ຄະນະພັກຮາກຖານບ້ານກໍາກອກ ເມືອງທ່າແຕງ ເປີດກອງປະຊຸມຄົບຄະນະຄັ້ງທີ 7




ເຊກອງ: ຄະນະພັກຮາກຖານບ້ານ ກໍາກອກ ເມືອງ ທ່າແຕງ ແຂວງ ເຊກອງ ໄດ້ຈັດກອງປະຊຸມຄົບຄະນະພັກເປີດກວ້າງຄັ້ງທີ 7ຂຶ້ນໃນວັນທີ 13 ມິຖຸນາ 2019 ນີ້ ທີ່ສະໂມສອນຂອງບ້ານ,ພາຍໃຕ້ການເປັນປະທານຂອງທ່ານ ຄໍາຈັກ ກອນບຸດເຕີ ເລຂາຄະນະພັກຮາກຖານບ້ານກໍາກອກ,ໂດຍເປັນກຽດເຂົ້າຮ່ວມຂອງທ່ານ ແສງລາຕີ ຫຼອມຍະເດດ ຫົວໜ້າຄະນະຈັດຕັ້ງເມືອງ ທ່າແຕງ,ມີບັນດາຫົວໜ້າ-ຮອງຫ້ອງການ,ເຂດຈຸດສຸມພັດທະນາທີ 3 ພ້ອມດ້ວຍສະມາຊິກພັກ ແລະ ພາກສ່ວນກ່ຽວຂ້ອງເຂົ້າຮ່ວມ.



ທ່ານ ຄໍາຈັກ ກອນບຸດເຕີ ເລຂາຄະນະພັກຮາກຖານບ້ານກໍາກອກໄດ້ຂຶ້ນຜ່ານບົດສະຫຼຸບຕີລາຄາ ການນໍາພາຂອງຄະນະພັກ,ຊຶ່ງໄດ້ຍົກໃຫ້ເຫັນສະພາບລວມ,ການເຄື່ອນໄຫວຊີ້ນໍາ-ນໍາພາຂອງຄະນະພັກ ນັບແຕ່ກອງປະຊຸມເປີດກວ້າງຄັ້ງທີ 6, ດ້ານດີ, ຂໍ້ຂາດຕົກບົກຜ່ອງ ແລະ ບົດຮຽນທີ່ຖອດຖອນໄດ້ເປັນຕົ້ນແມ່ນ ຄະນະພັກໄດ້ເປັນເຈົ້າການນໍາພາ ແລະ ສຶກສາອົບຮົມທາງດ້ານການເມືອງ-ແນວຄິດ ໃຫ້ສະມາຊິກພັກທຸກສະຫາຍໃນຂອບເຂດຄວາມຮັບຜິດຊອບຂອງຕົນ ໂດຍການຈັດຕັ້ງເຜີຍແຜ່ບັນດາເອກະສານຕ່າງໆ ແນໃສ່ເພື່ອເຮັດໃຫ້ສະມາຊິກພັກ, ປະຊາຊົນບັນດາເຜົ່າເຊື່ອມຊຶມ ແລະ ເຂົ້າໃຈຕໍ່ແນວທາງນະໂຍບາຍຂອງພັກ-ລັດວາງອອກ ໃນນັ້ນ ໄດ້ຈັດຕັ້ງເຊື່ອມຊຶມມະຕິກອງປະຊຸມໃຫ່ຍຄັ້ງທີ X ຂອງພັກຕິດພັນກັບມະຕິຂອງແຂວງ-ຂອງເມືອງ ແລະ ບ້ານວາງອອກ ໃຫ້ສອດຄ່ອງກັບແນວທາງນະໂຍບາຍ ຂອງພັກ, ກົດໝາຍຂອງລັດ,



ໄດ້ຊຸກຍູ້ບັນດາອົງການຈັດຕັ້ງມະຫາຊົນພາຍໃນບ້ານເຄື່ອນໄຫວ ຕາມພາລະບົດບາດຂອງຕົນ ໂດຍຮ່ວມຊີວິດການເມືອງຕາມລະບຽບ ແລະ ສ້າງຂະບວນການດ້ານຕ່າງໆ ເພື່ອຕ້ອນຮັບວັນສໍາຄັນຕ່າງໆຂອງພັກ,ຂອງຊາດໂດຍສະເພາະ ການນໍາພາທາງດ້ານການເມືອງ-ແນວຄິດ,ມີຄວາມເປັນແບບຢ່າງໃນການດໍາລົງຊີວິດ,ສຶກສາອົບຮົມລູກຫຼານພາຍໃນຄອບຄົວປະກອບສ່ວນພັນທະດ້ານຕ່າງໆ,ໄດ້ປະກາດການຍົກຖານະຄະນະໜ່ວຍພັກເປັນເລຂາໜ່ວຍພັກມີ 1 ໜ່ວຍ,ພາຍໃນຄະນະພັກຮາກຖານປະກອບມີ 3 ໜ່ວຍພັກຂຶ້ນກັບ. ນອກນັ້ນ ຍັງໄດ້ເອົາໃຈໃສ່ວຽກງານບໍລິຫານຄຸ້ມຄອງ ຕິດພັນກັບທຸກວຽກງານຢູ່ພາຍໃນບ້ານ ໂດຍສອດຄ່ອງກັບລະບຽບຫຼັກການ ແລະ ກົດໝາຍທີ່ກ່ຽວຂ້ອງວາງອອກຢ່າງເຂັ້ມງວດ.




ຈາກນັ້ນ ຜູ້ເຂົ້າຮ່ວມໄດ້ພ້ອມກັນປະກອບຄໍາຄິດເຫັນຢ່າງກົງໄປກົງມາ ເຮັດໃຫ້ວຽກງານໄລຍະຜ່ານມາຢູ່ຂັ້ນຮາກຖານບ້ານມີບາດກ້າວຂະຫຍາຍຕົວຂຶ້ນກວ່າເກົ່າ,ພ້ອມທັງປ່ອນບັດເລືອກຕັ້ງເອົາຄະນະພັກຮາກຖານຊຸດໃໝ່ ເຊິ່ງມີຜູ້ສະໝັກທັງໝົດ 7 ສະຫາຍ,ກອງປະຊຸມຄັ້ງປະຖົມມະລຶກໄດ້ຕົກລົງເປັນເອກະສັນເລືອກເອົາ 5 ສະຫາຍ,ບັນດາຜູ້ແທນທີ່ໄດ້ຮັບການເລືອກຕັ້ງຄັ້ງນີ້ ລ້ວນແຕ່ປະຕິບັດຖືກຕ້ອງຕາມກົດລະບຽບຂອງພັກ ແລະ ແມ່ນຜູ້ທີ່ມີມາດຖານເງື່ອນໄຂຄົບຖ້ວນ,ສົມເປັນຕົວແທນໃຫ້ແກ່ສະມາຊິກພັກພາຍໃນບ້ານກໍາກອກໃນ 5 ປີຕໍ່ໜ້າ ແນ່ໃສ່ຮັບປະກັນການຈັດຕັ້ງປະຕິບັດທຸກວຽກງານຢູ່ຮາກຖານບ້ານໃຫ້ເຂັ້ມແຂງຂຶ້ນເທື່ອລະກ້າວ.

ໂດຍ: ພອນ ບຸນອຸທິດ




------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
Twitter ID: @tholakhong
tholakhong@gmail.com | www.tholakhong.com


------------------------------------------


Post a Comment

0 Comments