Header Ads

ກອງບັນຊາການທະຫານແຂວງຫວງພະບາງຕ້ອນຮັບປະທານກົງສູນໃຫຍ່ ສ.ປ ຈີນຜູ້ໃໝ່ປະຈໍາພາກເໜຶອ





ກອງບັນຊາການທະຫານແຂວງຫວງພະບາງຕ້ອນຮັບປະທານກົງສູນໃຫຍ່ ສ.ປ ຈີນຜູ້ໃໝ່ປະຈໍາພາກເໜຶອ


     ໃນຕອນບ່າຍຂອງວັນທີ 7 ພຶດສະພາ 2019 ນີ້, ຢູ່ທີ່ຫ້ອງຮັບແຂກຂອງກອງບັນຊາການທະຫານແຂວງຫຼວງພະບາງ, ທ່ານ ພົນຈັດຕະວາ ຄຳຫລ້າ ວົງວິໄລ, ກຳມະການຄະນະພັກແຂວງ, ຫົວໜ້າການທະຫານກອງບັນຊາການທະຫານແຂວງ ແລະ ທ່ານ ພົນຈັດຕະວາ ບຸນຊູ ດວງຄຳມີ, ຄະນະປະຈໍາພັກແຂວງ, ຫົວໜ້າການເມືອງກອງບັນຊາການທະຫານແຂວງ ໄດ້ຕ້ອນຮັບການເຂົ້າພົບປະຢ້ຽມຢາມຂອງ ທ່ານ ລີ ຈື ກົງ, ໃນໂອກາດທີ່ມາດຳລົງຕຳແໜ່ງ ເປັນປະທານກົງສູນໃຫຍ່ ສປ ຈີນ ຜູ້ໃໝ່ ປະຈໍາພາກເໜືອແຂວງຫຼວງພະບາງ. 


ໃນໂອກາດນີ້, ທັງສອງທ່ານໄດ້ພົບປະແລກປ່ຽນຄວາມຄິດເຫັນກ່ຽວກັບສະພາບຈຸດພິເສດ, ທີຕັ້ງ, ພາລະບົດບາດ, ສິດ ແລະ ໜ້າທີ່ຂອງຕົນໃຫ້ແກ່ກັນ ແລະ ກັນຮັບຊາບ ໂດຍຫຍໍ້, ພ້ອມທັງໄດ້ທົບທວນຫວນຄືນມູນເຊື້ອການພົວພັນຮ່ວມມືລາວ - ຈີນ ທີ່ເຄີຍມີມາແຕ່ດົນນານ ໃນຄວາມສຳພັນຮັກແພງແບ່ງປັນໃນໄລຍະປາງສົງຄາມໃນເມື່ອກ່ອນ, ເຊິ່ງໃນບາງເຂດຕອນເໜຶອຂອງລາວຍັງຄົງມີຮອງຮອຍປະຫວັດສາດ ແລະ ອານຸສອນນັກຮົບນິລະນາມຈາລຶກໄວ້, ດັ່ງເຊັ່ນຢູ່ແຂວງຫຼວງນໍ້າທາ, ບໍ່ແກ້ວ, ອຸດົມໄຊ ແລະ ບ່ອນອື່ນຕື່ມອີກ ໃນການຮ່ວມສໍາພັນສູ້ຮົບ ແລະ ການຊ່ວຍເຫຼຶອດ້ານເຕັກນິກພາຫະນະສົງຄາມ, ການສືສານ ແລະ ຊ່າງແສງຕ່າງໆ.


 ທ່ານ ພົນຈັດຕະວາ ຄໍາຫລ້າ ວົງວິໄລ ຍັງໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ການມາຢ້ຽມຢາມຂອງ ທ່ານ ລີ ຈື ກົງ ພ້ອມດ້ວຍຄະນະໃນຄັ້ງນີ້, ພ້ອມທັງ ສະແດງຄວາມຂອບໃຈມາຍັງລັດຖະບານ ສປ ຈີນ ກໍໍ່ຄື ກອງທັບປົດປ່ອຍປະຊາຊົນຈີນ ທີ່ຜ່ານມາໄດ້ໃຫ້ການຮ່ວມມື ແລະ ຊ່ວຍເຫຼຶອລາວໃນຫຼາຍດ້ານ, ເປັນຕົນແມ່ນດ້ານເສດຖະກິດ, ວັດທະນະທໍາ ແລະ ສັງຄົມ. ທ່ານ ລີຈື ກົງ ຍັງໄດ້ສະແດງຄວາມດີອົກດີໃຈຕໍ່ການຕ້ອນຮັບອັນອົບອຸ່ນໃນຄັ້ງນີ້, ພ້ອມທັງສະແດງຄວາມເຊື່ອໝັ້ນວ່າ: ຈະປະກອບສ່ວນອັນສໍາຄັນເຂົ້າໃນການເສີມສ້າງຂະຫຍາຍສາຍພົວພັນມິດຕະພາບອັນດີງາມ ແລະ ການຮວ່ມມື ລະຫວ່າງສອງຊາດ, ສອງກອງທັບ ກໍ່ຄື ກອງບັນຊາການທະຫານແຂວງຫຼວງພະບາງ ແລະ ກົງສູນໃຫຍ່ ສປ ຈີນ ປະຈໍາພາກເໜືອ ສປປ ລາວ ໃຫ້ຕ່າງຝ່າຍຕ່າງໄດ້ຮັບຜົນປະໂຫຍດ, ບົນຫຼັກການປະຕິບັດຕາມແນວທາງການຮ່ວມມື ແລະ ຄູ່ເຈລະຈາທີ່ດີຕໍ່ກັນ ໃນການປະສານສົມທົບກັບຂັ້ນເທິງຂອງຕົນ ໃນຮ່ວມມືຊ່ວຍເຫຼຶອດ້ານເສດຖະກິດ, ວັດທະນະທໍາ - ສັງຄົມ ແລະ ອື່ນໆ ໃຫ້ນັບມື້ແຕກດອກອອກຜົນຍິ່ງໆຂື້ນໃນຕໍ່ໜ້າ.


 ໂດຍ: ວັນນະແສງ ຄຸນທະຈັກ

No comments

Powered by Blogger.