Header Ads

ກວດລົດເມສາຍເໜືອ ພົບລົດຈັກຖືກລັກກຽມສົ່ງຕ່າງແຂວງ, ສາມາດນໍາຄືນໃຫ້ເຈົ້າຂອງຊັບໄດ້



ນະຄອນຫຼວງວຽງຈັນ: ເຈົ້າໜ້າທີ່ພະແນກຕໍາຫຼວດຈະລາຈອນ ປກສ ນະຄອນຫຼວງວຽງຈັນ ປະຈໍາປ້ອມຄິວລົດສາຍເໜືອ ໄດ້ກວດກາລົດເມພົບລົດຈັກ 2 ຄັນ ທີ່ຖືກລັກກໍາລັງກຽມສົ່ງຕ່າງແຂວງ, ເຈົ້າໜ້າທີ່ໄດ້ສອບຖາມຜູ້ຂັບຂີ່ ບໍ່ຮູ້ຄົນຝາກ ແລະ ບໍ່ມີເອກະສານ ຈິ່ງກັກລົດທັງສອງຄັນໄວ້ສືບສວນ.

ພັທ ບຸນມາກ ສູນດາໄລ ຮອງຫົວໜ້າພະແນກຕໍາຫຼວດ ໃຫ້ຮູ້ວ່າ: ໃນຄັ້ງວັນທີ 28 ມີນາ 2019 ເຈົ້າໜ້າທີ່ຕໍາຫຼວດປະຈໍາປ້ອມຄິວລົດເມສາຍເໜືອ ໄດ້ກວດກາລົດເມທີ່ກໍາລັງເດີນທາງໄປເມືອງຂວາ-ເມືອງໃໝ່ ແຂວງຜົ້ງສາລີ ຜ່ານການກວດກາພົບລົດເມພົບເຫັນລົດເມຮອນດາ ຈໍານວນ 2 ຄັນ ບໍ່ມີປ້າຍທະບຽນ. ຈາກນັ້ນ, ໄດ້ສອບຖາມຜູ້ຂັບລົດຈິ່ງຮູ້ວ່າ ລົດທັງສອງຄັນມີຄົນຝາກໄປແຂວງອຸດົມໄຊ ບໍ່ຮູ້ຊື່ຄົນ ແລະ ບໍ່ມີເອກະສານລົດ ເຈົ້າໜ້າທີ່ຈິ່ງກັກລົດດັ່ງກ່າວໄວ້.

ຜ່ານການກວດກາກົງໂຕນຕົວຈິງລົດຮອນດາເວບ 100 ຄັນທີໜຶ່ງໝາຍເລກທະບຽນ ດບ 6906 ກໍາແພງນະຄອນ ເປັນລົດຂອງນາງ ໄກ່ ບ້ານສີເກີດ ເມືອງນາຊາຍທອງ ຖືກລັກຢູ່ເຮືອນໃນວັນທີ 21 ມີນາ 2019 ແລະ ຄັນທີສອງໝາຍເລກທະບຽນ ດພ 2346 ກໍາແພງນະຄອນ ເປັນລົດຂອງນາງ ຄໍາມະນີ ບ້ານໂພນປ່າເປົ້າ ເມືອງສີສັດຕະນາກ ຖືກລັກໃນວັນທີ 17 ມີນາ 2019 ຈອດໄວ້ຢູ່ບຶງທາດຫຼວງ.

ຕໍ່ມາ, ໃນຄັ້ງວັນທີ 16 ພຶດສະພາ 2019 ພະແນກຕໍາຫຼວດຈະລາຈອນໄດ້ມອບລົດທັງສອງຄັນ ໃຫ້ເຈົ້າຂອງເດີມ ໂດຍການມອບຂອງພັທ ບຸນມາກ ສູນດາໄລ ພ້ອມທັງຝາກເຕືອນມາຍັງພໍ່ແມ່ປະຊາຊົນໃຫ້ມີສະຕິລະວັງຕົວຮັກສາຊັບສິນ ໂດຍສະເພາະບັນຫາລົດຈັກເສຍແມ່ນມີທ່າອ່ຽງສູງ; ຕໍ່ກັບຜູ້ຂັບຂີ່ລົດເມ ເຈົ້າໜ້າທີ່ໄດ້ນໍາຕົວສຶກສາອົບຮົມໃຫ້ເຂົ້າໃຈຕໍ່ລະບຽບກົດໝາຍວາງອອກ ແລະ ຝາກເຕືອນໄປຍັງຜູ້ຂົນສົ່ງໂດຍສານທຸກຄົນ ໃນກໍລະນີມີການຝາກລົດ ຕ້ອງກວດກາຄວາມຖືກຕ້ອງທຸກຄັ້ງຈິ່ງຮັບຝາກ.

ຂ່າວ: ລັດດາວັນ
ໜັງສືພິມຄວາມສະຫງົບ

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
Twitter ID: @tholakhong
tholakhong@gmail.com | www.tholakhong.com


No comments

Powered by Blogger.