Header Ads

ຜົນສຳເລັດກອງປະຊຸມໃຫຍ່ຄັ້ງທີ IV ຂອງຜູ້ແທນຊາວໜຸ່ມປະຊາຊົນປະຕິວັດລາວ ເມືອງທົ່ງມີໄຊ



ແຂວງໄຊຍະບູລີ: ກອງປະຊຸມດັ່ງກ່າວນີ້ໄດ້ໄຂຂຶ້ນຢ່າງເປັນທາງການໃນລະຫວ່າງວັນທີ 10-11 ພຶດສະພາ 2019 ຢູ່ທີ່ສະໂມສອນຂອງເມືອງ ໂດຍການເປັນປະທານ ຂອງສະຫາຍ ນາງ ບົວຊອນ ສຸກພົງ ກຳມະການພັກເມືອງ ເລຂາຄະນະບໍລິຫານງານຊາວໜຸ່ມເມືອງທົ່ງມີໄຊ,  ເປັນກຽດເຂົ້າຮ່ວມຂອງ ສະຫາຍ ສົມພອນ ໄຊດວງຕາ ກຳມະການພັກແຂວງ ເລຂາຄະນະບໍລິຫານງານພັກເມືອງ ເຈົ້າເມືອງໆທົ່ງມີໄຊ, ມີສະຫາຍ ໜູໄຊ ນໍກີຢາ ເລຂາຄະນະບໍລິຫານງານຊາວໜຸ່ມແຂວງໄຊຍະບູລີ


ກອງປະຊົມໄດ້ ມີບັນດາຄະນະປະຈຳພັກເມືອງ, ກຳມະການພັກເມືອງ, ຫົວໜ້າຫ້ອງການ, ຄະນະບໍລິຫານງານ ຊາວໜຸ່ມເມືອງອອ້ມຂ້າງ, ແຂກຖືກເຊີນ, ຕະຫຼອດຮອດຄະນະບໍລິຫານງານຊາວໜຸ່ມພາຍໃນເມືອງ ທີ່ຕາງໜ້າໃຫ້ສະມາຊິກຊາວໜຸ່ມໃນທົ່ວເມືອງເຂົ້າຮ່ວມຢ່າງພ້ອມພຽງ. ກອງປະຊຸມໃຫຍ່ໄດ້ພ້ອມກັນຄົ້ນຄວ້າ ປະ ກອບຄຳຄິດຄຳເຫັນໃສ່ຮ່າງລາຍງານການເມືອງ ແລະ ບົດສຳລວດການນຳພາລວມຂອງຄະນະບໍລິຫານງານຊາວໜຸ່ມປະຊາຊົນປະຕິວັດລາວຊຸດທີ III ໄດ້ເປັນເອກະພາບກັນຕີລາຄາດ້ານດີ, ດ້ານອອ່ນ, ຂໍ້ຄົງ ຄ້າງ, ສາເຫດ ແລະ ບົດຮຽນໃນການຊີ້ນຳ-ນຳພາຈັດຕັັ້ງປະຕິບັດມະຕິກອງປະຊຸມໃຫຍ່ 5 ປີ ຜ່ານມາແຕ່ປີ 2014-2019 ແລະ ກໍານົດທິດທາງໜ້າທີ່ການພັດທະນາຊາວໜຸ່ມ-ເຍົາວະຊົນ ແຕ່ປີ 2019-2023




ເຊິ່ງຄະນະຊາວໜຸ່ມປະຊາຊົນປະຕິວັດລາວເມືອງທົ່ງມີໄຊເປັນອົງການຈັດຕັ້ງມະຫາຊົນໜື່ງ ໃນລະບົບການເມືອງ ຂອງລະບອບປະຊາທິປະໄຕປະຊາຊົນ ຢູ່ຂັ້ນທ້ອງຖິ່ນພາຍໃຕ້ການຊີ້ນຳ-ນຳພາຂອງອົງຄະນະພັກເມືອງ. ເຊິ່ງໃນໄລຍະຜ່ານມາ ຄະນະຊາວໜຸ່ມແຕ່ລະຂັ້ນຢູ່ພາຍໃນເມືອງແມ່ນໄດ້ຍຶດໝັ້ນທັດສະນະຂອງພັກ ຖືເອົາການສຶກສາອົບຮົມການເມືອງ-ແນວຄິດເປັນກົກ ແນໃສ່ເຮັດໃຫ້ຊາວໜຸ່ມເຍົາວະຊົນໄດ້ຮັບຮູ້ເຊື່ອມຊືມແນວທາງນະໂຍບາຍຂອງພັກ ມະຕິ, ຄຳສັ່ງຂອງຂັ້ນເທິງໄປຈັດຕັ້ງເຜີຍແຜ່ເຊື່ອມຊືມໃຫ້ພະນັກງານ, ສະມາຊິກຊາວໜຸ່ມ, ເຍົາວະຊົນ, ໃນທົ່ວເມືອງໄດ້ຮັບຮູ້ ແລະ ເຂົ້າໃຈຢ່າງທົ່ວເຖິງ, ເຊິ່ງສະແດງອອກໃນ 5 ປີຜ່ານມາ ໄດ້ສ້າງຕັ້ງຄະນະຊາວໜຸ່ມຮາກຖານໄດ້ 1ຮາກຖານ, ຂະຫຍາຍໜ່ວຍຊາວໜຸ່ມໄດ້ 11ໜ່ວຍ,


