ຮອງປະທານອົງການກວດກາລັດຖະບານ ພົບປະໂອ້ລົມການນຳເມືອງນອງ


ສະຫວັນນະເຂດ: ໃນວັນທີ 23 ພຶດສະພາ 2019 ຢູ່ທີ່ຫ້ອງປະຊຸມ ຫ້ອງວ່າການປົກຄອງເມືອງນອງ ແຂວງສະຫວັນນະເຂດ ໄດ້ຕ້ອນຮັບ ທ່ານ ໄຊຄຳ ອຸ່ນມີໄຊ ຮອງປະທານກວດກາລັດຖະບານ ຫົວໜ້າສະເພາະກິດສູນກາງ ພ້ອມທິມງານ ແລະທິມງານທີ່ມາຈາກແຂວງ ໄດ້ລົງມາພົບປະໂອ້ລົມ ພະນັກງານການນຳຫຼັກແຫຼ່ງເມືອງນອງ ໂດຍສະເພາະແມ່ນວຽກງານ ການປະຕິບັດຄຳສັ່ງ ເລກທີ 15/ນຍ. ແລະໃຫ້ກຽດຕ້ອນຮັບຈາກ ທ່ານ ປອ ສຸພາພອນ ນັນທະນາວອນ ກຳມະ ການພັກແຂວງ ເລຂາພັກເມືອງ ເຈົ້າເມືອງໆນອງ, ມີຄະນະປະຈຳພັກເມືອງ, ກຳມະການພັກເມືອງ,ຫົວໜ້າຫ້ອງການ, ຈຸດສຸມ, ກຸ່ມບ້ານເຂົ້າຮ່ວມ.

ທ່ານ ປອ ສຸພາພອນ ນັນທະນາວອນ ເຈົ້າເມືອງໆນອງ ກໍ່ໄດ້ລາຍງານສະພາບລວມຂອງເມືອງໃຫ້ຮູ້ວ່າ: ເມືອງນອງເປັນເມືອງໜຶ່ງທີ່ນອງຢູ່ໃນ 23 ເມືອງທີ່ທຸກຍາກໃນທົ່ວປະເທດ ເປັນເມືອງພູດອຍ ຕັ້ງຢູ່ພາກຕາເວັນອອກຂອງແຂວງ, ຫ່າງຈາກແຂວງປະມານ 265 ກິໂລແມັດ, ທິດຕາເວັນອອກຕິດກັບເມືອງເຮືອງຮວ້າ ສສຫວຽດນາມ, ມີເນື້ອທີ່ທັງໝົດ 1.824ກິໂລຕາແມັດ, ປະກອບມີ 69 ບ້ານ, ມີ1ຈຸດສຸມຂອງສູນກາງ, 1ຈຸສຸມຂອງແຂວງ ແລະ 2ຈຸດສຸມຂອງເມືອງ, ມີ9ກຸ່ມບ້ານ, ມີ7 ຊົນເຜົ່າ, ມີ 6.177 ຄອບຄົວ, ມີ 5.045 ຫຼັງຄາເຮືອນ,ພົນລະເມືອງ 31.476 ຄົນ, ຍິງ 15.819 ຄົນ.




