Header Ads

ຊາວສະຫວັນນະເຂດສະຫຼອງວັນບໍລິຈາກເລືອດໂລກ 14/6/19


ເພື່ອຜັນຂະຫຍາຍບົດບັນທຶກຄວາມເຂົ້າໃຈ ລະຫວ່າງອົງການກາແດງລາວ ແລະ ສູນກາງຊາວໜຸ່ມປະຊາຊົນປະຕິວັດລາວ ໃນປີຜ່ານມາໃຫ້ປະກົດຜົນເປັນຈິງນັ້ນ, ໃນວັນທີ 14 ມີຖຸນາ 2019 ນີ້ ສູນເລືອດແຂວງຮ່ວມກັບສູນກາງຊາວໜຸ່ມແຂວງໄດ້ຈັດກິດຈະກຳຮັບບໍລິຈາກເລືອດແບບເປີດກວ້າງພາຍໃຕ້ຄຳຂັວນ “ເລືອດປອດໄພເພື່ອທຸກຄົນ"ຂຶ້ນທີ່ສະໂມສອນກິລາຫຼັກສີ່ແຂວງສະຫວັນນະເຂດ, ໂດຍການເຂົ້າຮ່ວມເປັນປະທານຂອງທ່ານຄຳຮຸ່ງ ເຮືອງວົງສີ ປະທານອົງການກາແດງລາວ, ທ່ານຄຳພູນ ຕຸໄພທູນ ຮອງເຈົ້າແຂວງ, ປະທານກາແດງແຂວງສະຫວັນນະເຂດ, ຕາງໜ້າຈາກສູນເລືອດແຫ່ງຊາດ, ກາແດງແຂວງ, ຈາກຊາວໜຸ່ມແຂວງ, ພະແນກການອ້ອມຂ້າງ, ນັກຮຽນນັກສຶກສາ, ທະຫານ,ຕຳຫຼວດ ເຂົ້າຮ່ວມທັງໝົດເກືອບ700 ຄົນ.

ວັນທີ 14 ມີຖຸນາຂອງທຸກໆປີເປັນວັນສະເຫຼີມສະຫຼອງວັນບໍລິຈາກເລືອດໂລກ ໃນປະເທດຕ່າງໆໃນທົ່ວໂລກ ແລະ ເພື່ອເປັນການຂອບໃຈຕໍ່ຜູ້ບໍລິຈາກເລືອດຢູ່ທົ່ວໂລກເວົ້າລວມເວົ້າສະເພາະກໍແມ່ນຢູ່ ສປປ ລາວຂອງພວກເຮົາກໍໄດ້ຈັດຕັ້ງຢູ່ບັນດາແຂວງຕ່າງໆຂຶ້ນເພື່ອເປັນການຂອບໃຈທີ່ເຂົາເຈົ້າເຫຼົ່ານັ້ນໄດ້ມອບຂອງຂັວນທີ່ມີຄ່າຕໍ່ຊີວິດ ນັ້ນກໍຄື:ເລືອດນັ້ນເອງ ເພື່ອນຳເລືອດໄປຊ່ວຍເຫຼືອຄົນເຈັບທີ່ມີຄວາມຕ້ອງການໃສ່ເລືອດເພື່ອກອບກູ້ເອົາຊີວິດຂອງເຂົາເຈົ້າໃຫ້ກັບຄືນມາຢູ່ໃນອ້ອມອົກອັນອົບອຸ່ນຂອງຄອບຄົວ ແລະ ສັງຄົມອີກຄັ້ງ ໃນກິດຈະກຳໄດ້ດຳເນີນໄປເປັນເວລາເຄິ່ງວັນກໍໄດ້ສຳເລັດ ສາມາດໄດ້ເລືອດ 79.

ທ່ານ ຄຳຄູນ ຕຸໄພທູນ ມີຄຳເຫັນຕໍ່ກອງປະຊຸມວ່າແຂວງສະຫວັນນະເຂດເປັນແຂວງໜຶ່ງທີ່ມີປະຊາກອນຫຼວງຫຼາຍ ຖ້າຊາວແຂວງສະຫວັນນະເຂດຫາກຮ່ວມແຮງຮ່ວມໃຈກັນປະກອບສ່ວນບໍລິຈາກເລືອດຈະເຮັດໃຫ້ເລືອດມີຄວາມພຽງພໍກັບຄວາມຕ້ອງການຂອງສັງຄົມ ເວົ້າລວມເວົ້າສະເພາະໃຫ້ມີເລືອດໄວ້ພຽງພໍ ແລະ ສາມາດຊ່ວຍແບ່ງປັນເລືອດໃຫ້ບັນດາແຂວງອ້ອມຂ້າງ ແລະ  ສາມາດບັນລຸຄາດໝາຍສູ້ຊົນຂອງສູນເລືອດແຫ່ງຊາດມອບໃຫ້

ໃນຕອນທ້າຍ ທ່ານຄຳຮຸ່ງ ເຮືອງວົງສີ ປະທານອົງການກາແດງລາວໄດ້ມີຄຳເຫັນບາງຕອນວ່າ: ວຽກງານບໍລິຈາກເລືອດແມ່ນໜ້າທີ່ຂອງໝົດທຸກຄົນຈະຕ້ອງໄດ້ປະກອບສ່ວນເພື່ອໃຫ້ເລືອດພຽງພໍ ແລະ ມີຄວາມປອດໄພສົມກັບຄຳຂັວນຂອງວັນບໍລິຈາກເລືອດໂລກປີນີ້ວ່າ “ເລືອດປອດໄພເພື່ອທຸກຄົນ”





No comments

Powered by Blogger.