ປະຈຸບັນທົ່ວເມືອງມີໜ່ວຍຊາວໜຸ່ມທັງໝົດ 51ໜ່ວຍ, ສ້າງຕັ້ງກອງອາສາສະໝັກຊາວໜຸ່ມຕະລຸມບອນໄດ້ 1ກອງ, ມີສະມາຊິກ 236ຄົນ, ຍິງ 141ຄົນ. ທົ່ວເມືອງມີເກນອາຍຸ 15-35ປີ ຈໍານວນ 2.123ຄົນ, ຍິງ 1.079ຄົນ, ເຂົ້າເປັນສະມາຊິກຊາວໜຸ່ມ ມີ 1.043 ສະຫາຍ, ຍິງ 491 ສະຫາຍ, ຂະຫຍາຍສະມາຊິກຊາວໜຸ່ມໄດ້ 651ສະຫາຍ, ຍິງ315ສະຫາຍ. ທຽບໃສ່ກອງປະຊຸມໃຫຍ່ຄັ້ງທີ 3 ເພີ່ມຂຶ້ນ 77ສະຫາຍ, ຍິງ 28ສະຫາຍ. ພ້ອມນີ້ກໍ່ຍັງໄດ້ຮັບການຍ້ອງຍໍສັນລະເສີນຈາກຄະນະພັກ, ອົງການປົກຄອງຂັ້ນຕ່າງໆມີຄື: ໄດ້ຮັບຫຼຽນກາແຮງງານມີ 11 ສະຫາຍ, ຮັບໃບຍ້ອງຍໍລັດຖະບານ 57 ສະຫາຍ, ຮັບໃບຍ້ອງຍໍຂັ້ນສູນກາງ 85ສະຫາຍ, ຮັບໃບຍ້ອງຍໍຂັ້ນແຂວງ 134ສະຫາຍ ແລະ ຮັບໃບຍ້ອງຍໍຂັ້ນເມືອງ 163ສະຫາຍ.



ພ້ອມກັນນັ້ນກໍ່ຍັງໄດ້ຝຶກຝົນຄຸນສົມບັດ ສິນທໍາປະຕິວັດ ໃຫ້ເຍົາວະຊົນ, ອານຸຊົນ ຕາມເນື້ອໃນຄຳສອນ 6ຮັກ 3ຊັງ, ຂໍ້ແຂ່ງຂັນ 3ດີ 4ຮູ້, ຮ່ຳຮຽນກົດລະບຽບຂອງເຍົາວະຊົນ-ອານຸຊົນທັນວາ, ໄດ້ເປີດຂະບວນການແຂ່ງຂັນ 3ດີ 4ຮູ້ໃນທົ່ວເມືອງສຳເລັດ.ພ້ອມທັງປະເມີນຜົນໃນແຕ່ລະປີ. ໄດ້ມີການຈັດຕັ້ງປະຕິບັດຂໍ້ແຂ່ງຂັນຮັກຊາດ ແລະ ພັດທະນາໃຫ້ກາຍເປັນຂະບວນການຟົດຟື້ນ ເຊິ່ງໄດ້ນຳເອົາຂໍ້ແຂ່ງຂັນ 4ບຸກ ລົງໂຄສະນາເຜີຍແຜ່ ແລະ ເປີດຂະບວນການແຂ່ງຂັນຢູ່ຂັ້ນໜ່ວຍໃນທົ່ວເມືອງສໍາເລັດຮ້ອຍສ່ວນຮ້ອຍ.


