ຮ່ວມສົ່ງແຮງໃຈ! ທັບນັກກິລາແລ່ນ-ລານລາວ ພ້ອມແລ້ວເກືອບ 100% ກ່ອນເຂົ້າຮ່ວມແຂ່ງຂັນກິລານັກຮຽນອາຊຽນ ທີ່ອິນໂດເນເຊຍ




​ທັບ​ນັກ​ກິ​ລາ​ແລ່​ນ-ລານນັກຮຽນສປປ ລາວເຮົາ ຈຳນວນ 12 ຄົນ, ຍິງ 6 ຄົນ ມີຄວາມພ້ອມແລ້ວເກືອບ 100% ກ່ອນຈະອອກເດີນທາງເຂົ້າຮ່ວມການ​​ແຂ່ງ​ຂັນ​ກິລາແລ່ນ-ລານໃນງານ​ມະ​ຫາກຳ​ກິ​ລ​າ​ນັກ​ຮຽນ​ອາ​ຊຽນ ຄັ້ງ​ທີ XI ປະຈຳປີ 2019 ຫຼື “11th ASEAN Schools Games 2019” ທີ່​ປະ​ເທດ​ອິນໂດເນເຊຍ ເປັນເຈົ້າພາບ ລະຫວ່າງ 17-25 ກໍລະກົດນີ້ ພ້ອມຕັ້ງເປົ້າຈະພະຍາຍາມສູ້ຊົນຍາດໃຫ້ໄດ້ຫຼຽນໃດຫຼຽນໜຶ່ງ ກັບມາເປັນຂອງຂວັນໃຫ້ກັບພໍ່ແມ່ປະຊາຊົນລາວ ໄດ້ຊື່ນຊົມ.

ທ່ານ ພູ​ທະ​ວິ​ພອນ​ ພົນ​ໄຊ​ຍາ ຄູ​ຝຶກ​ກິລາແລ່ນ-ລານນັກຮຽນລາວ ໃຫ້ສຳພາດຕໍ່ນັກຂ່າວສຶກສາ-ກິລາ ລາຍວັນ ເມື່ອ​ວັນ​ທີ 1 ກໍ​ລະ​ກົດ ຜ່ານ​ມາ ທີ່​ໂຮງ​ຮຽນ​ພອນ​ສະ​ຫວັນ​ກິ​ລາ-ກາຍ​ຍະ​ກຳ ບ້ານສີເກດ ເມືອງນາ​ຊາຍ​ທອງ ນະ​ຄອນຫຼວງວຽງ​ຈັນ ວ່າ: ໃນ​ເບື້ອງ​ຕົ້ນ​​​ໄດ້​ມີ​ການ​ຄັດ​ເລືອກ​ເອົາ​ນັກ​ກິ​ລານັບຕັ້ງແຕ່ເດືອນພຶດສະພາ ຈົນມາຮອດປັດຈຸບັນກໍເປັນເວລາ 2 ເດືອນ ແລະ ສາມາດຄັດເລືອກໄດ້ນັກກິລາເປົ້າ ໝາຍຄົບ ​ຈຳ​ນວນ 12 ນ້ອງ, ຍິງ 6 ນ້ອງ. ຜ່ານການເກັບຕົວຝຶກຊ້ອມນັບຈາກນັ້ນມາ ເຫັນວ່ານັກກິລາພວກເຮົາໝົດທຸກຄົນມີຄວາມພ້ອມແລ້ວເຖິງ 95%. ແຕ່ຢ່າງໃດກໍຕາມ, ພວກເຮົາກໍຍັງພໍມີເວລາຝຶກຊ້ອມຕື່ມອີກຫຼາຍພໍສົມຄວນ ກ່ອນຈະຮອດມື້ອອກເດີນທາງ ແລະ ເຂົ້າຮ່ວມແຂ່ງຂັນຕົວຈິງ ຊຶ່ງຫວັງວ່າເມື່ອຮອດມື້ນັ້ນນັກກິລາເຮົາທຸກຄົນຈະພ້ອມເຕັມ 100%.

