ນະຄອນຫຼວງວຽງຈັນ ເລັ່ງແກ້ໄຂ ແລະ ສະກັດກັ້ນ ຂະບວນການຄ້າມະນຸດ



ປີ 2018 ນະຄອນຫຼວງວຽງຈັນ ດຳເນີນຄະດີຕໍ່ຂະບວນການຄ້າມະນຸດ 12 ເລື່ອງ ແລະ ຈະສືບຕໍ່ 19 ວຽກເພື່ອສະກັດກັ້ນ-ແກ້ໄຂ

ນະຄອນຫຼວງວຽງຈັນ: ຄະນະກຳມະການຕ້ານການຄ້າມະນຸດ ຂັ້ນນະຄອນຫຼວງວຽງຈັນ ໄດ້ຈັດກອງປະຊຸມສະຫຼຸບຖອດຖອນແລກປ່ຽນບົດຮຽນ ກ່ຽວກັບວຽກງານຕ້ານການຄ້າມະນຸດ ຂຶ້ນໃນຕອນເຊົ້າວັນທີ 24 ມິຖຸນາ 2019 ຜ່ານມາ, ຢູ່ສຳນັກງານປົກຄອງ ນວ ໂດຍໃຫ້ກຽດເປັນປະທານຂອງທ່ານ ສີຫຸນ ສິດທິລືໄຊ ຮອງເຈົ້າຄອງ ນວ, ປະທານຄະນະກຳມະການຕ້ານການຄ້າມະນຸດຂັ້ນ ນວ, ມີ ພົຈວ ບຸບຜາ ສີພົມມາ ຫົວໜ້າກອງບັນຊາການ ປກສ ນວ, ຮອງປະທານຕ້ານການຄ້າມະນຸດຂັ້ນ ນວ, ມີຫົວໜ້າກົມຕຳຫຼວດສະກັດກັ້ນ ແລະ ຕ້ານການຄ້າມະນຸດ, ປກສ 9 ຕົວເມືອງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.




ກອງປະຊຸມ ພັທ ສຸລິວັນ ລາດສະວົງ ຮອງຫົວໜ້າຫ້ອງຕໍາຫຼວດ ປກສ ນວ, ຫົວໜ້າກອງເລຂາຕ້ານການຄ້າມະນຸດຂັ້ນນະຄອນຫຼວງວຽງຈັນ ໄດ້ຂຶ້ນຜ່ານລາຍງານສະພາບການຈັດຕັ້ງປະຕິບັດ ວຽກງານຕ້ານການຄ້າມະນຸດຢູ່ນະຄອນຫຼວງວຽງຈັນ ໃນໄລຍະປີ 2018 ທີ່ຜ່ານມາ ຕໍ່ທີ່ປະຊຸມ ໂດຍມີເນື້ອໃນບາງຕອນວ່າ: ໜື່ງປີຜ່ານມາ ຄະນະກຳມະການຕ້ານການຄ້າມະນຸດ ນະຄອນຫຼວງວຽງຈັນ ໄດ້ເອົາໃຈໃສ່ປ້ອງກັນສະກັດກັ້ນ-ແກ້ໄຂ ແລະ ປົກປ້ອງຊ່ວຍເຫຼືອຜູ່ຖືກເຄາະຮ້າຍຈາກ ຂະບວນການຄ້າມະນຸດ ພາຍໃນນະຄອນຫຼວງວຽງຈັນ ເປັນຕົ້ນແມ່ນ: ໄດ້ດໍາເນີນຄະດີຄ້າມະນຸດ 2 ເລື່ອງ, ຄ້າຂາຍປະເວນີ 6 ເລື່ອງ, ຄ້າແມ່ຍິງ-ເດັກນ້ອຍ 2 ເລື່ອງ, ກະທຳສຳເລົາ ເດັກ 2 ເລື່ອງ, ໄດ້ຮັບຜູ່ຖືກເຄາະຮ້າຍຈາກການຄ້າມະນຸດຈາກເຈົ້າໜ້າທີ່ໄທ 2 ຄັ້ງ, ມີ 25 ຄົນ(ຍິງ), ສຶກສາອົບຮົມຜູ່ທີ່ມີຄວາມສ່ຽງ ຕົກເປັນເຫຍື່ອຂອງການຄ້າມະນຸດ ກັບຄືນພູມລໍາເນົາ 15 ,ຄັ້ງມີ 45 ຄົນ; ໄດ້ສົມທົບກັບບໍລິສັດຈັດຫາງານ ຜ່ານເອກະສານຜູ່ໄປເຮັດວຽກຢູ່ປະເທດໄທມີ 18 ບໍລິສັດ 726 ເທື່ອຜ່ານ, ມີ 19.505 ຄົນ, ຍິງ 10.112 ຄົນ;




