Header Ads

ປກສ ນວ ເຜີຍແຜ່ຂໍ້ຕົກລົງວ່າດ້ວຍຂໍ້ຫ້າມຕໍ່ນາຍ ແລະ ພົນຕໍາຫຼວດ


     ໃນຕອນເຊົ້າຂອງວັນທີ 13 ມິຖຸນາ 2019, ຢູ່ສະໂມສອນຊັ້ນ 4 ກອງບັນຊາການ ປກສ ນະຄອນຫຼວງວຽງຈັນ ທ່ານ ພົຈວ ບຸບຜາ ສີພົມມາ ຄະນະປະຈໍາພັກ ນະຄອນຫຼວງວຽງຈັນ ເລຂາຄະນະພັກ ຫົວໜ້າກອງບັນຊາການ ປກສ ນວ ໄດ້ເຜີຍແຜ່ຂໍ້ຕົກລົງຂອງລັດຖະມົນຕີ ກະຊວງປ້ອງກັນຄວາມສະຫົງບ ສະບັບເລກທີ 564/ປກສ, ລົງວັນທີ 3 ເມສາ 2019 ວ່າດ້ວຍຂໍ້ຫ້າມຕໍ່ນາຍ ແລະ ພົນຕໍາຫຼວດ ໃຫ້ພະນັກງານຂັ້ນບັນຊາ ພ້ອມດ້ວຍພະນັກງານຫຼັກແຫຼ່ງຂອງບັນດາຫ້ອງ, ກອງພັນ, ຄ້າຍຄຸມຂັງ-ດັດສ້າງ ແລະ ບັນດາ ປກສ ເມືອງ 9 ເມືອງໄດ້ເຊື່ອມຊຶມ-ເຂົ້າໃຈຢ່າງເລິກເຊິ່ງ ແລະ ພ້ອມກັນຈັດຕັ້ງປະຕິບັດຢ່າງເຂັ້ມງວດ.


     ຂໍ້ຕົກລົງດັ່ງກ່າວປະກອບມີ 6 ໝວດ, ມີ 21 ມາດຕາຄື: ໝວດທີ 1 ວ່າດ້ວຍບັນຍັດທົ່ວໄປ , ໝວດທີ 2 ຂໍ້ຫ້າມ ຕໍ່ ນາຍ ແລະ ພົນຕໍາຫຼວດ, ໝວດທີ 3 ມາດຕະການຕໍ່ຜູ້ລະເມີດ, ໝວດທີ 4 ການພິຈາລະນາ, ໝວດທີ 5 ອົງການກວດກາ ແລະ ໝວດທີ 6 ບົດບັນຍັດສຸດທ້າຍ; ໃນນີ້, ໃນໝວດທີ 2 ມາດຕາທີ 4 ຂໍ້ຫ້າມລວມມີ:  ນອກຈາກຂໍ້ຫ້າມທີ່ກໍານົດໄວ້ໃນໝວດທີ 5 ມາດຕາທີ 38 ແລະ 39 ຂອງກົດໝາຍ ວ່າດ້ວຍກໍາລັງປ້ອງກັນຄວາມສະຫງົບປະຊາຊົນ ສະບັບເລກທີ 20/ສພຊ, ລົງວັນທີ 9 ພຶດສະພາ 2017 ແລ້ວ ຫ້າມນາຍ ແລະ ພົນຕໍາຫຼວດມີພຶດຕິກໍາຄື: 

1 ຫ້າມໃຫ້ ຫຼື ຮັບສີນບົນໃນທຸກກໍລະນີ, 

2 ຫ້າມເຂົ້າຮ່ວມ ແລະ ພົວພັນກັບການຜະລິດ, ຄ້າ-ຂາຍ, ຂົນສົ່ງ, ອໍານວຍຄວາມສະດວກ, ຊຸກເຊື່ອງ ແລະ ເສບສິ່ງເສບຕິດທຸກປະເພດ ທີ່ກົດໝາຍເກືອດຫ້າມ, 

3 ຫ້າມສວຍໃຊ້ໜ້າທີ່ອອກ ແລະ ນໍາໃຊ້ປ້າຍລົດ ທີ່ບໍ່ຖືກຕ້ອງຕາມລະບຽບການທີ່ກໍານົດໄວ້, 

4 ຫ້າມພົວພັນສັງຄົມທີ່ບໍ່ຖືກຕ້ອງຕາມລະບຽບກົດໝາຍ ແລະ ຮີດຄອງປະເພນີອັນດີງາມ ເປັນຕົ້ນ ສ້າງຄອບຄົວໂດຍບໍ່ໄດ້ຮັບອະນຸຍາດ, ທໍາມິດສະຈານ, ພົວພັນແບບຊູ້ສາວທີ່ບໍ່ເໝາະສົມ, ພົວພັນກັບບຸກຄົນ ຫຼື ກຸ່ມແກ້ງ ທີ່ມີພຶດຕິກໍາລະເມີດລະບຽບກົົດໝາຍ, 

5 ຫ້າມວິ້ງເຕັ້ນ, ເປັນນາຍໜ້າ, ປົກປ້ອງ, ແຊກແຊງ ການແກ້ໄຂຄະດີ ແລະ ບັນຫາອື່ນໆ ທີ່ຜິດຕໍ່ລະບຽບຂອງກໍາລັງປ້ອງກັນຄວາມສະຫງົບ, 

6 ຫ້າມເຜີຍແຜ່ ຫຼື ເປີດເຜີຍຂໍ້ມູນຂ່າວສານທາງລັດຖະບານ, ຄວາມລັບ ແລະ ສິ່ງຕ່າງໆ ທີ່ພາໃຫ້ເສື່ອມເສຍພາບພົດ, ບົດບາດ ຂອງກໍາລັງເປັນຕົ້ນ ເອກະສານ, ຮູບພາບໃນເຄື່ອງແບບ, ພາບເຄື່ອນໄຫວວຽກງານ, ຂໍ້ຄວາມສຽງ, ລົງຄໍາເຫັນ ທີ່ບໍ່ເໝາະສົມ ຫຼື ສົ່ງຕໍ່ຂໍ້ມູນດັ່ງກ່າວ ລົງສື່ເອເລັກໂຕນີກ, ສື່ສິ່ງພີມ ແລະ ດ້ວຍຮູບການອື່ນ ໂດຍບໍ່ໄດ້ຮັບອະນຸຍາດຈາກຂັ້ນເທິງ ແລະ ການຈັດຕັ້ງທີ່ກ່ຽວຂ້ອງ, 

7 ຫ້າມສວຍໃຊ້ໜ້າທີ່ເອົາເງິນຂອງລັດ, ລວມໝູ່, ບຸກຄົນ ແລະ ຂອງກາງຄະດີ ເພື່ອຫາຜົນປະໂຫຍດສ່ວນຕົວໂດຍບໍ່ຊອບທໍາ, 

8 ຫ້າມປ່ອຍເງິນກູ້ນອກລະບົບ ແລະ ກູ້ຢືມ, ຊື້-ຂາຍເປັນເງິນຜ່ອນ, ເຂົ້າຫວຍເກີນຄວາມສາມາດຂອງຕົນ, 

9 ຫ້າມສວຍໃຊ້ໜ້າທີ່ເກັບຄ່າຄຸ້ມຄອງນໍາຄົນຕ່າງປະເທດ ແລະ ເປົ້າໝາຍເຄື່ອນໄຫວລະເມີດລະບຽບກົດໝາຍເຊັ່ນ: ຮ້ານບັນເທີງ, ການພະນັນ, ໂສເພນີ, ຄ້າຂາຍຜິດກົດໝາຍ ແລະ ອື່ນໆ, 

10 ຫ້າມນໍາໃຊ້ລົດລວມ ເຄື່ອນໄຫວທຸກກໍລະນີ ທີ່ຜິດຕໍ່ກົດໝາຍ ແລະ ລະບຽບຂອງກໍາລັງ, 

11 ຫ້າມນໍາໃຊ້ອາວຸດ, ອຸປະກອນຮັບໃຊ້ວຽກງານວິຊາສະເພາະນາບຂູ່ ຫຼື ເຄື່ອນໄຫວເຮັດສິ່ງບໍ່ດີລະເມີດລະບຽບກົດໝາຍເດັດຂາດ; 

12 ຫ້າມເມີນເສີຍ, ລະເລີຍໃນເວລາປະຕິບັດໜ້າທີ່ ແລະ ເຂົ້າຮ່ວມກອງປະຊຸມຕ່າງໆ ເປັນຕົ້ນການຫຼີ້ນໂທລະສັບ, ເຄື່ອງມືສື່ສານ, ອັດສຽງໂດຍບໍ່ໄດ້ຮັບອະນຸຍາດ; 

13 ຫ້າມເອົາ ຫຼື ຢັ້ງຢືນເອົາຄົນຕ່າງປະເທດ, ຄົນບໍ່ມີສັນຊາດເປັນຍາດພີ່ນ້ອງ, ຮັບປະກັນເຂົ້າສໍາມະໂນຄົວ ແລະ ອອກບັດປະຈໍາຕົວພົນລະເມືອງລາວ ຫຼື ບັດຕ່າງດ້າວ ທີ່ຂັດກັບກົດໝາຍ ແລະ ລະບຽບການ; 

14 ຫ້າມເຮັດສັນຍະກໍາ ເປັນຕົ້ນ ດັດແປງໃບໜ້າ, ເສີມດັງ, ດັດແຂ້ວ, ສັກລາຍ, ຍ້ອມສີຜົມ ( ຍົກເວັ້ນສີດໍາ ); 

