Header Ads

ຄວສຜ ແຂວງເຊກອງ ຕິດຕາມກວດກາວຽກງານຢູ່ເມືອງກະລຶມ

ຄວສຜ ແຂວງເຊກອງ ຕິດຕາມກວດກາວຽກງານຢູ່ເມືອງກະລຶມ

#ໂດຍ:ນາລີວັນ

       ໃນລະຫວ່າງວັນທີ 10-12 ມິຖຸນາ 2019 ນີ້ ທ່ານ ສົມແປງ ເອິດລັດດາ ຮັກສາການແທນປະທານຄະນະກໍາມະການວັດທະນະທໍາ-ສັງຄົມ ແລະບັນດາເຜົ່າ (ຄວສຜ) ພ້ອມຄະນະໄດ້ລົງເຄື່ອນໄຫວຕິດຕາມ, ກວດກາ ແລະຊຸກຍູ້ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະການລົງທຶນຂອງລັດ ໃນຂົງເຂດວັດທະນະທໍາ-ສັງຄົມ ແລະບັນດາເຜົ່າ ຢູ່ເມືອງ ກະລຶມ. 

       ໂອກາດທີ່ລົງເຄື່ອນໄຫວເຮັດວຽກໃນຄັ້ງນີ້ແມ່ນເພື່ອຕິດຕາມກວດກາຄືນການຈັດຕັ້ງປະຕິບັດກົດໝາຍຂອງອົງການປົກຄອງທ້ອງຖິ່ນຂັ້ນເມືອງ-ບ້ານ ໃນໄລຍະຜ່ານມາ ທັງເປັນການກວດກາຄືນບັນດາມະຕິຕ່າງໆກ່ຽວກັບການພັດທະນາຊົນນະບົດ ແລະແກ້ໄຂຄວາມທຸກຍາກ ເຊິ່ງໄດ້ພົບປະ ແລະເຮັດວຽກຮ່ວມ ສພຂ ປະຈໍາໜ່ວຍເລືອກຕັ້ງ ແລະຫ້ອງການທີ່ກ່ຽວຂ້ອງ; ພາຍຫຼັງທີ່ໄດ້ຮັບຟັງການສ່ອງແສງລາຍງານການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ແລະການລົງທຶນຂອງລັດໃນຂົງເຂດວັດທະນະທໍາ-ສັງຄົມ ແລະບັນດາເຜົ່າ ຈາກບາງຂະແໜງການແລ້ວ ກໍໄດ້ຍົກເອົາບັນຫາຂໍ້ຄົງຄ້າງທີ່ຍັງປະຕິບັດບໍ່ໄດ້ ມາປຶກສາຫາລືກັນ ເພື່ອຊອກຫາວິທີທາງແກ້ໄຂ ແລະປັບປຸງການປະຕິບັດວຽກງານໃນຕໍ່ໜ້າໃຫ້ດີຂຶ້ນກວ່າເກົ່າ ແລະເພື່ອເປັນຂໍ້ມູນເບື້ອງຕົ້ນທີ່ຈະນຳເຂົ້າໃນກອງປະຊຸມສະໄໝສາມັນເທື່ອທີ່ 7 ຂອງສະພາປະຊາຊົນແຂວງທີ່ຈະໄຂຂຶ້ນໃນຕໍ່ໜ້າ.

       ໂອກາດດັ່ງກ່າວ ທ່ານ ສົມແປງ ເອິດລັດດາ ໄດ້ມີຄຳເຫັນໂອ້ລົມເຊິ່ງໄດ້ເນັ້ນໜັກໃຫ້ບັນດາອົງການປົກຄອງທ້ອງຖິ່ນ ໃຫ້ເອົາໃຈໃສ່ໃນການຈັດຕັ້ງປະຕິບັດໜ້າທີ່ຂອງຕົນໃຫ້ຖືກຕ້ອງສອດຄ່ອງກັບລັດຖະທຳມະນູນ ແລະກົດໝາຍ, ບັນຫາທີ່ສາມາດຈັດຕັ້ງປະຕິບັດໄດ້ ໃຫ້ສືບຕໍ່ປົກປັກຮັກສາໝາກຜົນດັ່ງກ່າວ, ບາງບັນຫາທີ່ຍັງປະຕິບັດບໍ່ທັນໄດ້ໃຫ້ແກ້ໄຂປັບປຸງໃຫ້ດີຂຶ້ນ ເພື່ອຕອບສະໜອງໃຫ້ແກ່ການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ ໃຫ້ມີຄວາມສະຫງົບ, ຮຸ່ງເຮືອງສີວິໄລ ແລະປະຊາຊົນມີຢູ່ມີກິນ ແລະຫຼຸດພົ້ນອອກຈາກຄວາມທຸກຍາກເທື່ອລະກ້າວ.

        ຂະນະດຽວກັນ ກໍໄດ້ລົງຕິດຕາມກວດກາຕົວຈິງ ສະຖານທີ່ການບໍລິການດ້ານສາທາລະນະສຸກຂອງເມືອງ, ຕິດຕາມກວດກາການຈັດສັນດິນປຸກສ້າງບ້ານເຮືອນໃຫ້ປະຊາຊົນທີ່ໄດ້ຮັບຜົນກະຈົບຈາກໄພນໍ້າຖ້ວມໃນປີຜ່ານມາ ແລະສະຖານທີ່ຈະສ້າງວັດຢູ່ເມືອງດັ່ງກ່າວຕື່ມອີກ.





No comments

Powered by Blogger.