Header Ads

ສູນຮັບຮອງ ແຫ່ງຊາດ ຈັດກອງປະຊຸມສຳມະນາກ່ຽວກັບຄວາມໝາຍຄວາມສຳຄັນຂອງວຽກງານການຮັບຮອງລະບົບ


ນະຄອນຫຼວງວຽງຈັນ: ໃນວັນທີ 12 ມິຖຸນາ 2019 ທີ່ຫ້ອງປະຊຸມຊັ້ນ 1 ຂອງໂຮງແຮມ ດອນຈັນພາເຣດ ສູນຮັບຮອງ ແຫ່ງຊາດ, ກົມມາດຕະຖານ ແລະ ວັດແທກ, ກະຊວງວິທະຍາສາດ ແລະ ເຕັກໂນໂລຊີ ໄດ້ຈັດກອງປະຊຸມສຳມະນາກ່ຽວກັບຄວາມໝາຍຄວາມສຳຄັນຂອງວຽກງານການຮັບຮອງລະບົບ ເນື່ອງໃນວັນການຮັບຮອງລະບົບສາກົນ ປະຈຳປີ 2019. ພາຍໃຕ້ການເປັນປະທານກ່າວເປີດໂດຍ ທ່ານ ພຸດທະສັກ ວິຈິດຕຣາ ຫົວໜ້າຫ້ອງການ, ກະຊວງວິທະຍາສາດ ແລະ ເຕັກໂນໂລຊີ.



ກອງປະຊຸມສຳມະນາຄັ້ງນີ້ຈະດຳເນີນເປັນເວລາ 1 ວັນ ໂດຍມີຜູ້ເຂົ້າຮ່ວມທັງໝົດຈຳນວນ 45 ທ່ານ ຈາກບັນດາຜູ້ມີສ່ວນຮ່ວມທັງພາກລັດ ແລະ ເອກະຊົນ ໂດຍໄດ້ມີຈຸດປະສົງເພື່ອຍົກລະດັບຄວາມຮູ້, ຄວາມເຂົ້າໃຈກ່ຽວກັບບົດບາດ, ຄວາມສຳຄັນຂອງວຽກງານການຮັບຮອງລະບົບ ເຊິ່ງເປັນວຽກງານໃນຂົງເຂດໃໝ່ທີ່ມີຄວາມສຳຄັນ ແລະ ຈຳເປັນຕໍ່ກັບທຸກໆຂົງເຂດວຽກງານ ແລະ ກຳລັງໄດ້ຮັບຄວາມສົນໃຈຈາກຫຼາຍປະເທດໃນທົ່ວໂລກ.

ການຮັບຮອງລະບົບແມ່ນການຮັບຮູ້ຢ່າງເປັນທາງການກ່ຽວກັບຄວາມອາດສາມາດໃນການປະຕິບັດຕາມຂໍ້ກຳນົດຂອງມາດຕະຖານສາກົນ ເຊິ່ງມີຄວາມສຳຄັນຕໍ່ກັບບັນດາອົງກອນ, ຫ້ອງທົດລອງ ຫຼື ໜ່ວຍງານໃດໜຶ່ງທີ່ດຳເນີນການປະເມີນຄວາມສອດຄ່ອງ ເພື່ອແນ່ໃສການໃຫ້ບໍລິການທີ່ມີຄວາມໂປ່ງໃສ, ເປັນກາງ ແລະ ມີຂັ້ນຕອນການຈັດຕັ້ງປະຕິບັດທີ່ແນ່ນອນ ທັງເປັນການປົກປ້ອງຜົນປະໂຫຍດອັນຊອບທຳຂອງຜູ້ຊົມໃຊ້, ຮັບປະກັນຄວາມປອດໄພຕໍ່ຊິວິດ, ສັງຄົມ ແລະ ສິ່ງແວດລ້ອມ.



ເວົ້າລວມແລ້ວວຽກງານການຮັບຮອງລະບົບນັບມື້ນັບມີບົດບາດສຳຄັນຕໍ່ກັບທຸກໆຂົງເຂດວຽກງານ ແລະ ເປັນເສົາຄ້ຳໜຶ່ງໃນວຽກງານການປະເມີນຄວາມສອດຄ່ອງ ພ້ອມທັງມີສ່ວນຮ່ວມໃນການພັດທະນາເສດຖະກິດ-ສັງຄົມ ແລະ ມີບົດບາດໃນການສົ່ງເສີມວຽກງານທາງດ້ານການຄ້າອີກດ້ວຍ. ເມື່ອເລັງເຫັນຄວາມສຳຄັນຂອງວຽກງານດັ່ງກ່າວ, ສູນຮັບຮອງແຫ່ງຊາດ, ກົມມາດຕະຖານ ແລະ ວັດແທກ ຈຶ່ງໄດ້ຈັດກອງປະຊຸມສຳມະນາຄັ້ງນີ້ຂຶ້ນ ໂດຍເຊີນຜູ້ຊ່ຽວຊານຈາກໂຄງການສ້າງຄວາມເຂັ້ມແຂງດ້ານເຕັກນິກຂອງປະເທດເຢຍລະມັນ (PTB) ມາເປັນວິທະຍາກອນໃນການສ້າງຄວາມຮູ້ພື້ນຖານວຽກງານຮັບຮອງລະບົບ ແລະ ຖືເປັນວາລະໂອກາດສຳຄັນໃນການສະເຫຼີມສະຫຼອງວັນຮັບຮອງລະບົບສາກົນ ປະຈຳປີ 2019 ໄປພ້ອມກັນ.



ເຊິ່ງໃນປີ 2019 ນີ້ທາງອົງການຮັບຮອງສາກົນໄດ້ອອກຄຳຂວັນກ່ຽວກັບການສົ່ງເສີມວຽກງານການຮັບຮອງລະບົບວ່າ “ການຮັບຮອງລະບົບເປັນການເພີ່ມມູນຄ່າໃຫ້ແກ່ຕ່ອງໂສ້ການສະໜອງ ” ເພື່ອເປັນການສະແດງໃຫ້ເຫັນບົດບາດຄວາມສຳຄັນຂອງວຽກງານການຮັບຮອງຕໍ່ກັບບັນດາຫົວໜ່ວຍການຜະລິດ ແລະ ການບໍລິການຕ່າງໃນທົ່ວໂລກ. ໂດຍນໍາໃຊ້ບັນດາເຄື່ອງມືທາງດ້ານຄຸນນະພາບເຊັ່ນ: ມາດຕະຖານ, ການວັດແທກ ແລະ ການປະເມີນຄວາມສອດຄ່ອງມາເປັນບ່ອນອີງພື້ນຖານໃນການຈັດຕັ້ງປະຕິບັດ, ແນ່ໃສຮັບປະກັນສ້າງຄວາມເຊື່ອໝັ້ນໃຫ້ແກ່ຜະລິດຕະພັນ ແລະ ການບໍລິການ, ຮັບປະກັນຄວາມປອດໄພໃນຂັ້ນຕອນການຜະລິດຈົນເຖິງການສົ່ງອອກ. ຖືໄດ້ວ່າເປັນການຮັບປະກັນ ແລະ ເພີ່ມມູນຄ່າໃຫ້ແກ່ຕ່ອງໂສ້ການສະໜອງຢ່າງແທ້ຈິງ.



------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
Twitter ID: @tholakhong
tholakhong@gmail.com | www.tholakhong.com


------------------------------------------
ໂປພິເສດ! ກົດອ່ານດ່ວນ!

Aliexpress WW

No comments

Powered by Blogger.