ຈາກນັ້ນກໍ່ໄດ້ລາຍງານສະພາບການຈັດຕັ້ງປະຕິບັດ ໜ້າວຽກທີກ່ຽວຂ້ອງຄື: ວຽກງານຂຸດຄົ້ນໄມ້ເຄື່ອງປ່າຂອງດົງອອກຈາກອ່າງເກັບນ້ຳເຂື່ອນໄຟຟ້າເຊລະນອງ 1 ເຂດເມືອງນອງ ແລະເມືອງພີນ ໂດຍປະຕິບັດຕາມຂໍ້ຕົກລົງ ຂອງທ່ານເຈົ້າແຂວງສະຫວັນນະເຂດ ເລກທີ 2711/ຈຂ.ສຂ,ລົງວັນທີ 30 ພະຈິກ 2018 ວ່າດ້ວຍການແຕ່ງຕັ້ງຄະນະຮັບຜິດ ຊອບຄຸ້ມຄອງ ການຂຸດຄົ້ນໄມ້ອອກຈາກອ່າງເກັບນ້ຳເຊລະນອງ1 ແລະໄດ້ແບ່ງອອກເປັນ 5 ເຂດຍ່ອຍຄື: ເຂດຄຸ້ມຄອງທີ 1 ແມ່ນນອນຢູ່ໃນເຂດຄຸ້ມຄອງ ບ້ານ ລະກາຍ ເມືອງພີນ ແລະສ່ວນໜຶ່ງຂອງບ້ານ ລະເບົານ້ຳ ເມືອງນອງ ໃນເນື້ອທີ່ 568 ເຮັກຕາ,ເຂດທີ 2 ແມ່ນເຂດຄຸ້ມຄອງບ້ານ ລະເບົານ້ຳ ເມືອງນອງ ມີເນື້ອທີ່ 485 ເຮັກຕາ, ເຂດ 3 ນອນຢູ່ໃນເຂດຄຸ້ມຄອງ ບ້ານ ລະເບົານ້ຳ ໃນເນື້ອທີ່ 456 ເຮັກຕາ,ເຂດ 4 ແມ່ນເຂດຄຸ້ມຄອງ ບ້ານ ລ໋ອຍນ້ຳ ແລະ ບ້ານ ລະເບົານ້ຳ ໃນເນື້ອທີ່ 493 ເຮັກຕາ ແລະເຂດ 5 ແມ່ນເຂດຄຸ້ມຄອງ ບ້ານ ລ໋ອຍນ້ຳ, ບ້ານ ລະເບົານ້ຳ ແລະ ບ້ານ ແກ້ງລີ້ນ



ເມືອງນອງ ມີເນື້ອທີ່ 491 ເຮັກຕາ ຕາມເຂດແບ່ງປັນໃນແຜນທີ່ ຜ່ານການຈັດຕັ້ງປະຕິບັດຂຸດຄົ້ນໄມ້ໃນ5 ເຂດ ດັ່ງກ່າວປັດຈຸບັນແມ່ນໄດ້ເຄື່ອນຍ້າຍອອກສູ່ ສະໜາມ 2 ບ້ານ ລະກາຍ ເມືອງພີນ ອີກຈຳນວນໜຶ່ງແມ່ນໄດ້ສືບຕໍ່ວັດແທກຈັດຊັ້ນໄມ້ຄຸນນະພາບໄມ້.ນອກຈາກນັ້ນກໍ່ຍັງໄດ້ແຕ່ງຕັ້ງພະນັກງານຈາກແຂວງ ແລະເມືອງເພື່ອລົງຕິດຕາມ ການຂຸດຄົ້ນໄມ້ ຂອງແຕ່ລະບໍລິສັດ, ແຕ່ລະໂຮງງານ,ຢ່າງລະອຽດ ແລະໃຫ້ຖືກຕ້ອງຕາມຄວາມເປັນຈິງ.

ໂອກາດດຽວກັນນັ້ນກໍ່ໄດ້ຮັບຟັງການໂອ້ລົມຂອງ ທ່ານ ໄຊຄຳ ອຸ່ນມີໄຊ ຫົວໜ້າສະ ເພາະກິດ ກໍ່ໄດ້ເນັ້ນໜັກໃຫ້ ພະນັກງານການນຳ ຈົ່ງປະຕິບັດຄຳສັ່ງ ເລກທີ 15/ນຍ.ຖ້າຫາກບຸກຄົນໃດຫາກມີການຝ່າຜືນແມ່ນຈະໄດ້ລົງລະບຽບວິໄນຕາມລະບຽບການ, ໃຫ້ຢຸດເຊົາການຕັດໄມ້ທຳລາຍປ່າ, ຢຸດການລ່າເນື້ອ, ເພາະສັດສາວາສິ່ງຕ່າງໆອາໃສພູຜາປ່າໄມ້ ຫ້ວຍນ້ຳລຳທານເປັນທີ່ເພິ່ງລວມທັງມະນຸດເຮົາແລະທ່ານກໍ່ໄດ້ນຳເອົາວຽກງານຜົນສຳເລັດຕ່າງໆມາເຜີຍແຜ່ໃຫ້ພະນັກ ງານການນຳຫຼັກແຫຼ່ງເມືອງນອງໄດ້ເຂົ້າໃຈ ແລະນຳເອົາເນື້ອໃນຈິດໃຈໄປສືບຕໍ່ຜັນຂະຫຍາຍໃຫ້ເກີດດອກອອກຜົນ.
ພາບ - ຂ່າວ: ຄຳນ້ອຍ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
Twitter ID: @tholakhong
tholakhong@gmail.com | www.tholakhong.com


Post a Comment

0 Comments