ແຂວງໄຊຍະບູລີ ແລະ ຈັ່ງຫວັດນ່ານ ສືບຕໍ່ຮ່ວມມືກັນຮອບດ້ານ


ໄຊຍະບູລີ: ໃນວັນທີ 21 ມິຖຸນາ 2019, ທີ່ຫ້ອງປະຊຸມ ບໍລິສັດໄຟຟ້າຫົງສາ, ເມືອງຫົງສາ, ແຂວງ ໄຊຍະບູລີ, ໄດ້ຈັດກອງປະຊຸມຮັກສາຄວາມສະຫງົບຮຽບຮ້ອຍຕາມຊາຍແດນ ຄັ້ງທີ 11 ຂຶ້ນ ໂດຍການເປັນປະທານຮ່ວມຂອງ ທ່ານ ພົງສະຫວັນ ສິດທະວົງ, ເຈົ້າແຂວງໆໄຊຍະບູລີ, ແລະ ປະທານຄະນະປ້ອງກັນຊາດ - ປ້ອງກັນຄວາມສະຫງົບຂັ້ນແຂວງ ແລະ ທ່ານ ວໍລະກິດຕິ ສຣີທິພາກອນ, ຜູ້ວ່າຣາຊະການຈັງຫວັດນ່ານ, ແລະ ໂດຍການເຂົ້າຮ່ວມຂອງຄະນະຜູ້ແທນ ແລະ ຜູ້ຕາງໜ້າຈາກພາກສ່ວນກ່ຽວຂ້ອງທັງສອງແຂວງ.

ໃນກອງປະຊຸມ, ທັງສອງຝ່າຍໄດ້ເຫັນດີຮ່ວມກັນວ່າ ແຂວງໄຊຍະບູລີ ແລະ ຈັງຫວັດນ່ານຈະສືບຕໍ່ຮ່ວມມືກັນຮອບດ້ານໃນຕໍ່ໜ້າ ເພື່ອເປັນການສືບຕໍ່ຮັດແໜ້ນສາຍພົວພັນ ລາວ-ໄທ ໃນໄລຍະໃໝ່ ໂດຍມີການພັດທະນາຢ່າງວ່ອງໄວ ແລະ ນັບມື້ນັບດີຂຶ້ນເລື້ອຍໆ, ທັງເສີມສ້າງຄວາມຜາສຸກຮົ່ມເຢັນໃຫ້ແກ່ປະຊາຊົນທັງສອງຝ່າຍ; ເພື່ອເຮັດໃຫ້ຊາຍແດນ ລະຫວ່າງປະເທດ ມີຄວາມສະຫງົບປອດໄພ ແລະ ເປັນລະບຽບຮຽບຮ້ອຍ, ທັງເພື່ອເອື້ອອໍານວຍໃຫ້ແກ່ວຽກງານເສດຖະກິດ, ວັດທະນະທໍາ - ສັງຄົມ ມີການເຕີບໃຫຍ່ຂະຫຍາຍຕົວຂຶ້ນໄປເລື້ອຍໆ ແລະ ເພື່ອເປັນການສ້າງໃຫ້ຊາຍແດນລະຫວ່າງສອງປະເທດ, ລາວ - ໄທ ແລະ ໄທ-ລາວ, ເວົ້າລວມ, ເວົ້າສະເພາະກໍ່ຄືລະຫວ່າງສອງແຂວງ ໄຊຍະບູລີ - ນ່ານ ໃຫ້ກາຍເປັນຊາຍແດນແຫ່ງສັນຕິພາບ, ມິດຕະພາບ, ມີຄວາມສາມັກຄີ, ການຮ່ວມມືຮອບດ້ານ ແລະ ຮັກສາໄດ້ຜົນປະໂຫຍດຂອງປະຊາຊົນທັງສອງຝ່າຍ.



