Header Ads

ອັດຕະປື ກຽມຈັດແຂ່ງຂັນກັອບການກຸສົນ ລະດົມທຶນຊ່ວຍເຫຼືອຜູ້ປະສົບໄພນ້ຳຖ້ວມ




         ທ້າຍເດືອນ ມິຖຸນາ 2019  ນີ້  ສະມາຄົມກິລາ-ກາຍຍະກຳແຂວງອັດຕະປື ກຽມຈັດການແຂ່ງຂັນກິລາກັອບ ເພື່ອການກຸສົນ ຊີງຂັນກຽດຕິຍົດຂອງ ພະນະທານ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ປະທານຄະນະກໍາມະການສະເພາະກິດແກ້ໄຂໄພພິບັດລະດັບຊາດ ເພື່ອລະດົມທຶນຮອນຈາກທຸກພາກສ່ວນສັງຄົມ ກໍຄືບັນດາບໍລິສັດຫ້າງຮ້ານ ທັງພາກລັດ ແລະ ເອກະຊົນ ລວມເຖິງບຸກຄົນ ແລະ ນັກກິລາກັອບສະໝັກຫຼິ້ນທັງພາຍໃນ ແລະ ຕ່າງປະເທດ, ເປັນການປຸກລະດົມແຫຼ່ງທຶນເຂົ້າໄປຊ່ວຍໜູນໃນການຟື້ນຟູ ແລະ ການພັດທະນາຊີວິດການເປັນຢູ່ຂອງປະຊາຊົນຜູ້ປະສົບໄພ ທີ່ເມືອງສະໜາມໄຊ ໃຫ້ມີຊີວິດການເປັນຢູ່ດີຂຶ້ນ.


         ຕາມການຖະຫລງການຂອງ ທ່ານ ອຸ່ນຫຼ້າ ໄຊຍະສິດ ຮອງເຈົ້າແຂວງອັດຕະປື ທັງເປັນປະທານສະມາຄົມກິລາ-ກາຍຍະກຳແຂວງ ແລະ ຄະນະຮັບຜິຊອບການກະກຽມວຽກງານຈັດການແຂ່ງຂັນກິລາກັອບ ເພື່ອການກຸສົນ ຊີງຂັນກຽດຕິຍົດ ຂອງ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ປະທານຄະນະກໍາມະການສະເພາະກິດແກ້ໄຂໄພພິບັດລະດັບ ຕໍ່ສື່ມວນຊົນເມື່ອບໍ່ດົນມານີ້ ທີ່ຫ້ອງວ່າການປົກຄອງແຂວງ ອັດຕະປືວ່າ: ອີງຕາມການຕົກລົງເຫັນດີຂອງສູນກາງ, ແຂວງອັດຕະປື ໄດ້ສົມທົບກັບຄະນະກຳມະການ ແລະ ກະຊວງທີ່ກ່ຽວຂ້ອງ ພ້ອມກັນຈັດຕັ້ງຄະນະກຳມະການ ກະກຽມໃສ່ງານແຂ່ງຂັນກິລາກັອບ ເພື່ອການກຸສົນໃນຄັ້ງນີ້ ຢ່າງຮີບດ່ວນ ໂດຍງານດັ່ງກ່າວ ແມ່ນຈະໄດ້ຈັດຂຶ້ນໃນວັນທີ 29 ມິຖຸນາ 2019 ທີ່ສະໜາມກັອບລ໋ອງແທງ (ເຂດເສດຖະກິດພິເສດ ດົງໂພສີ) ເມືອງຫາດຊາຍຟອງ ນະຄອນຫຼວງວຽງຈັນ. 