ສຳລັບການເຂົ້າຮ່ວມແຂ່ງຂັນກລິາແລ່ນ-ລານໃນງານມະຫາກຳກິລານັກຮຽນອາຊຽນ ຄັ້ງ​ທີ XI ປະຈຳປີ 2019 ຫຼື “11th ASEAN Schools Games 2019” ທີ່​ປະ​ເທດ​ອິນໂດເນເຊຍ ເປັນເຈົ້າພາບ ລະຫວ່າງ 17-25 ກໍລະກົດນີ້, ສະຫະພັນກິລາແລ່ນ-ລານແຫ່ງຊາດລາວ ຈະສົ່ງນັກກິລາເຂົ້າຮ່ວມແຂ່ງຂັນທັງໝົດ 12 ນ້ອງ, ຍິງ 6 ນ້ອງ ໃນ 19 ລາຍການ ຈາກ 36 ລາຍການທີ່ທາງປະເທດເຈົ້າພາບບັນຈຸແຂ່ງຂັນ ປະກອບມີ: ແລ່ນ 100 ແມັດຍິງ-ຊາຍ, ແລ່ນ 400 ແມັດຍິງ, ແລ່ນ 800 ແມັດຍິງ-ຊາຍ,​ ແລ່ນ 1.500 ແມັດຍິງ-ຊາຍ, ແລ່ນ 3.000 ແມັດຍິງ-ຊາຍ, ແລ່ນຂ້າມຮົ້ວ 100 ແມັດຍິງ-ຊາຍ, ແລ່ນຂ້າມຮົ້ວ 110 ແມັດຊາຍ, ແລ່ນຂ້າມຮົ້ວ 400 ແມັດຍິງ-ຊາຍ, ແລ່ນ 4x100 ແມັດຍິງ,​ ແລ່ນ 4x100 ແມັດ ທີມປະສົມ,​ ເຕັ້ນຍາວຍິງ, ເຕັ້ນສາມກ້າວຍິງ-ຊາຍ, ຊັດຫຼາວຊາຍ ແລະ ແກວ່ງຄ້ອນຊາຍ. ພ້ອມຕັ້ງຄວາມຫວັງຈະພະຍາຍາມສູ້ຊົນຍາດໃຫ້ໄດ້ຫຼຽນໃດຫຼຽນໜຶ່ງ ໂດຍສະເພະາແມ່ນລາຍການແລ່ນຂ້າມຮົ້ວ 110 ແມັດຊາຍ ແລະ ລາຍການເຕັ້ນຍາວຍິງ ເພື່ອນຳກັບມາເປັນຂອງຂວັນໃຫ້ກັບພໍ່ແມ່ປະຊາຊົນລາວ ກໍຄືແຟນກິລາລາວພັນແທ້ ໄດ້ຊື່ນຊົມ.

​ໂອກາດດຽວກັນ, ທ້າວ ສະ​ຖາ​ພອນ​ ໄຊ​ຍະ​ພອນ ແລະ ນາງ ໄຂ​ມາ ໂພນ​ຍາ​ໄຊ 2 ນັກກິລາແລ່ນ-ລານນັກຮຽນລາວ ໃຫ້ສຳພາດວ່າ: ພວກນ້ອງເອງມີ​ຄວາມ​ຮູ້​ສຶກ​ພາກ​ພູມ​ໃຈ​ທີ່​ໄດ້​ຮັບ​ໃຊ້​ປະ​ເທດ​ຊາດ ແລະ ມີ​ຄວາມ​ພ້ອມ​ແລ້ວເກືອບ 100% ທີ່​ຈະ​ເຂົ້າ​ຮ່ວມ​ແຂ່ງ​ຂັນ​ງານ​ມະ​ຫາກຳ​ກິ​ລາ​ນັກ​ຮຽນ​ອາ​ຊຽນ ​ຄັ້ງ​ທີ XI ແລະ ພ້ອມແລ້ວຈະສ້າງຜົນງານໃຫ້ກັບປະເທດຊາດໃນເວທີອາຊຽນ. ແນວໃດກໍດີ, ເພື່ອຈະສ້າງຜົນງານໃຫ້ອອກມາດີຄືກັບທີ່ກ່າວມານັ້ນ ຂໍເຊີນຊວນພໍ່ແມ່ປະຊາຊົນລາວທົ່ວປະເທດ ໂດຍສະເພາະແມນແຟນກິລາແລ່ນ-ລານພັນແທ້ ຊ່ວຍກັນສົ່ງກຳລັງໃຈ ແລະ ແຮງເຊຍ ໃຫ້ທັບນັກກິລາລາວເຮົາກັນຫຼາຍໆແດ່ເດີ້.

ໂດຍ: ຈັນ​ທະ​ລາ

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
Twitter ID: @tholakhong
tholakhong@gmail.com | www.tholakhong.com


------------------------------------------

Post a Comment

0 Comments