Header Ads

ສະຫະລັດອາເມລິກາເລື່ອນເວລາການແບນ Huawei ຈາກ Google ອອກໄປຊົ່ວຄາວເປັນເວລາ 90 ມື້


ສະຫະລັດອາເມລິກາເລື່ອນເວລາການແບນ Huawei ຈາກ Google ອອກໄປຊົ່ວຄາວເປັນເວລາ 90 ມື້
———
ຫຼັງຈາກທີ່ລັດຖະບານສະຫະລັດອາເມລິກາໄດ້ແບນ Huawei ຈາກການເຮັດການຄ້າກັບບໍລິສັດອາເມລິກາໄປບໍ່ເທົ່າໃດມື້ກ່ອນໜ້ານີ້, ປະກົດວ່າຜົນກະທົບນັ້ນເກີດເປັນວົງກວ້າງແລະ ກາຍເປັນເລື່ອງໃຫຍ່ໃນໂລກໂຊຊຽວ.

ຫຼ້າສຸດກະຊວງການຄ້າຂອງສະຫະລັດອາເມລິກາໄດ້ຕັດສິນໃຈຍົກເລີກຄຳສັ່ງຫ້າມທຸລະກິດໃນສະຫະລັດອາເມລິກາຮ່ວມງານກັບບໍລິສັດຫົວເຫວີຍຊົ່ວຄາວເປັນເວລາ 90 ມື້, ໂດຍອະນຸຍາດໃຫ້ຜູ້ໃຊ້ງານສາມາດອັບເດດຊອບແວໄດ້ປົກກະຕິ ແລະ ຫົວເຫວີຍສາມາດຊື້ສິນຄ້າຈາກບໍລິສັດໃນອາເມລິກາໄດ້ເພື່ອນໍາໄປໃຊ້ໃນການດູແລຮັກສາລະບົບເຄືອຂ່າຍ ແລະ ການອັບເດດສະມາດໂຟນ, ຫົວເຫວີຍສາມາດໃຊ້ລະບົບແອນດອຍໄດ້ຄືເກົ່າຈົນເຖິງເວລາກຳນົດ ເຊິ່ງຈະເຮັດໃຫ້ຫົວເຫວີຍມີເວລາກຽມພ້ອມເພື່ອສະມາດໂຟນລຸ້ນໃໝ່ ແລະພັດທະນາລະບົບ Android Q ເພື່ອອັບເດດສຳລັບສະມາດໂຟນລຸ້ນປັດຈຸບັນ.

ເມື່ອຫຼັງຈາກກາຍເວລາ 90ມື້ໄປແລ້ວ ແລະ ທາງສະຫະລັດອາເມລິກາອອກກົດໝາຍມາຮຽບຮ້ອຍແລ້ວ ທຸກການຊື້ຂາຍທີ່ບໍລິສັດໃນສະຫະລັດອາເມລິກາຈະເຮັດການຄ້າກັບ Huawei ຫຼື ບໍລິສັດອື່ນໆທີ່ຖືກແບນຄືກັນຈະຕ້ອງມີການເຮັດໜັງສື ແລະ ຂໍອະນຸຍາດກັບທາງສະຫະລັດອາເມລິກາກ່ອນເທົ່ານັ້ນຈຶ່ງຈະເຮັດການຄ້າໄດ້.

ເຖິງຢ່າງໃດກໍ່ຕາມ ທ່ານ ຣິຊາດ ຢູ ປະທານຝ່າຍຜະລິດຕະພັນເພື່ອຜູ້ບໍລິໂພກຂອງບໍລິສັດຫົວເຫວີຍ ໃຫ້ສຳພາດ Die Welt ສື່ໃຫຍ່ຂອງເຢຍລະມັນວ່າ “ບໍລິສັດແມ່ນມີລະບົບປະຕິບັດການສໍາຮອງໄວ້ໃຊ້ແລ້ວສຳລັບກໍລະນີສຸກເສີນ ຖ້າຫາກວ່າຖືກປິດກັ້ນຈາກອາເມລິກາແລ້ວນັ້ນເປັນແຜນສຳຮອງຂອງພວກເຮົາ ແຕ່ແນ່ນອນວ່າຖ້າເປັນໄປໄດ້ພວກເຮົາກໍ່ຢາກຮ່ວມງານກັບລະບົບນິເວດຂອງ Google ແລະ ໄມໂຄຣຊອບຫຼາຍກວ່າ.” ນອກນັ້ນກໍ່ຍັງກ່າວວ່າກຳລັງພັດທະນາຊິບສຳລັບໃຊ້ງານກັບສະມາດໂຟນຂອງບໍລິສັດເອງໃນອະນາຄົດ.

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
Twitter ID: @tholakhong
tholakhong@gmail.com | www.tholakhong.com


No comments

Powered by Blogger.