ປກສ ແຂວງໄຊສົມບູນ ເຜີຍແຜ່ນິຕິກຳ, ສຶກສາອົບຮົມຄົນຕ່າງປະເທດ


ກອງບັນຊາການ ປກສ ແຂວງໄຊສົມບູນ ໄດ້ສົມທົບກັບພະແນກແຮງງານສະຫວັດດີການສັງຄົມແຂວງ ເປີດກອງປະຊຸມເຜີຍແຜ່ນິຕິກຳ, ສຶກສາອົບຮົມຄົນຕ່າງປະເທດ ແລະ ຫົວໜ່ວຍແຮງງານທີ່ນຳໃຊ້ຄົນຕ່າງປະເທດທີ່ບໍຖືກຕ້ອງ ຂຶ້ນໃນຕອນເຊົ້າວັນ 03 ກໍລະກົດ 2019 ນີ້.

ພາຍໃຕ້ການເປັນປະທານ ຂອງທ່ານ ພັອ ພິມພາ ທິຖາວອນ ຄະນະປະຈຳພັກແຂວງ, ເລຂາຄະນະພັກຮາກຖານ,ຫົວໜ້າກອງບັນຊາການ ປກສ ແຂວງ ໄຊສົມບູນ, ມີທ່ານ ວັນຄໍາເກັ່ງ ຢ່າຊົ່ງກົວ ຮອງຫົວໜ້າພະແນກແຮງງານສະຫວັດດີການສັງຄົມແຂວງ, ມີຕາງໜ້າບັນດາ ພະແນກການ, ບໍລິສັດ ແລະ ພາກສ່ວນທີ່ກ່ຽວຂ້ອງ ຕະຫຼອດຮອດແຂກທີ່ຖືກເຊີນເຂົ້າຮ່ວມ.


ໃນກອງປະຊຸມທ່ານ ວັນຄໍາເກັ່ງ ຢ່າຊົ່ງກົວ ຮອງຫົວໜ້າພະແນກແຮງງານສະຫວັດດີການສັງຄົມ ໄດ້ຂຶ້ນຜ່ານຄໍາສັ່ງຂອງນາຍົກລັດຖະມົນຕີ ສະບັບເລກທີ 62/ນຍ,ລົງວັນທີ 13 ພະຈິກ 2015 ວ່າດ້ວຍ ການອຳນວຍຄວາມສະດວກ ແລະ ໃຫ້ການຮ່ວມມືໃນການຂຶ້ນທະບຽນ ແລະ ອອກບັດອະນຸຍາດເຄື່ອນໄຫວຊົ່ວຄາວໃຫ້ຄົນຕ່າງປະເທດ. ນອກນັ້ນ, ຍັງໄດ້ຮັບຟັງການຜ່ານເອກະສານ ຂັ້ນຕອນການນຳໃຊ້ແຮງງານຕ່າງປະເທດທີ່ບໍ່ຖືກຕ້ອງຕາມກົດໝາຍ ແລະ ມາດຕະການຕໍ່ຫົວໜ່ວຍແຮງງານ ແລະ ລະເມີດລະບຽບກົດໝາຍ, ເອກະສານຂັ້ນຕອນໃນການອອກບັດອະນຸຍາດພັກເຊົາທີ່ຖືກຕ້ອງ ແລະ ມາດຕະການຕໍ່ຜູ້ລະເມີດ, ບັນດາຂໍ້ຫ້າມຕໍ່ຄົນຕ່າງປະເທດ ແລະ ຂໍ້ຫ້າມສຳລັບຄົນລາວ, ເອກະສານເງື່ອນໄຂການດຳເນີນທຸລະກິດທີ່ຖືກຕ້ອງຂອງຄົນຕ່າງປະເທດຢູ່ ສປປ ລາວ.




ທັງນີ້ກໍເພື່ອເຮັດໃຫ້ສັງຄົມມີຄວາມເປັນລະບຽບຮຽບຮ້ອຍ, ທັງເປັນການປົກປ້ອງສິດ ແລະ ຜົນປະໂຫຍດອັນຊອບທໍາຂອງແຮງງານຄົນຕ່າງປະເທດ ທີ່ເຂົ້າມາເຄື່ອນໄຫວ, ຄ້າ-ຂາຍ, ພັກເຊົາ, ລັກປະກອບອາຊີບ, ດໍາເນີນທຸລະກິດ ແລະ ອື່ນໆ ໃຫ້ມີຄວາມຖືກຕ້ອງຕາມລະບຽບກົດໝາຍ ຂອງ ສປປ ລາວ ເພື່ອເຮັດໃຫ້ບັນຫາດັ່ງກ່າວໄດ້ຮັບການແກ້ໄຂດີຂຶ້ນ. ດັ່ງນັ້ນ, ນາຍົກລັດຖະມົນຕີຈຶ່ງໄດ້ອອກຄໍາສັ່ງ ມາຍັງທ່ານລັດຖະມົນຕີວ່າການກະຊວງ, ຫົວໜ້າອົງການທຽບເທົ່າຂັ້ນສູນກາງ, ອຳນາດການປົກຄອງທ້ອງຖິ່ນທຸກຂັ້ນ, ບັນດາຫົວໜ່ວຍທຸລະກິດ ແລະ ໂຄງການຕ່າງໆ ທີ່ກ່ຽວພັນກັບການເຄື່ອນໄຫວຂອງຄົນຕ່າງປະເທດຢູ່ໃນ ສປປ ລາວ. ເວົ້າລວມ ເວົ້າສະເພາະ ຄົນຕ່າງປະເທດທີ່ເຄື່ອນໄຫວຢູ່ແຂວງໄຊສົມບູນ ຈົ່ງປະຕິບັດຕາມຄຳສັ່ງສະບັບນີ້ຢ່າງເຂັ້ມງວດ. ຈາກນັ້ນ, ຜູ້ເຂົ້າຮ່ວມກອງປະຊຸມຍັງໄດ້ປະກອບຄຳຄິດເຫັນ ແລະ ປຶກສາຫາລືເພື່ອເຮັດໃຫ້ການຈັດຕັ້ງປະຕິບັດວຽກງານການຂຶ້ນທະບຽນ ແລະ ອອກບັດອະນຸຍາດເຄື່ອນໄຫວຊົ່ວຄາວ ໃຫ້ຖືກຕ້ອງສອດຄ່ອງຍິ່ງຂຶ້ນ.


ໃນຕອນທ້າຍກອງປະຊຸມ ທ່ານ ພັອ ພິມພາ ທິຖາວອນ ຍັງໄດ້ໂອ້ລົມຕໍ່ກອງປະຊຸມ ພ້ອມຮຽກຮ້ອງຍັງຂະແໜງການທີ່ກ່ຽວຂ້ອງ ຈົ່ງເອົາໃຈໃສ່ໃນການຈັດຕັ້ງປະຕິບັດຄຳສັ່ງ ເລກທີ 62/ນຍ ໃຫ້ໄດ້ຮັບໝາກຜົນຫຼາຍຂຶ້ນກວ່າເກົ່າ ເພື່ອເຮັດໃຫ້ສັງຄົມ ກໍຄືແຂວງໄຊສົມບູນ ໃຫ້ມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍດີຂຶ້ນເທືອລະກ້າວ.



------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
Twitter ID: @tholakhong
tholakhong@gmail.com | www.tholakhong.com


------------------------------------------


Post a Comment

0 Comments