ກອງປະຊຸມເຜີຍແຜ່ - ເຊື່ອມຊຶມກົດໝາຍ, ວ່າດ້ວຍສະຫະພັນນັກຮົບເກົ່າລາວ ທີ່ເມືອງຊະນະຄາມ



ແຂວງວຽງຈັນ: ໃນຕອນເຊົ້າວັນທີ 23 ພຶດສະພາ 2019 ຜ່ານມາ, ຢູ່ທີ່ສະໂມສອນເມືອງຊະນະຄາມ ແຂວງວຽງຈັນ ໄດ້ຈັດພິທີເຜີຍແຜ່ ແລະ ເຊື່ອມຊຶມກົດໝາຍວ່າດ້ວຍ: ສະຫະພັນນັກຮົບເກົ່າຂຶ້ນ,ໃນພິທີໄດ້ເປັນກຽດຕ້ອນຮັບການເຂົ້າຮ່ວມເປັນປະທານຂອງ ທ່ານ ພັນເອກ ບຸນຍົງ ວົງສີຈັນ ຄະນະບໍລິຫານງານສະຫະພັນນັກຮົບເກົ່າແຫ່ງຊາດລາວ ປະທານສະຫະພັນນັກຮົບເກົ່າແຂວງວຽງຈັນ, ມີບັນດາທ່ານໃນຄະນະປະຈໍາພັກເມືອງ, ກໍາມະການພັກເມືອງ, ຫົວໜ້າຫ້ອງການ, ພະນັກງານນັກຮົບປະຕິວັດອາວຸໂສ, ພະນັກງານລັດຖະກອນອ້ອມຂ້າງ, ລັດວິສະຫະກິດ, ອົງການປົກຄອງບ້ານເຂົ້າຮ່ວມ ຢ່າງພ້ອມພຽງ.



ໂດຍປະຕິບັດຕາມ ມະຕິຕົກລົງຂອງຄະນະປະຈໍາພັກແຂວງວຽງຈັນ, ສະບັບເລກທີ085/ຄປພ.ຂຈ, ລົງວັນທີ 06 ພຶດສະພາ 2019, ແຈ້ງການຂອງຫ້ອງວ່າການປົກຄອງແຂວງວຽງຈັນ, ສະບັບເລກທີ 441/ຫວຂ.ວຈ, ລົງວັນທີ 06 ພຶດ ສະພາ 2019,ວ່າດ້ວຍ: ການອະນຸມັດໃຫ້ສະຫະພັນນັກຮົບເກົ່າແຂວງວຽງຈັນ ຈັດຕັ້ງເຄື່ອນໄຫວການເຜີຍແຜ່ - ເຊື່ອມຊຶມກົດໝາຍສະຫະພັນນັກຮົບເກົ່າລາວ; ໃນວາລະກອງປະຊຸມ ທ່ານ ພັນເອກ ບຸນຍົງ ວົງສີຈັນ ໄດ້ໃຫ້ກຽດຂຶ້ນຜ່ານ ກົດໝາຍວ່າດ້ວຍສະຫະພັນນັກຮົບເກົ່າລາວ ສະບັບເລກທີ 42/ສພຊ, ລົງວັນທີ 13 ມິຖຸນາ 2018, ລວມມີ 10 ພາກ, 59 ມາດຕາ,



ເຊິ່ງກົດໝາຍສະບັບດັ່ງກ່າວໄດ້ກໍານົດຫຼັກການ, ລະບຽບການ ແລະ ມາດຕະການກ່ຽວກັບການຈັດຕັ້ງ, ການເຄື່ອນໄຫວ, ການຄຸ້ມຄອງ ແລະ ຕິດຕາມກວດກາວຽກງານສະຫະພັນນັກຮົບເກົ່າລາວ, ເພື່ອຮັບປະກັນການປະຕິບັດຕາມພາລະບົດບາດ, ສິດ ແລະ ໜ້າທີ່, ເຮັດໃຫ້ສະຫະພັນນັກຮົບເກົ່າຂັ້ນຕ່າງໆໄດ້ມີຄວາມໜັກແໜ້ນທາງດ້ານການເມືອງ, ທັນສະໄໝ, ມີຄວາມເຂັ້ມແຂງທາງດ້ານການຈັດຕັ້ງ, ມີແບບແຜນໃນການເຄື່ອນໄຫວທີ່ດີ, ສາມາດສຶກສາອົບຮົມ ແລະ ປຸກລະດົມເຕົ້າໂຮມຄວາມສາມັກຄີເປັນປຶກແຜ່ນ, ເສີມຂະຫຍາຍມູນເຊື້ອປະຕິວັດ, ປົກປ້ອງສິດຜົນປະໂຫຍດອັນຊອບທໍາຂອງສະມາຊິກ ແລະ ຂອງປະຊາຊົນລາວບັນດາເຜົ່າ, ປະກອບສ່ວນເຂົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດໃຫ້ມີຄວາມຈະເລີນ ແລະ ວັດທະນະຖາວອນ.



ຈຸດປະສົງ ຂອງໃນການເຜີຍແຜ່-ເຊື່ອມຊຶມໃນຄັ້ງນີ້ ກໍ່ເພື່ອສ້າງຄວາມຮັບຮູ້ ແລະ ເຂົ້າໃຈຢ່າງກວ້າງຂວາງທວງປວງຊົນ, ທັງຍົກໃຫ້ເຫັນຜົນງານອັນຍິ່ງໃຫຍ່ຂອງພັກ -ລັດ ໃນການຄົ້ນຄວ້າ-ຮັບຮອງ ແລະ ປະກາດໃຊ້ບັນດາກົດໝາຍຕ່າງໆ ອັນໄດ້ສ້າງຄວາມເຂັ້ມແຂງ ແລະ ໜັກແໜ້ນທາງດ້ານການເມືອງ, ເວົ້າລວມ-ເວົ້າສະເພາະຢູ່ພາຍໃນເມືອງຊະນະຄາມ ໃນການສ້າງຂະບວນການ ເພື່ອຂໍານັບຮັບຕ້ອນກອງປະຊຸມໃຫຍ່ 3 ຂັ້ນຂອງພັກໃຫ້ມີບັນຍາກາດຟົດຟື້ນ ແລະ ກວ້າງຂວາງ.

ຂ່າວ: ສະຫຼິງ



------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
Twitter ID: @tholakhong
tholakhong@gmail.com | www.tholakhong.com


Post a Comment

0 Comments