ທ່ານ ຄໍາພັນ ສິດທິດໍາພາ ຮັກສາການເຈົ້າແຂວງໆ ວຽງຈັນ ຢ້ຽມຢາມ ກອງບັນຊາການ ປກສ ແຂວງ



ແຂວງວຽງຈັນ: ໃນ​ວັນ​ທີ 2 ກໍລະກົດ 2019 ຜ່ານມານີ້ ທ່ານ ຄໍາພັນ ສິດທິດໍາພາ ຮັກສາການເຈົ້າແຂວງໆວຽງຈັນ ຢ້ຽມຢາມ ກອງບັນຊາການ ປກສ ແຂວງ ໃຫ້ກຽດຕ້ອນຮັບຢ່າງອົບອຸ່ນໂດຍແມ່ນທ່ານ ພົຈວ ປອ ທອງເຄນ ບຸນໜັ້ນ ຫົວໜ້າກອງບັນຊາການ ປກສ ແຂວງວຽງຈັນ ມີຄະນະພັກ - ຄະນະກອງບັນຊາການ, ມີຄະນະຫ້ອງ, ກອງພັນ, ຄ້າຍຄຸ້ມ - ຂັງດັດສ້າງ , ກອງບັນຊາການ ປກສ ເມືອງ 11 ເມືອງ ພ້ອມພະນັກງານກ່ຽວຂ້ອງເຂົ້າຮ່ວມຢ່າງພ້ອມພຽງ.


ທ່ານ ພົຈວ ປອ ທອງເຄນ ບຸນໜັ້ນ ຫົວໜ້າກອງບັນຊາການ ປກສ ​ແຂວງ​ວຽງຈັນ ໄດ້​ລາຍ​ງານ​ສະພາບ​ຈຸດ​ພິ​ເສດ, ທີ່​ຕັ້ງ ​ແລະ ​​ການຈັດຕັ້ງປະຕິບັດໜ້າທີ່​ວຽກງານວິຊາ​ສະ​ເພາະ​ໃນ​ໄລຍະຜ່ານມາ ທີ່​ພົວພັນ​ເຖິ່ງ​ວຽກງານປ້ອງ​ກັນ​ຄວາມ​ສະຫງົບ​ຢູ່​ພາຍໃນແຂວງໂດຍ​ຫຍໍ້ ​ເຊິ່ງ​​​ໄດ້​ຍົກ​ໃຫ້​ເຫັນຜົນງານ​ຫຼາຍດ້ານ​ ທີ່​ພະນັກງານ-ນັກຮົບ​ ຍາດ​ມາ​ໄດ້​ ​ແລະ ​ຈຸດ​ອ່ອນ​ຂໍ້ຄົງຄ້າງ​ທີ່​ຈະ​ຕ້ອງ​ໄດ້​ພ້ອມ​ກັນ​ແກ້​ໄຂ​ໃນຕໍ່ໜ້າ ​ໃນ​ໄລຍະ 1 ປີຜ່ານມາ.



​ຈາກນັ້ນ​ທ່ານ ຄໍາພັນ ສິດທິດໍາພາ ຮັກສາການເຈົ້າແຂວງໆວຽງຈັນໄດ້​ໂອ້​ລົມ ​ແລະ​ ຊີ້ນຳ​ວຽກງານ​ປ້ອງກັນຄວາມສະຫງົບແຂວງວຽງຈັນ ທ່ານໄດ້ສະ​ແດງ​ຄວາມ​ຍ້ອງຍໍ​ຊົມ​ເຊີຍ​ຕໍ່ກັບຜົນງານຫຼາຍດ້ານທີ່​ບັນດາ​ສະຫາຍ​ຄະນະ​ພັກ - ຄະນະ​ບັນຊາ​ ປກສ ແຂວງວຽງຈັນ​ ​ແລະ​ ພະນັກງານ-ນັກຮົບ​​ສາ​ມາດຍາດມາ​ໄດ້​ໃນ​ໄລຍະຜ່ານ​ມາຢ່າງ​ສຸດ​ອົກ​ສຸດ​ໃຈ





