Header Ads

ເມືອງແກ້ວອຸດົມເປິດສອບເສັງຈົບຊັ້ນປະຖົມທົ່ວເມືອງ



ແຂວງວຽງຈັນ: ເພື່ອສ້າງຂະບວນການຄຳນັບຮັບຕ້ອນກອງປະຊຸມໃຫຍ່3ຂັ້ນຂອງເມືອງແກ້ວອຸດົມທີ່ຈະມາເຖີງນີ້. ໃນວັນທີ 28-29 ພຶດສະພາ 2019 ນີ້ເມືອງແກ້ວອຸດົມໄດ້ຈັດພິທີການສອບເສັງຈົບຊັ້ນປະຖົມປໍ 05 ທົ່ວເມືອງຂື້ນຢູ່ທີ່ສູນສອບເສັງໂຮງຮຽນປະຖົມພູເຂົາຄຳເມືອງແກ້ວອຸດົມ. ໂດຍເປັນກຽດເຂົ້າຮ່ວມຂອງ ທ່ານ ບົວວັນ ແກ້ວວິໄລທອງ ຄະນະປະຈຳພັກເມືອງປະທານກວດກາພັກ-ລັດເມືອງແກ້ວອຸດົມ,ມີທ່ານຄຳປານຄຳມຸງຄຸນກຳມະການພັກເມືອງຫົວໝ້າຫ້ອງການສຶກສາທິການແລະກິລາເມືອງແກ້ວອຸດົມ,ມີອຳນາດການປົກຄອງບ້ານ,ຄູອາຈານພ້ອມດ້ວຍນ້ອງນັກຮຽນເຂົ້າຮ່ວມສອບເສັງ300 ກ່ວານ້ອງ.



ໃນພິທີທ່ານ ນາງ ທອງດີ ແສງມະນີວົງ ຫົວໝ້າໝ່ວຍງານສຶກສາກ່ອນໄວຮຽນ ແລະ ການສຶກສາຂັ້ນພື້ນຖານຫ້ອງການສຶກສາທິການ-ກິລາເມືອງແກ້ວອຸດົມໄດ້ຂື້ນຜ່ານບົດສະຫຼຸບການສອບເສັງຈົບຊັ້ນປະຖົມປໍ 05 ທົ່ວເມືອງແກ້ວອຸດົມໃນສົກຮຽນ 2018 ຫາ 2019 ໄດ້ໃຫ້ຮູ້ວ່າການສອບເສັງຈົບຊັ້ນປະຖົມສົກຮຽນ 2018 ຫາ 2019 ໃນຄັ້ງນີ້ມີໂຮງຮຽນຊັ້ນປະຖົມສົມບຸນເຂົ້າຮ່ວມສອບເສັງທັງໝົດ 18 ແຫ່ງ,ມູນລະປະຖົມ 03 ແຫ່ງໂດຍໄດ້ຈັດຕັ້ງສູນການສອບເສັງຂື້ນ 03 ແຫ່ງຄືສູນສອບເສັງໂຮງຮຽນດອນໄຊອຸດົມ, ສູນສອບເສັງໂຮງຮຽນບ້ານໃໝ່ ແລະ ສູນສອບເສັງໂຮງຮຽນປະຖົມພູເຂົາຄຳ,ມີນັກຮຽນເຂົ້າຫ້ອງສອບເສັງທັງໝົດ 300 ກ່ວາຄົນ,ຍີງ 148 ຄົນ,ມີ 12 ຫ້ອງສອບເສັງ,ມີ 04 ວິຊາສອບເສັງຄືວິຊາພາສາລາວ-ວັນນະຄະດີ,ວິຊາຄະນິດສາດ,ວິຊາຂຽນທວາຍ-ຄຳຖາມ ແລະ ວິຊາໂລກອ້ອມຕົວ,



ໃນນັ້ນມີຄະນະຮັບຜິດຊອບລວມຈຳນວນ 06 ທ່ານ,ມີຄະນະຮັບຜິດຊອບສູນສອບເສັງຈຳນວນ 05 ທ່ານ,ມີກຳມະການອອກຫົວບົດຈຳນວນ 04 ທ່ານ,ກຳມະການກວດບົດ 16 ທ່ານ,ກຳມະການຍາມຫ້ອງສອບເສັງ 24 ທ່ານ,ກອງເລຂາພີມຄອມແລະຊ່ອຍວຽກ 03 ທ່ານ,ມີຄະນະຮັບຜິດຊອບຫົວບົດສອບເສັງ 02 ທ່ານ,ກຳມະການເຂົ້າຄະແນນ 04 ທ່ານ ແລະ ຄະນະກວດກາ 01 ທ່ານ,ສຳລັບການກວດບົດແມ່ນລວມສູນຢູ່ທີ່ຫ້ອງການສຶກສາທິການ-ກິລາເມືອງແກ້ວອຸດົມໃນວັນທີ 30 ພຶດສະພາ 2019 ນີ້.

ໃນພິທີດັ່ງກ່າວຍັງໄດ້ມອບທືນການສຶກສາໃຫ້ແກ່ນັກຮຽນເກັ່ງ ແລະ ຄູອາຈານທີ່ສອນເກັ່ງ. ໃນຕອນທ້າຍພິທິຍັງໄດ້ຮັບຟັງການໂອ້ລົມຂອງທ່ານ ບົວວັນ ແກ້ວວິໄລທອງ ປະທານກວດກາພັກ-ລັດເມືອງແກ້ວອຸດົມອີກດ້ວຍ.

ຂ່າວ: ສຸກັນ


------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
Twitter ID: @tholakhong
tholakhong@gmail.com | www.tholakhong.com


No comments

Powered by Blogger.