຫ້ອົງການຈັດຕັ້ງຊາວໜຸ່ມກາຍເປັນແຫ່ງສິດຜົນປະໂຫຍດຂອງຊາວໜຸ່ມຢ່າງແທ້ຈິງ ພ້ອມທັງຍ້ອງຍໍຜູ້ທີ່ມີຜົນງານດີເດັ່ນໃນໄລຍະປີ2015-2019 ກອງປະຊຸມດັ່ງກ່າວໄດ້ຈັດຂື້ນ ເມື່ອວັນທີ 17 ພຶດສະພາ 2019 ຜ່ານມາ ທີ່ພະແນກດັ່ງກ່າວ ໂດຍເປັນກຽດເຂົ້າຮ່ວມຂອງສະຫາຍ ນາງແສງມະນີ ເພັດສະວົງ ຮອງເລຂາຄະນະບໍລິຫານງານຊາວໜຸ່ມແຂວງ, ສະຫາຍ ນາງບົວທອງ ຕັນແສນສີ ຄະນະພັກຮາກຖານ ຮອງຫົວໜ້າພະແນກສຶກສາທິການ ແລະ ກິລາແຂວງ, ມີ ສະຫາຍເລຂາ-ຮອງເລຂາຄະນະບໍລິຫານງານຊາວໜຸ່ມພະແນກສຶກສາທິການ ແລະ ກິລາແຂວງ,ຄະນະບໍລິຫານງານໂຮງຮຽນອ້ອມຂ້າງ,ໜ່ວຍງານ,ອົງການຈັດຕັ້ງມະຫາຊົນ ແລະ ສະມາຊິກເຂົ້າຮ່ວມຢ່າງພ້ອມພຽງ.



ໃນກອງປະຊຸມ ສະຫາຍ ປທ ຈັນທະລີ ອຸໄລສິດ ເລຂາຊາວໜຸ່ມພະແນກສຶກສາທິການ ແລະ ກິລາແຂວງໄດ້ຕີຄາລາຄືນການຈັດຕັ້ງປະຕິບັດແນວທາງ,ມະຕິກອງປະຊຸມໃຫຍ່ຄັ້ງທີ 4 ຂອງໜຸ່ມຊາວໜຸ່ມ ປະຊາຊົນ ປະຕິວັດລາວ (ປປລ) ພະແນກສຶກສາທິການ ແລະ ກິລາແຂວງໂດຍສະເພາະແມ່ນຍົກໃຫ້ເຫັນເຖິງ ດ້ານດີ,ດ້ານອ່ອນ ແລະ ຂໍ້ຄົງຄ້າງເຊີ່ງຈະໄດ້ສືບຕໍ່ປັບປຸງແກ້ໄຂໃນຕໍ່ໜ້າ,ຊອກໃຫ້ເຫັນສາເຫດຕ່າງໆ ແລະ ຖອດຖອນບົດຮຽນໃຫ້ແກ່ການນຳຂອງຕົນ ນອກນີ້ຍັງໄດ້ກຳນົດຄາດໝາຍສູ້ຊົນໃນຕໍ່ໜ້າເຊັ່ນ: ເພີ່ມທະວີການສຶກສາອົບຮົມການເມືອງແນວຄິດໃຫ້ຄະນະໜ່ວຍຊາວໜຸ່ມ ແລະ ສະມາຊິກໃຫ້ໄດ້ຫຼາຍກວ່າ 80%, ປັບປຸງກໍ່ສ້າງໜ່ວຍຊາວໜຸ່ມ ແລະ ສະມາຊິກໃຫ້ເຕີບໃຫຍ່,ໜັກ ແໜ້ນ,ເຂັ້ມແຂງສາມາດຂະຫຍາຍສະມາຊິກໜຸ່ມປະຊາຊົນປະຕິວັດລາວໃຫ້ໄດ້ 100% ຂອງຈຳນວວນສະມາຊິກທັງໝົດ,ປັບປຸງກໍ່ສ້າງສະມາຊິກໜຸ່ມປະຊາຊົນປະຕິວັດລາວຜູ້ທີ່ມີຜົນງານດີເດັ່ນ ເປັນແບບຢ່າງນຳໜ້າໃນການຈັດຕັ້ງປະຕິບັດວຽກງານຂອງຊາວໜຸ່ມໃຫ້ໄດ້ເຂົ້າເປັນສະມາຊິກພັກປະຊາຊົນປະຕິວັດລາວ 1-2 ສະຫບາຍ,ສ້າງຊາວໜຸ່ມຕົວແບບ ແລະ ສະມາຊິກຊາວໜຸ່ມຕົວແບບຕາມເນື້ອໃນຂໍ້ແຂ່ງຂັນ 4 ບຸກຂອງຄະນະຊາວໜຸ່ມໃຫ້ໄດ້ 70%, ຕ້ານສະກັດກັ້ນປະກົດການຫຍໍ້ທໍ້ຕ່າງໆປົກປ້ອງສິດ ແລະ ຜົນປະໂຫຍດຂອງສະມາຊິກຢູ່ພາຍໃນໜ່ວຍຂອງຕົນ, ເພີ່ມທະວີການຮ່ວມມືທັງພາຍໃນ ແລະ ຕ່າງປະເທດເພື່ອນມິດຍຸດທະສາດໃຫ້ຫຼາຍຂື້ນ