ພ້ອມ​ນັ້ນ ທ່ານ​ຍັງ​ໄດ້​ຍົກ​ໃຫ້​ເຫັນ​ ສະພາບ​ການ​ຂອງ​ໂລກ​, ຂອງ​ພາກພື້ນ, ຂອງ​ປະ​ເທດ​ເຮົາ ​ແລະ​ພາຍ​ໃນ​ແຂວງ​ວຽງຈັນ ທີ່​ມີ​ການ​ຜັນ​ແປ​ຢ່າງ​ສັບ​ສົນ, ສະນັ້ນ ພວກ​ເຮົາ​ຕ້ອງ​ຢຶດໝັ້ນຕໍ່ອຸດົມ​ການ​ຂອງ​ພັກ​, ຈຳ​ແນ​ກ​ໄດ້ມິດ ​ແລະ​ ສັດຕູ​ຢ່າງ​ຈະ​ແຈ້ງ 


ທ່ານ​ຍັງ​ໄດ້​ຮຽກ ຮ້ອງ​ໃຫ້​ຄະນະ​ພັກ-​ຄະນະ​ບັນຊາ​ ແຕ່ລະ​ຂັ້ນ​ຕ້ອງ​ເອົາ​ໃຈ​ໃສ່​ຕໍ່ວຽກງານ​ສຶກສາ​ອົບຮົມ​ການ​ເມືອງ​ແນວ​ຄິດ​ໃຫ້​ແກ່​ພະນັກງານ-ນັກຮົບ ຢ່າງ​ເປັນ​ປົກະຕິ,​ ສ້າງ​ຄວາມ​ສາມັກຄີ​ພາຍ​ໃນຢ່າງ​ແໜ້ນ​ແຟ້ນ, ຕ້ອງ​ມີ​ຄວາມ​ສະດຸ້ງ​ໄວ, ເອົາ​ໃຈ​ໃສ​ປັບປຸງ​ແບບ​ແຜນ​ວິ​ທີ​ເຮັດ​ວຽກ, ​ແບບ​ແຜນ​ວິທີ​ນຳພາ​​ໃຫ້​ສອດຄ່ອງ​ກັບ​ຕົວ​ຈິງ, ​ເຮັດ​ວຽກຕາມ​ລະບອບ​ລວມສູນ​ປະຊາທິປະ​ໄຕ ​ໂດຍ​ຖື​ເອົາການຄົ້ນຄວ້າ​ປຶກສາ​ຫາລື​ຕົກລົງ​ບັນຫາ​ເປັນໝູ່ຄະນະ, ມອບ​ວຽກໃຫ້​ບຸກຄົນ​ຮັບຜິດຊອບ, ມີ​ການ​ສຳ​ຫຼວດກວດກາ​ຢ່າງ​ເປັນ​ປົກະຕິ, ສຽງສ່ວນ​ນ້ອຍ​ຕ້ອງຂຶ້ນກັບສຽງສ່ວນ​ຫຼາຍ



ໂອກາດດຽວກັນນີ້ ຍັງໄດ້ປະກາດນະໂຍບາຍພັກການຮັບອຸດໜູນບໍານານໃຫ້ສະຫາຍ ພັທ ຄໍາໝື່ນ ວົງໄຊ ອາດີດຫົວໜ້າກອງບັນຊາການ ປກສ ເມືອງທຸລະຄົມ ແລະ ມອບຫຼຽນໄຊພິລະອາດຫານ ຊັ້ນ III, ໃບຍ້ອງຍໍລັດຖະມົນຕີກະຊວງປ້ອງກັນປະເທດ ແລະ ໃບຍ້ອງຍໍກົມໃຫຍ່ການເມືອງກະຊວງປ້ອງກັນປະເທດ ໃຫ້ຜູ້ທີ່ມີຜົນງານດີເດັ່ນ ໃນການປະກອບສ່ວນປ້ອງກັນງານສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ 

ໃນນີ້ມອບຫຼຽນໄຊພິລະອາດຫານ ຊັ້ນ  III ໃຫ້ຈໍານວນ 2 ສະຫາຍ, ