ກະຊວງພະລັງງານແລະບໍ່ແຮ່ ສັ່ງການກວດສອບ ທຸກເຂື່ອນທົ່ວປະເທດ ເພື່ອຄວາມປອດໄພ!


ລັດຖະບານ ຕິດຕາມກວດກາບັນດາເຂື່ອນໄຟຟ້າໃນລາວຢ່າງໃກ້ ຊິດເພື່ອຮັບປະກັນຄວາມປອດໄພ

ລາຍງານຈາກ ວິທະຍຸກະຈາຍສຽງແຫ່ງຊາດ Lao National Radio ໃຫ້ຮູ້ວ່າ: ກະຊວງ ພະລັງງານ ແລະ ບໍ່ແຮ່ ພວມຕິດຕາມກວດກາຢ່າງໃກ້ຊິດ ບັນດາເຂື່ອນໄຟຟ້າທີ່ມີຢູ່ປະຈຸບັນໃນລາວ ເພື່ອຄວາມປອດໄພ ແລະ ຮັບປະກັນບໍ່ໃຫ້ມີເຫດການຮ້າຍແຮງເກີດຂຶ້ນຄືໃນໄລຍະຜ່ານມາ ຊຶ່ງໄດ້ສ້າງຄວາມເສຍຫາຍຢ່າງໃຫຍ່ຫລວງຕໍ່ຊີວິດ ແລະ ຊັບສິນຂອງປະຊາຊົນ ກໍ່ຄື ຂອງປະເທດຊາດ.

ທ່ານ ຄຳມະນີ ອິນທິລາດ, ລັດຖະມົນຕີກະຊວງພະລັງງານ ແລະ ບໍ່ແຮ່ ໃຫ້ສໍາພາດໃນໂອກາດເຂົ້າຮ່ວມກອງປະຊຸມລັດຖະບານເປີດກ້ວາງ ຄັ້ງທີ 1 ປີ 2019 ຊື່ງຈັດຂຶ້ນຢູ່ນະຄອນຫລວງວຽງຈັນ ໃນລະຫວ່າງວັນທີ 26-27 ມິຖຸນາ 2019 ນີ້ວ່າ: ຫລັງຈາກທີ່ໃນປີ 2018 ຜ່ານມາ ໄດ້ເກີດສະພາບໄພພິບັດຢ່າງໃຫຍ່ຫລວງແບບທີ່ບໍ່ເຄີຍມີມາກ່ອນຢູ່ລາວ, ກະຊວງ ພະລັງງານ ແລະ ບໍ່ແຮ່ ກໍ່ຄື ລັດຖະບານ ຈຶ່ງໄດ້ຈັດຕັ້ງຄະນະກໍາມະການແກ້ໄຂໄພພິບັດ ຫລື ຄະນະກໍາມະການຄຸ້ມຄອງຄວາມປອດໄພຂອງເຂື່ອນ ໂດຍມີສາກົນເຂົ້າຮ່ວມນຳເພື່ອລົງຕິດຕາມກວດກາສະພາບຂອງແຕ່ລະເຂື່ອນໃນທົ່ວປະເທດ. ມາຮອດປັດຈຸບັນ, ລາວປະກອບມີແຫລ່ງຜະລິດກະແສໄຟຟ້າ ທັງຫມົດ 63 ແຫລ່ງ, ໃນນັ້ນ ມີ 55 ໂຄງການເຂື່ອນໄຟຟ້າ ໄດ້ມອບໃຫ້ 6 ທີມງາມກ່ຽວຂ້ອງ ລົງເຄື່ອນໄຫວຕິດຕາມກວດກາຄວາມປອດໄພຂອງແຕ່ລະເຂື່ອນ ໂດຍສົມທົບກັບຜູ້ລົງທຶນຂອງເຂື່ອນທີ່ຕ້ອງມີຊ່ຽວຊານຂອງຕົນເອງເພື່ອກວດກາຄວາມປອດໄພຂອງເຂື່ອນ ພ້ອມທັງລາຍງານໃຫ້ລັດຖະບານໄດ້ຮັບຮູ້ນຳ ເປັນແຕ່ລະໄລຍະ.