15 ຫ້າມນໍາໃຊ້ເຄື່ອງແບບຂອງກໍາລັງປ້ອງກັນຄວາມສະຫງົບ ເຄື່ອນໄຫວກິດຈະກໍາຕ່າງໆ ທີ່ບໍ່ເໝາະສົມເປັນຕົ້ນ ເຂົ້າຮ້ານບັນເທີງ, ຫຼີ້ນການພະນັນ, ດື່ມສິ່ງມຶນເມົາທຸກປະເພດ; 

16 ຫ້າມວິພາກວິຈານ ແລະ ຫາຄວາມບໍ່ຈີງ ໃສ່ການນໍາພັກ-ລັດ, ການຈັດຕັ້ງ, ນາຍ ແລະ ພົນຕໍາຫຼວດ ທີ່ເປັນການສ້າງຄວາມປັ່ນປ່ວນ, ທໍາລາຍພາບພົດ, ບົດບາດຂອງລັດ ແລະ ກໍາລັງປ້ອງກັນຄວາມສະຫງົບປະຊາຊົນ; 

17 ຫ້າມໃຊ້ກິລິຍາມາລະຍາດທ່າທີ, ປາກເວົ້າ ທີ່ບໍ່ສຸພາບ ແລະ ການນຸ່ງຖື, ໃຊ້ເຄື່ອງປະດັບເອຢ້ອງ ທີ່ບໍ່ເໝາະສົມ ໃນເວລາປະຕິບັດໜ້າທີ່.


     ສໍາລັບ ໝວດທີ 3 ມາດຕາທີ 11 ມາດຕະການທາງວິໄນ ນາຍ ແລະ ພົນຕໍາຫຼວດ ທີ່ລະເມີດຂໍ້ຕົກລົງສະບັບນີ້ ສ້າງຄວາມເສື່ອມເສຍຕໍ່ບົດບາດ, ກຽດສັກສີ, ຊື່ສຽງຂອງກໍາລັງປ້ອງກັນຄວາມສະຫງົບປະຊາຊົນ ຈະຖືກປະຕິບັດມາດຕະການທາງວິໄນ ຕາມລະດັບແຕ່ເບົາ ຫາ ໜັກຄື: 

1 ສືກສາອົບຮົມ, ຕິຕຽນ ໂດຍບັນທຶກຄວາມຜິດໄວ້ເປັນຫຼັກຖານ; 

2 ກ່າວເຕືອນ ໂດຍໃຫ້ຂຽນໃບສໍາຫຼວດຂອງຕົນເອງຜ່ານການຈັດຕັ້ງ ແລະ ບັນທືກຄວາມຜິດໄວ້ເປັນຫຼັກຖານ; 

3 ງົດການປະຕິບັດນະໂຍບາຍຍ້ອງຍໍ, ເລື່ອນຊັ້ນແຕ່ໜຶ່ງປີ ຫາ ໜຶ່ງສະໄໝ ໂດຍໃຫ້ຂຽນໃບສໍາຫຼວດຕົນເອງ ແລະ ບັນທືກຄວາມຜິດໄວ້ເປັນຫຼັກຖານ; 

4 ປົດຊັ້ນ, ປົດຕໍາແໜ່ງ ແລະ ຍົກຍ້າຍໄປຮັບໜ້າທີ່ອື່ນທີ່ຕໍ່າກ່ວາເກົ່າ ໂດຍໃຫ້ຂຽນໃບສໍາຫຼວດຕົນເອງ ພ້ອມທັງ ບັນທືກໄວ້ໃນເອກະສານປະຫວັດຂອງນາຍ ແລະ ພົນຕໍາຫຼວດ; 

5 ວິໄນອອກຈາກກໍາລັງປ້ອງກັນຄວາມສະຫງົບປະຊາຊົນ ໂດຍບໍ່ໄດ້ຮັບນະໂຍບາຍໃດໆ, ພ້ອມສົ່ງຄືນວັດຖຸສິ່ງຂອງປະກອບ ເຊັ່ນ: ອາວຸດຍຸດໂທປະກອນ, ບັດປືນ, ບັດປະຈໍາຕົວຂອງກໍາລັງ, ພາຫະນະ, ນາມມະຍົດ, ເອກະສານວິຊາສະເພາະ ແລະ ເຄື່ອງແບບທາງການຄົບຊຸດທີ່ຍັງສາມາດນໍາໃຊ້ໄດ້ ສໍາລັບສະມາຊີກພັກ ຈະຖືກປະຕິບັດມາດຕະການທາງວິໄນຄື: ກ່າວເຕືອນຄວາມຜິດ, ປົດຕໍາແໜ່ງພັກ, ໂຈະການຮ່ວມຊີວິດພັກ 6 ເດືອນ, ເອົາອອກຈາກການເປັນສະມາຊີກພັກ; ສະມາຊີກສໍາຮອງ ຈະຖືກກ່າວເຕືອນຄວາມຜິດ, ລືບຊື່ອອກຈາກພັກ; ສະມາຊີກອົງການຈັດຕັ້ງມະຫາຊົນ ຍັງຖືກປະຕິບັດວິໄນ ຕາມລະບຽບການສະເພາະ.




No comments

Powered by Blogger.