Header Ads

ຮອງປະທານປະເທດ ຊົມເຊີຍຜົນງານ ຂອງນັກເຕະສາວ U15


ພະນະທ່ານ ພັນຄຳ ວິພາວັນ ກຳມະການກົມການເມືອງສູນກາງພັກ, ຮອງປະທານປະເທດແຫ່ງ ສປປ ລາວ

ສະແດງຄວາມຍ້ອງຍໍຊົມເຊີຍ ຂຸນພົນນັກກິລາເຕະບານເຍົາວະຊົນສາວທີມຊາດລາວ ໃນຮຸ່ນອາຍຸບໍ່ເກີນ 15 ປີ ຫຼື ຢູ-15 ລາວ ຢ່າງສຸດອົກສຸດໃຈ ໃນໂອກາດທີ່ທຸກຄົນໄດ້ສ້າງກຽດຊື່ສຽງ ແລະ ສັກສີໃຫ້ແກ່ປະເທດຊາດ ໃນການແຂ່ງຂັນເຕະ ບານຍິງ ຊີງແຊ໋ມອາຊຽນ ຮຸ່ນອາຍຸບໍ່ເກີນ 15 ປີ ຫລື AFF U15 GIRLS’ CHAMPIONSHIP 2019 ທີ່ແຂວງຊົນບູຣີ ປະເທດໄທ.

ເມື່ອວັນທີ 24 ພຶດສະພາ ຜ່ານມາ ທີ່ສຳນັກງານປະເທດປະເທດແຫ່ງ ສປປ ລາວ ເມືອງຈັນທະບູລີ ນະຄອນຫຼວງວຽງຈັນ ໄດ້ມີພິທີມອບ-ຮັບເງິນໂບນັດຈຳນວນ 83 ລ້ານກີບ ຈາກລັດຖະບານລາວ ໃຫ້ແກ່ນັກກິລາສາວທີມຊາດລາວ ໃນຮຸ່ນອາຍຸ 15 ປີ ໂດຍຕາງໜ້າກ່າວມອບຂອງທ່ານ ບົວລານ ສິລິປັນຍາ ຮອງລັດຖະມົນຕີ ກະຊວງສຶກສາທິການ ແລະ ກິລາ (ສສກ) ແລະ ຕາງໜ້າຮັບແມ່ນທ່ານ ນາງ ພອນທິບ ແສງມະນີ ຫົວໜ້າຄູຝຶກ ຢູ-15 ສາວລາວ ໃຫ້ກຽດເຂົ້າຮ່ວມເປັນສັກຂີພິຍານຂອງພະນະທ່ານ ພັນຄຳ ວິພາວັນ ກຳມະການກົມການເມືອງສູນກາງພັກ, ຮອງປະທານປະເທດແຫ່ງ ສປປ ລາວ



ພະນະທ່ານ ພັນຄຳ ວິພາວັນ ກໍ່ໄດ້ຂໍສະແດງຄວາມດີໃຈເປັນຢ່າງສູງ ແລະ ຍ້ອງຍໍຊົມເຊີຍຢ່າງສຸດອົກສຸດໃຈມາຍັງຄະນະຄູຝຶກ ແລະ ນັກກິລາ ຢຸ-15 ສາວລາວໝົດທຸກຄົນ ທີ່ສາມາດສ້າງຜົນງານໃນຄັ້ງນີ້ ເປັນກຽດຊື່ສຽງ ແລະ ສັກສີໃຫ້ແກ່ປະເທດຊາດ ເຖິງວ່າພວກເຮົາຫາກໍເລີ່ມສ້າງຕັ້ງທີມຂຶ້ນມາໃໝ່ກໍຕາມ ແຕ່ກໍຍັງສາມາດສ້າງຜົນສຳເລັດໄດ້ລະດັບສູງ ກໍຖືວ່າສຸດຍອດທີ່ສຸດ ຜົນສຳເລັດນີ້ ໄດ້ມາ ກໍຍ້ອນເປັນຄວາມພະຍາຍາມ ແລະ ຕັ້ງໃຈສູງຂອງຄະນະນຳກະຊວງ ສສກ, ຄອລ, ຄະນະບໍລິຫານງານ ສຕລ ສຳຄັນທີ່ສຸດແມ່ນຄູຝຶກ ແລະ ນັກກິລາ ທີ່ມີຄວາມພະຍາຍາມເສຍສະຫຼະທັງເຫື່ອແຮງ ແລະ ສະຕິປັນຍາເຮັດໃຫ້ຂະບວນການແຂ່ງຂັນດຳເນີນໄປດ້ວຍດີຢ່າງມີຜົນສຳເລັດທີ່ໜ້າພາກພູມໃຈ ອີກດ້ານໜຶ່ງເຖິງວ່າພວກເຮົາຈະມີຄວາມຫຍຸ້ງຍາກຫຼາຍດ້ານຂອງທີມ ໂດຍສະເພາະນັກກິລາກໍລ້ວນແຕ່ເປັນນັກຮຽນ ສະນັ້ນ ການຮຽນຕ້ອງໄດ້ຄັດສົນກັບການຝຶກຊ້ອມກິລາເຕະບານ ສິ່ງສຳຄັນກໍຕົກຢູ່ໃນຄວາມເປັນຫວງຂອງພໍ່ແມ່ຜູ້ປົກຄອງ ແລະ ຫຍຸ້ງຍາກທາງດ້ານທືນຮອນ ແຕ່ກໍສາມາດຜ່ານຜ່າອຸປະສັກມາໄດ້. ແຕ່ເຖິງຢ່າງໃດກໍດີ, ຮຽກຮ້ອງມາຍັງກະຊວງ ສສກ ຈົ່ງພ້ອມກັນຕິດຕາມ ແລະ ເບິ່ງຄືນກ່ຽວກັບການຈັດຕັ້ງການຮຽນການສອນໃຫ້ນັກກິລາທຸກຄົນ ໂດຍສະເພາະການຈັດການສອບເສັງໃຫ້ເຂົາແບບພິເສດ ຢ່າໃຫ້ມີຜົນກະທົບຕໍ່ນັກກິລາ ເພື່ອໃຫ້ເຂົາເຈົ້າມີກຳລັງໃຈ ແລະ ສືບຕໍ່ຝຶກຝົນຕົນເອງເພື່ອກ້າວພາລະກິດຜົນສຳເລັດໃນຂັ້ນຕໍ່ໄປ.



ໃນພິທີດັ່ງກ່າວ ກໍໄດ້ມີພິທີມອບ-ຮັບເງິນໂບນັດຈາກລັດຖະບານ ເພື່ອຊຸກຍູ້ນ້ຳໃຈໃຫ້ນັກກິລາ ຢູ-15 ສາວລາວ ຈຳນວນ 83 ລ້ານກີບ, ເງິນອັດສີດຈາກ ສຕລ 80 ລ້ານກີບ ແລະ ເງິນຊຸກຍູ້ນ້ຳໃຈຈາກບໍລິສັດ ແສງເພັດ ເກັບກູ້ລະເບີດ ຈຳກັດ ຈຳນວນ 20 ລ້ານກີບ.

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
Twitter ID: @tholakhong
tholakhong@gmail.com | www.tholakhong.com


No comments

Powered by Blogger.