ໄດ້ເຮັດບົດບັນທຶກກັບຜູ່ຄ້າປະເວນີ 82 ຄົນ, ຜູ່ຂາຍປະເວນີ 357 ຄົນ, ຜູ່ຄ້າປະເວນີຄົນຫວຽດນາມ 21 ຄົນ, ຍິງ 10 ຄົນ; ຜູ່ຂາຍປະເວນີຄົນຫວຽດນາມ 36 ຄົນ; ພ້ອມທັງໄດ້ເກັບກຳສະຖິຕິ ໂຮງແຮມ 250 ແຫ່ງ, ມີການຄ້າປະເວນີ 16 ແຫ່ງ, ຮ້ານເສີມສວຍ-ກາເຟ 888 ຮ້ານ, ມີການຄ້າປະເວນີ 2 ຮ້ານ, ຮ້ານອາຫານ-ຮ້ານກິນດື່ມມີ 918 ຮ້ານ, ມີການຄ້າຂາຍປະເວນີ 82 ຮ້ານ, ຮ້ານຄາລະໂອເກາະ 107 ຮ້ານ, ມີການຄ້າຂາຍປະເວນີ 3 ຮ້ານ ແລະ ພື້ນທີ່ສັບສົນ 5 ຈຸດຄື ເສັ້ນທາງ 450 ປີ, ເຂດໜອງບຶກ, ເຂດບ້ານໂຊກນ້ອຍ, ເຂດບ້ານໂພນປ່າເປົ້າ, ເຂດບ້ານດອນກອຍ.




ສຳລັບທິດທາງໃນຕໍ່ໜ້າ ຄະນະກຳມະການຕ້ານການຄ້າມະນຸດ ນະຄອນຫຼວງວຽງຈັນ ຈະສືບຕໍ່ 19 ວຽກງານເຊັ່ນ: ໂຄສະນາ, ເຜີຍແຜ່ນະໂຍບາຍ, ກົດໝາຍ, ລະບຽບກົດໝາຍ, ລະບຽບການ, ແຜນຍຸດທະສາດ, ແຜນງານແຜນການ ແລະ ໂຄງການ, ສະໜອງຂໍ້ມູນຂ່າວສານກ່ຽວກັບວຽກງານຕ້ານການຄ້າມະນຸດໃຫ້ປະຊາຊົນ, ພາກສ່ວນຕ່າງໆຢູ່ນະຄອນຫຼວງວຽງຈັນ ຮັບຮູ້, ເຂົ້າໃຈ, ມີສະຕິ ແລະ ໃຫ້ການຮ່ວມມື ໃນການຈັດຕັ້ງປະຕິບັດວຽກງານດັ່ງກ່າວຢ່າງກ້ວາງຂວາງ, ໃຫ້ການປົກປ້ອງ, ຊ່ວຍເຫຼືອອັນຈຳເປັນແກ່ຜູ່ຖືກເຄາະຮ້າຍ ຢູ່ນະຄອນຫຼວງວຽງຈັນ, ລວມທັງນຳສົ່ງເຂົາເຈົ້າກັບຄືນຄອບຄົວ ແລະ ສັງຄົມຢ່າງປອດໄພ, ພ້ອມທັງສ້າງເງື່ອນໄຂເພື່ອບໍ່ໃຫ້ເຂົາເຈົ້າກັບຄືນເປັນຜູ້ຖືກເຄາະຮ້າຍອີກ, ສືບຕໍ່ເຮັດວຽກປ້ອງກັນສະກັດກັ້ນຕ້ານການຄ້າມະນຸດ ໃຫ້ເປັນປົກກະຕິ,




ຂຶ້ນບັນຊີເປົ້າໝາຍສ້າງລາຍຄະດີສະເພາະ ເພື່ອຕິດຕາມ, ລົງໂຄສະນາເຜີຍແຜ່ຜົນຮ້າຍ ຂອງການຄ້າມະນຸດຕາມຈຸດຫຼໍ່ແຫຼມ, ຂຶ້ນແຜນມ້າງເປົ້າໝາຍຄ້າປະເວນີ ທີ່ເຈົ້າໜ້າທີ່ໄດ້ສຶກສາອົບຮົມໄປແລ້ວຈຳນວນ 82 ຮ້ານ ມາດຳເນີນຄະດີຕາມກົດໝາຍ, ຂຶ້ນແຜນມ້າງເປົ້າໝາຍຄ້າ-ຂາຍປະເວນີ ຕາມໂຮງແຮມ 16 ແຫ່ງ, ມ້າງເປົ້າໝາຍຄ້າ-ຂາຍປະເວນີເຮືອນພັກ 2 ຫຼັງ, ຮ້ານອົບນວດ 4 ຮ້ານ, ຮ້ານກາເຟ 2 ຮ້ານ ແລະ ຮ້ານຄະລະໂອເກາະ 3 ຮ້ານ ແລະ ຈຸດຫຼໍ່ແຫຼມ 5 ຈຸດ, ລົງຈັດຕັ້ງຜັນຂະຫຍາຍດຳລັດ 245/ ນວ ລົງວັນທີ 3 ກໍລະກົດ 2018 ວ່າດ້ວຍການຈັດຕັ້ງຂອງຄະນະກຳມະການຕ້ານການຄ້າມະນຸດໃຫ້ທ່ອງຖິ່ນ ໂດຍສະເພາະ 9 ຕົວເມືອງ.


ພາບແລະຂ່າວ: ປ້ອງກັນຄວາມສະຫງົບນະຄອນຫຼວງວຽງຈັນ


------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
Twitter ID: @tholakhong
tholakhong@gmail.com | www.tholakhong.com


------------------------------------------


Post a Comment

0 Comments