ສຳເລັດກອງປະຊຸມໃຫຍ່ຄັ້ງທີ VIIIຂອງສະຫະພັນກຳມະບານເມືອງໂພນໂຮງແຂວງວຽງຈັນ

ແຂວງວຽງຈັນ: ວັນທີ 5 ມິຖຸນາ 2019 , ຢູ່ທີ່ສະໂມສອນໃຫຍ່ຂອງຫ້ອງວ່າການປົກຄອງເມືອງໂພນໂຮງແຂວງວຽງຈັນ.

ໃຫ້ກຽດເຂົ້າຮ່ວມໂດຍ ສະຫາຍ ສາຄອນ ແກ້ວສຸວັນ ປະທານສະຫະພັນກຳມະບານເມືອງໂພນໂຮງ, ມີ ສະຫາຍ ເທບພະໄທ ແກ້ວເຂັມເພັດ ກຳມະການພັກແຂວງ ປະທານສະຫະພັນກຳມະບານແຂວງວຽງຈັນ, ມີສະຫາຍ ນ. ອິ່ນຄຳ ພັນດາລາ ເລຂາພັກເມືອງ ເຈົ້າເມືອງ-ເມືອງໂພນໂຮງ, ມີປະທານແນວລາວສ້າງຊາດເມືອງ, ປະທານແມ່ຍິງເມືອງ, ເລຂາຊາວໜຸ່ມເມືອງ, ປະທານນັກຮົບເກົ່າເມືອງ, ມີແຂກຖືກເຊີນ, ຜູ້ແທນສົມບູນເຂົ້າຮ່ວມຢ່າງພ້ອມພຽງ.

 ໃນກອງປະຊຸມໄດ້ຮັບຟັງການຜ່ານບົດລາຍງານການເມືອງທັງສອງພາກ ແລະ ທິດທາງແຜນການໃນຕໍ່ໜ້ານຳສະເໜີໂດຍ ສະຫາຍ ສາຄອນ ແກ້ວສຸວັນ ປະທານສະຫະພັນກຳມະບານເມືອງ ເຊິ່ງທ່ານໄດ້ຍົກໃຫ້ເຫັນຜົນງານການເຄື່ອນໄຫວທີ່ພົ້ນເດັ່ນຫຼາຍດ້ານມີທັງດ້ານດີ, ດ້ານອ່ອນ, ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້. ພ້ອມກັນນັ້ນຕາງໜ້າໃຫ້ແຕ່ລະກຸ່ມ ກໍ່ໄດ້ຂຶ້ນປະກອບຄຳຄິດ, ຄຳເຫັນ ໃສ່ບົດລາຍງານຢ່າງກົງໄປກົງມາ ແລະ ຮັບຮອງເອົາຢ່າງມີປະຊາທິປະໄຕ. ກອງປະຊຸມຍັງໄດ້ມອບໃບຍ້ອງຍໍ ຂອງທ່ານເຈົ້າເມືອງ-ເມືອງໂພນໂຮງ ໃຫ້ຄະນະບໍລິຫານງານຊຸດເກົ່າທີ່ມີຜົນງານດີເດັ່ນໃນການປະຕິບັດໜ້າທີ່ວຽກງານຈຳນວນ 14 ສະຫາຍ, ເຊິ່ງມອບໂດຍສະຫາຍ ນ. ອິ່ນຄຳ ພັນດາລາເຈົ້າເມືອງ-ເມືອງໂພນໂຮງ ແລະ ກ່າວຮັບໂດຍແຕ່ລະສະຫາຍ.

ຈາກນັ້ນ ກອງປະຊຸມກໍ່ໄດ້ປ່ອນບັດຄັດເລືອກເອົາຄະນະບໍລິຫານງານສະຫະພັນກຳມະບານເມືອງຊຸດໃຫມ່ ກອງປະຊຸມຄັ້ງປະຖົມມະລຶກເປັນເອກະສັນເລືອກເອົາ ສະຫາຍ ນ. ລຳເງິນ ພັນທະວົງ ເປັນປະທານສະຫະພັນກຳມະບານເມືອງ, ສະຫາຍ ນາງ ມະນີສອນ ໄຊຍະບຸດ ເປັນຮອງ, ຊີ້ນໍາວຽກງານກອງທຶນ, ສະຫາຍ ທອງ ຫຼວງວິໄລ ເປັນຮອງ, ທັງເປັນປະທານກວດກາ.

ຕອນທ້າຍຂອງກອງປະຊຸມຍັງໄດ້ຮັບຟັງການໂອ້ລົມຂອງ ສະຫາຍ ເທບພະໄທ ແກ້ວເຂັມເພັດ ກຳມະການພັກແຂວງ ປະທານສະຫະພັນກຳມະບານແຂວງວຽງຈັນ, ເພື່ອເປັນເຂັມຊີ້ທິດເຢືອງທາງ ເຊິ່ງທ່ານໄດ້ກ່າວຍ້ອງຍໍຊົມເຊີຍຕໍ່ຜົນງານການເຄື່ອນໄຫວຂອງສະຫະພັນກຳມະບານເມືອງໂພນໂຮງ ທີ່ຍາດມາໄດ້ໃນໄລຍະຜ່ານມາ ແລະ ທ່ານຍັງໄດ້ເນັ້ນຫຼາຍບັນຫາທີ່ສຳຄັນກ່ຽວກັບວຽກງານກຳມະບານ ເປັນຕົ້ນແມ່ນ ພາລະບົດບາດ, ສິດ ແລະ ໜ້າທີ່ ຂອງອົງການກຳມະບານລາວ, ວຽກງານກອງທຶນ ກຊກ ແລະ ກອງທຶນທານຸເຄາະ ແລະ ວຽກງານຂໍ້ແຂ່ງຂັນ 5 ເປັນເຈົ້າ ພ້ອມກັນນັ້ນທ່ານຍັງໄດ້ເນັ້ນໃຫ້ຄະນະບໍລິຫານງານສະຫະພັນກຳມະບານເມືອງຊຸດໃໝ່ ຈົ່ງເພີ່ມທະວີຄວາມສາມັກຄີພາຍໃນໃຫ້ແໜ້ນແຟ້ນສືບຕໍ່ສຶກສາອົບຮົມການເມືອງ-ແນວຄິດ ໃຫ້ແກ່ພະນັກງານ, ສະມາຊິກກຳມະບານຢູ່ພາຍໃນເມືອງ ສຸມທຸກສະຕິປັນຍາເຂົ້າໃນວຽກງານວິຊາສະເພາະ ມີນ້ຳໃຈຮັກຊາດຮັກລະບອບໃໝ່ ພ້ອມກັນຈັດຕັ້ງປະຕິບັດວຽກງານທີ່ຕົນເອງຮັບຜິດຊອບ ທີ່ການຈັດຕັ້ງມອບໝາຍໃຫ້ ໃຫ້ສຳເລັດ ແລະ ນຳເອົາເນື້ອໃນຈິດໃຈຂອງກອງປະຊຸມໃຫຍ່ໃນຄັ້ງນີ້ໄປຈັດຕັ້ງປະຕິບັດໃຫ້ເກີດດອກອອກຜົນ.

ຂ່າວ: ວຽງຄຳ ເພັດດາວົງ



Post a Comment

0 Comments