ປີນີ້ແຂວງຈຳປາສັກ ຈະປູກໄມ້ໃຫ້ໄດ້ 950 ເຮັກຕາ


ຈໍາປາສັກ: ປີ 2019 ນີ້ ແຂວງຈຳປາສັກຈະປູກຕົ້ນໄມ້ໃຫ້ໄດ້ໃນເນື້ອທີ່ 950 ເຮັກຕາ ເພື່ອເປັນການຟື້ນຟູສະພາບແວດລ້ອມ, ປ່າໄມ້ ແລະ ສ້າງເງື່ອນໄຂໃຫ້ອັດຕາສ່ວນປົກຫຸ້ມປ່າໄມ້ກວມ 70%ໃນປີ 2020.



ທ່ານ ກັນຫາ ແກ້ວບົວລະພາ ຮອງຫົວໜ້າພະແນກກະສີກຳ ແລະ ປ່າໄມ້ແຂວງໃຫ້ສຳພາດວ່າ: ເພື່ອກະກຽມໃຫ້ແກ່ການປູກໄມ້ໃຫ້ໄດ້ຕາມຄາດໜາຍ 950 ເຮັກຕາໃນທົ່ວແຂວງ, ພະແນກກະສີກຳ ແລະ ປ່າໄມ້ແຂວງ, ຂະແໜງການທີ່ກ່ຽວຂ້ອງໄດ້ແບ່ງປັນຕົວເລກປູກຕົ້ນໄມ້ໃຫ້ນະຄອນ ແລະ ເມືອງຕ່າງໆປູກແລະບົວລະບັດຮັກສາຕາມຄວາມຮັບຜິດຊອບຂອງຕົນ ເຊັ່ນ: ນະຄອນປາກເຊປູກ 30 ເຮັກຕາ, ເມືອງ ບາຈຽງຈະເລີນສຸກ 125 ເຮັກຕາ, ເມືອງປາກຊ່ອງ 200 ເຮັກຕາ, ເມືອງປະທຸມພອນ 125 ເຮັກ, ເມືອງໂຂງ 100 ເຮັກຕາ, ເມືອງ ມຸນລະປະໂມກ 100 ເຮັກຕາ, ເມືອງຈຳປາສັກ 50 ເຮັກຕາ , ເມືອງຊະນະສົມບູນ 70 ເຮັກຕາ ແລະເມືອງໂພນທອງ 50 ເຮັກຕາ.



ມາຮອດປະຈຸບັນເພື່ອຮອງຮັບໃຫ້ແກ່ການປູກທາງສູນຜະລິດເບ້ຍໄມ້ໄດ້ຜະລິດເບ້ຍໄມ້ໄວ້ຮອງຮັບແລ້ວ 1 ລ້ານກວ່າເບ້ຍ ເປັນຕົ້ນແມ່ນ: ປະເພດໄມ້ອຸດສະຫະກຳເຊັ່ນ:ໄມ້ຂະຍຸງ, ໄມ້ດູລາຍ, ໄມ້ຈຳປາປ່າ ຈາກນີ້ກໍຍັງມີໄມ້ໃຫ້ໝາກ ແລະ ໄມ້ປະດັບອີກຈຳນວນໜື່ງ. ເພື່ອເຮັດໃຫ້ການປູກຕົ້ນໄມ້ປີນີ້ໄດ້ຕາມແຜນການ ແລະ ເຮັດໃຫ້ການສະເຫຼີມສະຫຼອງວັນປູກຕົ້ນໄມ້ແຫ່ງຊາດມີບັນຍາກາດຟົດຟື້ນ ທ່ານ ກັນຫາ ແກ້ວບົວລະພາ ຮອງຫົວໜ້າພະແນກກະສີກຳ ແລະ ປ່າໄມ້ແຂວງ ຍັງໄດ້ຮຽກຮ້ອງໃຫ້ຂະແໜງການກ່ຽວຂ້ອງຂອງແຂວງ, ເມືອງ, ພະນັກງານທະຫານຕຳຫຼວດ, ຕະຫຼອດຮອດປະຊາຊົນບັນດາເຜົ່າ ຈົ່ງເປັນເຈົ້າເຂົ້າຮ່ວມການປູກຕົ້ນໄມ້ ແລະ ເອົາໃຈໃສ່ບົວລະບັດຮັກສາຢ່າງຈິງຈັງ.

ຂ່າວ;ພາບ: ເກດສະໜາ ແກ້ວສຸວັນນະແສງ(ສວຈ)
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
Twitter ID: @tholakhong
tholakhong@gmail.com | www.tholakhong.com


Post a Comment

0 Comments