ໃນກອງປະຊຸມ, ແຂວງໄຊຍະບູລີຂອງສປປ ລາວ ແລະ ຈັງຫວັດນ່ານຂອງຣາຊະອານາຈັກໄທ ແມ່ນໄດ້ທົບທວນຄືນຜົນຂອງການຮ່ວມມືລະຫວ່າງສອງຝ່າຍ ໃນການຈັດຕັ້ງປະຕິບັດເນື້ອໃນຂອງບົດບັນທຶກຂອງກອງປະຊຸມຄະນະກໍາມະການຮ່ວມມືເພື່ອການຮັກສາຄວາມສະຫງົບຮຽບຮ້ອຍຕາມຊາຍແດນ ລາວ-ໄທ, ແຂວງໄຊຍະບູລີ-ຈັງຫວັດນ່ານ ຄັ້ງທີ 10 ຜ່ານມາ, ເຊິ່ງມີຜົນສໍາເລັດໃນການຮ່ວມມືຫຼາຍດ້ານເປັນຕົ້ນແມ່ນ: ຮັກສາໄດ້ຄວາມສະຫງົບຮຽບຮ້ອຍຕາມຊາຍແດນແຂວງ-ຈັງຫວັດ, ປະຊາຊົນທັງສອງແຂວງແມ່ນມີການໄປມາຫາສູ່ກັນເປັນປົກກະຕິ, ມີການແລກປ່ຽນ, ຊື້-ຂາຍສິນຄ້າເຊິ່ງກັນ ແລະ ກັນ. ນອກນີ້, ຍັງໄດ້ແລກປ່ຽນສິລະປະວັດທະນະທໍາ, ກິລາມິດຕະພາບ ແລະ ແລກປ່ຽນຂໍ້ມູນຂ່າວສານ ເພື່ອສະກັດກັ້ນກຸ່ມຄົນບໍ່ດີທີ່ສວຍໂອກາດນໍາໃຊ້ຊາຍແດນເຄື່ອນໄຫວໃນທາງທີ່ກົດໝາຍເກືອດຫ້າມ.

ສໍາລັບເນື້ອໃນການຮ່ວມມືຄັ້ງນີ້ ຕົ້ນຕໍແມ່ນ ການຮ່ວມມືກັນສະກັດກັ້ນການຄ້າຂາຍແຮງງານຜິດກົດໝາຍ ແລະ ການແລກປ່ຽນຂໍ້ມູນຂ່າວສານນຳກັນ, ທັງຮ່ວມມືກັນສະກັດກັ້ນການຄ້າຂາຍຢາເສບຕິດ ແລະ ການປາບປາມຢາເສບຕິດ, ຮ່ວມມືກັນໃນການຮັກສາເສັ້ນຊາຍແດນ ລາວ-ໄທ ແລະ ໄທ-ລາວ, ຮ່ວມມືກັນໃນກໍລະນີບຸກຄົນຂອງແຕ່ລະຝ່າຍຖືກຈັບກຸມຄຸມຂັງ, ແລະ ພ້ອມກັນ ກໍ່ຊຸກຍູ້ສົ່ງເສີມໃຫ້ມີການຄ້າຂາຍ, ການລົງທຶນໃຫ້ເພີ່ມຂຶ້ນ, ທັງສົ່ງເສີມໃຫ້ປະຊາຊົນຕາມຊາຍແດນ ໄດ້ມີການຊື້-ຂາຍ, ການໄປມາຫາສູ່ກັນ, ການທ່ອງທ່ຽວ, ການຢ້ຽມຢາມພີ່ນ້ອງ ແລະ ການປິ່ນປົວຮັກສາສຸຂະພາບໃຫ້ເປັນປົກກະຕິ ແລະ ຖືກຕ້ອງ.



ເວົ້າລວມແລ້ວ ແມ່ນເຮັດໃຫ້ການເຂົ້າ-ອອກຊາຍແດນມີຄວາມຖືກຕ້ອງຕາມລະບຽບກົດໝາຍທີ່ລັດຖະບານ 2 ປະເທດວາງໄວ້ ແລະ ທັງມີບັນຍາກາດທີ່ດີ.

ຈາກນັ້ນ, ຄະນະຜູ້ແທນຂອງທັງສອງຝ່າຍກໍ່ໄດ້ລົງນາມເຊັນບົດບັນທຶກຮ່ວມກັນ; ຕາງໜ້າຝ່າຍແຂວງໄຊຍະບູລີເຊັນ ແມ່ນທ່ານ ພົງສະຫວັນ ສິດທະວົງ ເຈົ້າແຂວງ, ຝ່າຍຈັງຫວັດນ່ານ ແມ່ນ ທ່ານ ວໍລະກິດຕິ ສຣີທິພາກອນ, ຜູ້ວ່າຣາຊະການຈັງຫວັດ, ໂດຍມີຄະນະກຳມະການທີ່ກ່ຽວຂ້ອງທັງ 2 ຝ່າຍເຂົ້າຮ່ວມເປັນສັກຂີພິຍານ.
ໃນຕອນທ້າຍ, ກໍ່ໄດ້ມີການມອບຂອງທີ່ລະນຶກເຊິ່ງກັນ ແລະ ກັນ ແລະ ຖ່າຍຮູບຮ່ວມກັນຕື່ມອີກ.



ນັກຂ່າວ: ຫ້ອງວ່າການແຂວງ ໄຊຍະບູລີ
ໂດຍ: ອຸ່ນເຮືອນ ໂພທິລັກ

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
Twitter ID: @tholakhong
tholakhong@gmail.com | www.tholakhong.com


------------------------------------------

Post a Comment

0 Comments