Header Ads

ສັກຢາປ້ອງກັນພະຍາດແຫ່ງຊາດ ຕ້ານການລະບາດຂອງພະຍາດ ໝາກແດງໃຫຍ່ ແລະ ໝາກແດງນ້ອຍ ທີ່ເມືອງທົ່ງມີໄຊ



ເມືອງທົ່ງມີໄຊ ແຂວງໄຊຍະບູລີ ຈັດພິທີເປິດຂະບວນການວັນສັກຢາປ້ອງກັນພະຍາດແຫ່ງຊາດ ຕ້ານການລະບາດຂອງພະຍາດ ໝາກແດງໃຫຍ່ ແລະ ໝາກແດງນ້ອຍ

ພິທີດັ່ງກ່າວນີ້ ໄດ້ໄຂຂຶ້ນຢ່າງເປັນທາງການ ໃນຕອນເຊົ້າຂອງວັນທີ່ 4 ພຶດສະພາ 2019 ຢູ່ທີຫໍປະຊຸມຂອງບ້ານແຄ່ນ ເມືອງທົ່ງມີໄຊແຂວງໄຊຍະບູລີ, ໂດຍການເຂົ້າຮ່ວມຂອງທ່ານ ອາລຸນສັກ ລິນທະວົງ ຮອງເລຂາຄະນະບໍລິຫານງານພັກເມືອງ ຮອງເຈົ້າເມືອງໆທົ່ງມີໄຊ ມີບັນດາຄະນະກຳມະການຮັກສາສຸຂະພາບຂັ້ນເມືອງ, ພະນັກງານວິີຊາການຂອງຫ້ອງການສາທາລະນະສຸກເມືອງ, ອຳນາດການປົກຄອງບ້ານ, ຕະຫຼອດຮອດປະຊາຊົນ ແລະ ເດັກນ້ອຍໃນເກນອາຍຸ 6ເດືອນຫາລຸ່ມ 10ປີເຂົ້າຮ່ວມຢ່າງພ້ອມພຽງ.




ໃນໂອກາດນີ້ທ່ານຮອງເຈົ້າເມືອງກໍ່ໄດ້ໃຫ້ກຽດຂຶ້ນກ່າວເປີດພິທີເຊິ່ງທ່ານໄດ້ກ່າວວ່າ: ເມືອງທົ່ງມີໄຊເປັນເມືອງໜື່ງທີ່ໄດ້ສຸມໃສ່ 10 ຕົວຊີ້ວັດ, ພັດທະຍາວຽກງານສາທາລະນະສຸກໃຫ້ບັນລຸຕາມຄາດໝາຍ ໂດຍສະເພາະແມ່ນຄາດໝາຍສັກຢາ ແລະ ຢອດຢາກັນພະຍາດໃຫ້ແກ່ເດັກເປົ້າໝາຍ. 


ໃນນີ້ ພະຍາດໝາກແດງແມ່ນພະຍາດໜື່ງທີ່ເປັນອັນຕະລາຍຮ້າຍແຮງເຊິ່ງຕິດຕໍ່ລະຫວ່າງຄົນກັບຄົນ ດ້ວຍການສຳພັດ, ໄອ, ຈາມ, ຫຼືໃຊ້ວັດຖຸສິ່ງຂອງຮ່ວມກັນເປັນຕົ້ນແມ່ນເຄື່ອງນຸ່ງຮົ່ມ, ເສື້ອ, ຜ້າ, ຄົນທີ່ເປັນພະຍາດນີ້ແມ່ນມີອາການໄຂ້ຮຸນແຮງ, ໄອ, ນ້ຳມູກຍ້ອຍ, ຕາແດງ ແລະ ອອກຕຸ່ມທົ່ວຕົນຕົວພາຍໃນ 3-5ວັນ ຖ້າບໍ່ໄດ້ຮັບການປິ່ນປົວຈະເຮັດໃຫ້ມີອາການຄື: ປອດບວມ, ຖ້ອກທ້ອງຢ່າງຮຸນແຮງ ແລະ ຈະພາໃຫ້ເສຍຊີວິດຢ່າງໄວວາ ພະຍາດນີ້ມັກເກີດນຳເດັກນ້ອຍຊ່ວງອາຍຸ 6ເດືອນຫາລຸ່ມ 10ປີ.




ການຈັດຕັ້ງວັນສັກຢາກັນພະຍາດຊາດເພື່ອກໍຳຈັດພະຍາດໝາກແດງໃຫຍ່, ໝາກແດງນ້ອຍນີ້ ເມືອງທົ່ງມີໄຊໄດ້ຈັດຂຶ້ນ ເປັນຄັ້ງທີ5 ເຊິ່ງຈະໄດ້ເລີ່ມແຕ່ວັນທີ 4-2 ພຶດສາະພາ 2019ໃຫ້ສຳເລັດກຸ່ມເປົ້າໝາຍ. ການສັກຢາຮອບພິເສດໃນຄັ້ງນີ້ ແມ່ນມີຄວາມໝາຍ, ຄວາມສຳຄັນເປັນຢ່າງຍິ່ງ, ທັງເປັນການແກ້ບັນຫາສຳລັບກຸ່ມເປົ້າໝາຍທີ່ບໍ່ທັນໄດ້ສັກຢາຄົບ, ບາງເປົ້າໝາຍພາດໂອກາດ, ສະນັັ້ນໃນການລົງເຄື່ອນໄຫວສັກຢາໃນຄັ້ງນີ້ ທີມງານສັກຢາກັນພະຍາດຈະໄດ້ລົງເຖິງອົງການປົກຄອງບ້ານ ແລະ ປະຊາຊົນທຸກໆບ້ານໃນທົ່ວເມືອງ ໂດຍສະເພາະແມ່ນໂຮງຮຽນ ແລະ ຈະມີຄະນະກຳມະການຕິດຕາມກວດກາໄປພ້ອມ.




ໃນໂອກາດດຽວກັນນີ້ທ່ານ ຮອງເຈົ້າເມືອງ ຍັງໄດ້ຮຽກຮ້ອງໃຫ້ທຸກພາກສ່ວນຈົ່ງໃຫ້ຄວາມຮ່ວມມື, ອຳນວຍຄວາມສະດວກໃຫ້ແກ່ແພດໝໍ ແລະ ມີຄວາມຕື່ນຕົວ ນຳເອົາລູກຫຼານໃນເກນອາຍຸ ມາສັກຢາໃຫ້ໄດ້ຕາມຄາດໝາຍທີ່ວາງໄວ. ຈາກນັ້ນ ໃນຕອນທ້າຍຂອງພິທີ ບັນດາຄະນະກຳມະການຮັກສາສຸຂະພາບຂັ້ນເມືອງກໍ່ໄດ້ຮ່ວມຢອດຢາປ້ອງກັນການລະບາດຂອງພະຍາດໃຫ້ກັບເດັກນ້ອຍໃນກຸ່ມເປົ້າໝາຍນຳອີກ.

ຂ່າວ: ມິກລະຄອນ ຄຳມຸນທາ


------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
Twitter ID: @tholakhong
tholakhong@gmail.com | www.tholakhong.com


No comments

Powered by Blogger.