       ຈຸດປະສົງເພື່ອເປັນການປຸກລະດົມແຫຼ່ງທຶນເຂົ້າໄປຊ່ວຍໜູນໃນການຟື້ນຟູ ແລະ ການພັດທະນາຊີວິດການເປັນຢູ່ຂອງປະຊາຊົນຜູ້ປະສົບໄພ ທີ່ເມືອງສະໜາມໄຊ ໃຫ້ມີຊີວິດການເປັນຢູ່ດີຂຶ້ນ, ມາຮອດເວລານີ້ ທາງຄະນະກໍາມະການກະກຽມ ໄດ້ແຕ່ງຕັ້ງຄະນະກຳມະການຮັບຜິດຊອບເປັນທີ່ຮຽບຮ້ອຍແລ້ວ ເປັນຕົ້ນແມ່ນ: ຄະນະກຳມະການດ້ານເຕັກນິກ ໂດຍໄດ້ມອບໃຫ້ສະຫາພັນກິລາກັອບແຫ່ງຊາດ ເປັນຜູ້ຮັບຜິດຊອບໃນການກະກຽມ ແລະ ການຈັດການແຂ່ງຂັນ. ສ່ວນແຂວງອັດຕະປື ແມ່ນໄດ້ມີການກະກຽມອະນຸກຳມະການເນື້ອໃນ, ພິທີການ, ສະຖານທີ່. ການແຂ່ງຂັນກິລາກ໊ອບໃນເທື່ອນີ້ ແມ່ນເນັ້ນໃສ່ເນື້ອໃນການລົງໂຄສະນາເຜີຍແຜ່ແຈ້ງໃຫ້ສັງຄົມຮັບຊາບ ແລະ ເນື້ອໃນກ່ຽວກັບການກະກຽມຕ່າງໆ ເພື່ອຂໍການອຸປະຖໍາເຂົ້າໃນການຊ່ວຍເຫຼືອຈາກສັງຄົມປະກອບສ່ວນ, ມີການກະກຽມການຍ້ອງຍໍ ເພື່ອລະນຶກເປັນກຽດຕິຄຸນໃຫ້ແກ່ຜູ້ທີ່ປະກອບສ່ວນໃນລະດັບຕ່າງໆຢ່າງສົມກຽດ, ໄດ້ມີການກະກຽມແຕ່ງຕັ້ງອະນຸກຳມະການເສດຖະກິດ-ການເງິນ, ການປຸກລະດົມຕ່າງໆ ຊຶ່ງໄດ້ເຄື່ອນໄຫວປຸກລະດົມການປະກອບສ່ວນຈາກສັງຄົມໃຫ້ມີຄວາມວ່ອງໄວ, ສະດວກ, ໂປ່ງໄສ ໂດຍຜ່ານລະບົບບັນຊີທະນາຄານ, ແຕ່ງຕັ້ງອະນຸກຳມະການເລື່ອງປະຊາສຳພັນໃນການລົງໂຄສະນາເຜີຍແຜ່ຂໍ້ມູນຂ່າວສານ ກ່ຽວກັບການແຂ່ງຂັນ ເພື່ອລະດົມທຶນໃຫ້ກວ້າງຂວາງທັງພາຍໃນ ແລະ ຕ່າງປະເທດ. ທ່ານຮອງເຈົ້າແຂວງອັດຕະປືນ ກ່າວອີກວ່າ: ໃນໄລຍະຜ່ານມາ ນັບແຕ່ໄດ້ມື້ເຫດໄພພິບັດຈາກເຂື່ອນແຕກເກີດຂຶ້ນນັ້ນ ກໍໄດ້ຮັບການປະກອບສ່ວນຈາກເພື່ອນມະນຸດດ້ວຍກັນທັງພາຍໃນ ແລະ ຕ່າງປະເທດ ຢ່າງຕໍ່ເນື່ອງ. ແຕ່ແນວໃດກໍດີ, ມາຮອດເວລານີ້ ການຟື້ນຟູຊີວິດການເປັນຢູ່ຂອງປະຊາຊົນໃຫ້ເຂົ້າສູ່ສະພາວະປົກກະຕິນັ້ນ ທຽບໃສ່ຄວາມຮຽກຮ້ອງຕ້ອງການເຫັນວ່າຍັງບໍ່ທັນພຽງພໍ ຊຶ່ງຍັງມີຫຼາຍອັນ, ຫລາຍຢ່າງມີເຫດຜົນທີ່ຈະຕ້ອງໄດ້ໃຊ້ຈ່າຍ ເພື່ອຊ່ວຍເຫຼືອເຮັດໃຫ້ຊີວິດການເປັນຢູ່ຂອງປະສົບໄພໃຫ້ດີຂຶ້ນໂດຍໄວ.

 ດັ່ງນັ້ນ, ການຈັດງານແຂ່ງຂັນກິລາກັອບໃນເທື່ອນີ້ ແມ່ນຈັດເພື່ອເປັນການລະດົມທຶນຈາກສັງຄົມທຸກພາກສ່ວນລວມທັງພາຍໃນ ແລະ ຕ່າງປະເທດ ດ້ວຍການຢາຍບັດເຊີນໃຫ້ບັນດາພາກສ່ວນບໍລິສັດ, ພາກສ່ວນທຸລະກິດພາຍໃນແຂວງອັດຕະປື ແລະ ໄດ້ເຊີນບັນດາແຂວງ ໃນທົ່ວປະເທດ ໂດຍຜ່ານຫ້ອງວ່າການແຂວງໃນແຕ່ລະແຂວງສົ່ງເຊີນຕໍ່ໃຫ້ໄປຮອດໄປເຖິງເປົ້າໝາຍຕ່າງໆ ເພື່ອແຈ້ງໃຫ້ທຸກພາກສ່ວນລວມທັງພາກອົງການຈັດຕັ້ງພັກ-ລັດ ແລະ ພາກເອກະຊົນໃນທົ່ວປະເທດ ທີ່ມີຈິດໃຈສະໝັກໃນການປະກອບສ່ວນເຂົ້າຮ່ວມໃນຂະບວນການແຂ່ງຂັນ ຫຼືວ່າ ຈະປະກອບສ່ວນເປັນທຶນຮອນຕາມຄວາມອາດສາມາດຂອງຕົນກໍສາມາດປະກອບສ່ວນໄດ້ ພິເສດ ຖ້າຫາກພາກສ່ວນໃດ້ມີຄວາມສະດວກດ້ວຍຕົນເອງ ກໍສາມາດປະກອບສ່ວນໄດ້ໂດຍຜ່ານລະບົບເລກບັນຊີທະນະຄານ 080120001633679001 ຊື່ບັນຊີ THE CHARTY GOLF FOR SANAMXAY ຫຼື ໂທສອບຖາເພີ່ມຕື່ມໄດ້ທີ່ 020 59597891 ຫວັງວ່າ ຄົນລາວຄົງຈະບໍ່ຖິ້ມກັນຢ່າງແນ່ນອນ. 

ຂ່າວໂດຍ: ພົມວິຫານ ຂ.ອັດຕະປື



No comments

Powered by Blogger.