ຜ່ານການປະເມີນເຫັນວ່າໄດ້ມີສະມາຊິກຊາວໜຸ່ມໄດ້ປະເພດແຂງ ຈຳນວນ 891ສະຫາຍ, ຍິງ 424ສະຫາຍ, ປະເພດກາງ 89ສະຫາຍ, ຍິງ 33ສະຫາຍ, ບໍ່ໄດ້ແບ່ງ 63ສະຫາຍ, ຍິງ 34ສະຫາຍ. ປະເພດໜ່ວຍໄດ້ປະເພດແຂງ 51ໜ່ວຍ, ໄດ້ຮັບໃບຢັ້ງຢືນໜ່ວຍຊາວໜຸ່ມ 4ບຸກແລ້ວ 48ໜ່ວຍ ເທົ່າກັບ 94,11ສ່ວນຮ້ອຍ ແລະ ໄດ້ປະກາດເປັນເມືອງ ຄະນະຊາວໜຸ່ມປະຊາຊົນປະຕິວັດລາວ 4ບຸກ ໃນປີ 2015.


ນອກຈາກນີ້ຜູ້ແທນກອງປະຊຸມໄດ້ພ້ອມກັນໃຊ້ສິດປະຊາທິປະໄຕຂອງຕົນບ່ອນບັດຄັດເລືອກເອົາຄະນະບໍລິຫານງານຊາວໜຸ່ມປະຊາ ຊົນປະຕິວັດລາວ ຊຸດໃໝ່, ບົນພື້ນຖານຄວາມຖືກຕ້ອງ, ສອດຄ່ອງກັບມາດຖານເງື່ອນໄຂທີ່ກຳນົດໄວ້, ເຊິ່ງມີຜູ້ອອກຮັບສະໝັກເລືອກຕັ້ງທັງໝົດ 17ສະຫາຍ, ຍິງ 4ສະຫາຍ ແລະ ເລືອກຕັ້ງເອົາ 15ສະຫາຍ, ຍິງ 3ສະຫາຍ.

ກອງປະຊຸມຄັ້ງປະຖົມມະລຶກໄດ້ເປັນເອກະພາບກັນຢ່າງສູງເລືອກຕັ້ງເອົາ ສະຫາຍ ນາງ ບົວຊອນ ສຸກພົງ ເປັນເລຂາຄະນະບໍລິຫານງານຊາວໜຸ່ມ, ສະຫາຍ ແກ່ນ ອິນກອນ ເປັນຮອງເລຂາ, ສະຫາຍ ສົມບັດ ທິບມະໂນຈັນ ເປັນຮອງເລຂາ ກອງປະຊຸມຍັງໄດ້ເປັນເອກະພາບກັນເລືອກຕັ້ງເອົາສະຫາຍ ແກ່ນ ອິນກອນ ເປັນປະທານກວດກາ ຄະນະບໍລິຫານງານຊາວໜຸ່ມປະຊາຊົນປະຕິວັດລາວ, ສະຫາຍ ພັຕ ຄຳຝັ້ນ ສຸກສະຫວັດ ເປັນຮອງປະທານ ແລະ ສະຫາຍ ນາງ ວານ ເພຍປະຫຼັດ ເປັນຄະນະ. ພ້ອມດຽວກັນນີ້ຜູ້ແທນກອງປະຊຸມຍັງໄດ້ປ່ອນບັດຄັດເລືອກເອົາ ຜູ້ແທນສົມບູນຈຳນວນ 5ສະຫາຍ, ຍິງ 2 ສະຫາຍ ແລະ ຜູ້ແທນສໍາຮອງ 2ສະຫາຍ  ເພື່ອໄປຮ່ວມກອງປະຊຸມໃຫຍ່ຄັ້ງທີ7 ຂອງຄະນະຊາວໜຸ່ມປະຊາຊົນປະຕິວັດລາວ ແຂວງໄຊຍະບູລີ ທີ່ຈະໄດ້ຈັດຂຶ້ນໃນຕໍ່ໜ້າ. ເພື່ອເຮັດໃຫ້ກອງປະຊຸມດັ່ງກ່າວນີ້ມີຄວາມໝາຍສຳຄັນ ທັງເປັນບ່ອນອີງໃຫ້ແກ່ຄະນະບໍລິຫານງານຊາວໜຸ່ມຊົນປະຕິວັດລາວຊຸດໃໝ່ ນຳໄປຈັດຕັ້ງປະຕິບັດໃຫ້ເກີດດອກອອກຜົນນັ້ນ ໃນຕອນທ້າຍກໍ່ຍັງໄດ້ຮັບຟັງຄຳໂອ້ລົມຈາກ ສະຫາຍ ສົມພອນ ໄຊດວງຕາ ກຳມະການພັກແຂວງ ເລຂາຄະນະບໍລິຫານງານພັກເມືອງ ເຈົ້າເມືອງໆທົ່ງມີໄຊນຳອີກ.

ຂ່າວ: ມິກລະຄອນ ຄຳມຸນທາ



------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
Twitter ID: @tholakhong
tholakhong@gmail.com | www.tholakhong.com


No comments

Powered by Blogger.