ກົມສ້າງຄູສ້າງຄວາມເຂັ້ມແຂງໃຫ້ຄູປະຈຳການ 9 ແຂວງພາກເໜືອກ່ຽວກັບການນໍາໃຊ້ຫຼັກສູດຊັ້ນປະຖົມສຶກສາສະປັບປຸງໃໝ່ (ຮອບ 2)




ຫຼວງພະບາງ: ກົມສ້າງຄູກະຊວງສຶກສາທິການ ແລະ ກິລາ ໄດ້ຈັດກອງປະຊຸມແນະນຳ ແລະ ວາງແຜນການເຝິກອົບຮົມໃຫ້ຄູປະຈຳການ 9 ແຂວງພາກເໜືອກ່ຽວກັບການນໍາໃຊ້ຫຼັກສູດຊັ້ນປະຖົມສຶກສາສະປັບປຸງໃໝ່(ຮອບ 2) ເມື່ອວັນທີ 8 ພຶດສະພາ 2019 ຜ່ານມາທີ່ພະແນກສຶກສາທິການ ແລະ ກິລາແຂວງຫຼວງພະບາງໂດຍການໃຫ້ກຽດເຂົ້າຮ່ວມຂອງທ່ານ ຮສ ນາງວົງເດືອນ ໂອໃສ ຮອງຫົວໜ້າກົມສ້າງຄູກະຊວງສຶກສາທິການ ແລະ ກິລາ,ທ່ານ ນາງ ບົວທອງ ຕັນແສນສີ ຮອງຫົວໜ້າພະແນກສຶກສາທິການ ແລະ ກິລາແຂວງຫຼວງພະບາງ,ມີພະນັກງານ,ຄະນະຮັບຜິດຊອບ ແລະ ພາກສ່ວນກ່ຽວຂ້ອງຈາກ 9 ແຂວງພາກເໜືອງເຂົ້າຮ່ວມ.

ກອງປະຊຸມໄດ້ທົບທວນ ແລະ ຮັບຮອງເອົາແຜນເຝິກອົບຮົມ ແລະ ແຜນງານງົບປະມານຂອງພະແນກສຶກສາທິການ ແລະ ກິລາແຂວງ,ນຳສະເໜີ ແລະ ຮັບຮອງເອກະສານສັນຍາການໃຫ້ທຶນ ແລະ ໃບຂໍເບີກຈ່າຍ ລວມທັງຂັ້ນຕອນໃນການໃຫ້ທຶນຄຸ້ມຄອງດ້ານການເງິນ, ແນະນຳວິທີການສະຫຼຸບດ້ານກິດຈະກຳ ແລະ ການເງິນ,ການນຳໃຊ້ຮ່າງເອກະສານຕ່າງໆ ພ້ອມກັນນີ້ແຕ່ລະແຂວງໄດ້ນຳສະເໜີແນວທາງການແກ້ໄຂຈຸດຕ່າງໆທີ່ໄດ້ສົນທະນາໃນກອງປະຊຸມຮອບທີ 1 ກ່ຽວກັບການປະຕິບັດວຽກງານຕົວຈິງ,ນຳສະເໜີເຄື່ອງມືຕິດຕາມການເຝິກອົບຮົມ ແລະ ໜ້າວຽກຕິດຕາມຂອງພະແນກສຶກສາທິການ ແລະ ກິລາແຂວງ ແລະ ພາກສ່ວນຕ່າງໆ ນອກຈາກນີ້ກອງປະຊຸມຍັງໄດ້ພ້ອມກັນຄົ້ນຄວ້າ,ປະກອບຄຳຄິດຄຳເຫັນຢ່າງກົງໄປກົງມາ,ຊອກຫາວິທາທາງແກ້ໄຂໃນຕໍ່ໜ້າກ່ຽວກັບຄຳຖາມເຈາະຈີ້ມ, ສ່ວນສຳມະນາກອນທີ່ເຂົ້າຮ່ວມມາຈາກ 9 ແຂວງປະກອບມີ: ແຂວງວຽງຈັນ, ໄຊຍະບູລີ, ຫຼວງພະບາງ, ອຸດົມໄຊ, ບໍ່ແກ້ວ, ຫຼວງນ້ຳທາ, ຜົ້ງສາລີ, ຫົວພັນ ແລະ ຊຽງຂວາງ.



ໂອກາດດັ່ງກ່າວ, ທ່ານ ຮສ ນາງວົງເດືອນ ໂອໃສ ໄດ້ກ່າວສະແດງຄວາມຍ້ອງຍໍຊົມເຊີຍຕໍ່ຄະນະຮັບຜິດຊອບ ແລະ ຜູ້ແທນກອງປະຊຸມທີ່ໄດ້ພ້ອມກັນສະຫຼະເວລາໃນການປະກອບສ່ວນເຂົ້າຮ່ວມກອງປະຊຸມດ້ວຍຄວາມເປັນເຈົ້າການ ພ້ອມດຽວກັນນີ້ທ່ານຍັງໄດ້ຮຽກຮ້ອງ ແລະ ເນັ້ນໜັກຫຼາຍບັນຫາເປັນຕົ້ນໃຫ້ຄະນະຜິດຊອບ ແລະ ສຳມະນາກອນທຸກພາກສ່ວນຈົ່ງໄດ້ເອົາໃຈໃສ່ຍົກສູງຄວາມຮັບຜິດຊອບ,ປະກອບຄຳກິດຄຳເຫັນພ້ອມກັນຊອກຫາຂໍ້ຄົງຄ້າງບັນຫາສິ່ງທ້າທ້າຍທີ່ຈະຕ້ອງໄດ້ແກ້ໄຂໃນຕໍ່ໜ້າ ແລະ ເຮັດສຳເລັດຕາມໜ້າທີ່ການມອບໝາຍຂອງຂັ້ນເທິງ,ພ້ອມກັນນຳເອົາຜົນສຳເລັດມາສູ່ກອງປະຊຸມໃຫ້ບັນລຸຕາມຄາດໆາຍທີ່ວາງໄວ້.

ສຳລັບກອງປະຊຸມຄັ້ງນີ້ແມ່ນໄດ້ດຳເນີນໄປເປັນເວລາ 3 ວັນ ລະຫວ່າງວັນທີ 8-10 ພຶດສະພາ 2019

ໂດຍ: ແຈັກກີ້ ສກຂ ຫຼວງພະບາງ.


------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
Twitter ID: @tholakhong
tholakhong@gmail.com | www.tholakhong.com


Post a Comment

0 Comments