ທ່ານລັດຖະມົນຕີກະຊວງພະລັງງານ ແລະ ບໍ່ແຮ່ ໃຫ້ຮູ້ຕື່ມວ່າ: ສໍາລັບບັນດາເຂື່ອນໄຟຟ້າທີ່ພວມດໍາເນີນການກໍ່ສ້າງຢູ່ລາວໃນປະຈຸບັນ ແມ່ນໄດ້ມີການຕິດຕາມກວດກາເຊັ່ນດຽວກັນ ໂດຍສົມທົບກັບອົງການຈັດຕັ້ງສາກົນ ແລະ ສປ ຈີນ ທີ່ໃຫ້ການສະໜັບສະໜູນດ້ານຕ່າງໆ, ຊຶ່ງປັດຈຸບັນພວມດໍາເນີນການຢູ່; ສ່ວນບັນດາເຂື່ອນທີ່ກໍາລັງກະກຽມການກໍ່ສ້າງຢູ່ນັ້ນ ກໍ່ໄດ້ມີການຕິດຕາມກວດກາຢ່າງເປັນລະບົບຄົບຊຸດ ເພື່ອຮັບປະກັນບໍ່ໃຫ້ມີຜົນກະທົບຕ່າງໆເກີດຂຶ້ນຊຶ່ງຈະສ້າງຄວາມເສຍຫາຍດ້ານຊີວິດ ແລະ ຊັບສິນຂອງປະຊາຊົນ. ຖ້າຫາກພົບເຫັນວ່າຜູ້ລົງທຶນທ່ານໃດຫາກບໍ່ມີມາດຕະຖານພຽງພໍ ກໍ່ຈະສະເໜີລັດຖະບານບໍ່ໃຫ້ອະນຸມັດຕໍ່ນັກລົງທຶນເຫລົ່ານັ້ນໄດ້ເຄື່ອນໄຫວຢ່າງເດັດຂາດ, ຊຶ່ງໃນໄລຍະຜ່ານມາ ກໍ່ໄດ້ມີຫລາຍໂຄງການແລ້ວທີ່ຖືກຍົກເລີກໄປ ຍ້ອນບໍ່ໄດ້ມາດຕະຖານຕາມທີ່ໄດ້ກໍານົດໄວ້.

ປັດຈຸບັນ, ແຫລ່ງຜະລິດພະລັງງານໄຟຟ້າຢູ່ໃນລາວ ມີທັງໝົດ 63 ແຫ່ງ ດ້ວຍກໍາລັງຕິດຕັ້ງລວມ 7.213 ເມກາວັດ, ຊື່ງສາມາດຜະລິດພະລັງງານໄຟຟ້າອອກຮັບໃຊ້ທັງພາຍໃນ ແລະ ຕ່າງປະເທດ ໄດ້ທັງໝົດ 37 ຕື້ກິໂລວັດໂມງຕໍ່ປີ. ແນວໃດກໍ່ຕາມ, ໃນໄລຍະຜ່ານມາ, ລາວກໍ່ເຄີຍປະສົບບັນຫາອັນຫນັກຫນ່ວງ ກ່ຽວກັບກັບເຂື່ອນໄຟຟ້າມາແລ້ວ 3 ຄັ້ງໃຫຍ່ ຄື: ຄັ້ງທີ 1 ແມ່ນເຫດການອຸບມົງໄຟຟ້າເຂື່ອນເຊກະໝານ 3 ຢູ່ເມືອງ ດາກຈຶງ ແຂວງ ເຊກອງແຕກໃນເດືອນ ທັນວາ ປີ 2016; ຄັ້ງທີ 2 ແມ່ນເຂື່ອນໄຟຟ້ານ້ຳອ້າວຢູ່ເມືອງ ຜາໄຊ, ແຂວງ ຊຽງຂວາງແຕກໃນເດືອນ ກັນຍາ ປີ 2017 ແລະ ຄັ້ງຫລ້າສຸດຄັ້ງທີ 3 ແມ່ນເຫດການຄູກັ້ນນ້ຳອ່າງເກັບນ້ຳສຳຮອງໂຄງການເຂື່ອນໄຟຟ້າເຊປຽນ-ເຊນ້ຳນ້ອຍແຕກຢູ່ເມືອງ ສະໜາມໄຊ, ແຂວງ ອັດຕະປື ໃນຄໍ່າຄືນຂອງວັນທີ 23 ກໍລະກົດ 2018 ຊຶ່ງໄດ້ສ້າງຄວາມເສຍຫາຍທາງດ້ານຊີວິດ ແລະ ຊັບສິນຂອງປະຊາຊົນຢ່າງໜັກໜ່ວງ.

ໂດຍ: ບຸນຕຽງ ຈັນທະວົງ


------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
Twitter ID: @tholakhong
tholakhong@gmail.com | www.tholakhong.com


------------------------------------------

Post a Comment

0 Comments