ພ້ອມກັນນັ້ນໃນກອງປະຊຸມໄດ້ປະກອບຄຳຄິດຄຳເຫັນຢ່າງກົງໄປກົງມາ ແລະ ເປັນເອກະພາບຮັບຮອງເອົາບົດລາຍງານການເມືອງ ແລະ ທິດທາງແຜນການໃນຕໍ່ໜ້າ,ເຊີ່ງອົງການຈັດຕັ້ງໜ່ວຍຮາກຖານຊາວໜຸ່ມພະແນກສຶກສາທິການ ແລະ ກິລາແຂວງຫຼວງພະບາງປະກອບມີຄະນະບໍລິຫານງານ 4 ສະຫາຍ,ຍິງ 1 ສະຫາຍ,ແບ່ງອອກເປັນ 4 ຈຸ,ມີສະມາຊິກທັງໝົດ 47 ສະຫາຍ,ຍິງ 23 ສະຫາຍ, ພ້ອມດຽວກັນນີ້ ກອງປະຊຸມຍັງໄດ້ມີການຄັດເລືອກເອົາຄະນະບໍລິຫານງານໜ່ວຍຊາວໜຸ່ມຊຸດໃໝ່ ໂດຍເລືອກໄດ້ ສະຫາຍ ສະຫາຍ ປທ ຈັນທະລີ ອຸໄລສິດ ເປັນເລຂາ,ສະຫາຍ ນ້ອຍ ດວງຊີວັນ ເປັນຮອງ,ສະຫາຍ ນາງ ອຳໄພວັນ ສຸດາຈິດ ເປັນຄະນະ ແລະ ສະຫາຍ ບັນຊາ ສຸນາເຄນ ເປັນຄະນະ ທັງເປັນຜູ້ກວດກາ. ພ້ອມກັນນັ້ນ ຍັງໄດ້ມອບໃບຍ້ອງຍໍຂັ້ນແຂວງໃຫ້ແກ່ສະມາຊິກຜູ້ທີ່ໝົດອາຍຸກະສຽນຊາວໜຸ່ມຈຳນວນ 3 ສະຫາຍ,ຍິງ 3 ສະຫາຍ, ທີ່ປະກອບສ່ວນກຳລັງແຮງເຂົ້າໃນວຽກງານຊາວໜຸ່ມຕະຫຼອດໄລຍະຜ່ານມາ ແລະ ຍ້ອງຍໍຂັ້ນແຂວງໃຫ້ສະມາຊິກຊາວໜຸ່ມຮາກຖານພະແນກສຶກສາທິການ ແລະ ກິລາແຂວງທີ່ມີຜົນງານດີເດັ່ນໃນການເຄື່ອນໄຫວວຽກງານຊາວໜຸ່ມໄລຍະຜ່ານມາຈຳນວນ 44 ສະຫາຍ,ຍິງ 26 ສະຫາຍ.



ໂອກາດດັ່ງກ່າວ, ສະຫາຍ ນາງແສງມະນີ ເພັດສະວົງ ໄດ້ກ່າວສະແດງຄວາມຍ້ອງຍໍຊົມເຊີຍຕໍ່ກັບຜົນງານຫຼາຍໆດ້ານທີ່ໜ່ວຍຊາວໜຸ່ມດັ່ງກ່າວຍາດມາໄດ້ໃນໄລຍະຜ່ານມາ ພ້ອມທັງຮຽກຮ້ອງມາຍັງຄະນະ-ສະມາຊິກຊາວໜຸ່ມບັນດາເຜົ່າຈົ່ງເພີ່ມທະວີຄວາມເປັນປຶກແຜ່ນ,ສ້າງຄວາມເປັນເອກະພາບຢ່າງສູງ,ພາຍໃຕ້ການນຳພາຂອງພັກປະຊາຊົນປະຕິວັດລາວ,ພ້ອມກັນບຸກບືນ,ສຸມສະຕິປັນຍາກຳລັງເຫື່ອແຮງ,ເຊີດຊູນ້ຳໃຈເປັນເຈົ້າຕົນເອງ,ກຸ້ມຕົນເອງ,ເພີ່ງຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ,ຍົກສູງຄວາມຮັບຜິດຊອບການເມືອງຂອງຕົນເຂົ້າໃນການຈັດຕັ້ງພາລະກິດປົກປັກຮັກສາ ແລະ ສ້າງສາພັດທະນາປະເທດຊາດໃຫ້ຫຼຸດພົ້ນອອກຈາກຄວາມທຸກຍາກ,ຄວາມດ້ອຍພັດທະນາເວົ້າລວມ,ເວົ້າສະເພາະພັດທະນາໜ່ວຍຊາວໜຸ່ມໃຫ້ມີຄວາມມັ່ງຄັ່ງເຂັ້ມເເຂງຂື້ນໄປເທື່ອລະກ້າວ.

ໂດຍ: ແຈກກີ້ ສກຂ ຫຼວງພະບາງ.


------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
Twitter ID: @tholakhong
tholakhong@gmail.com | www.tholakhong.com


Post a Comment

0 Comments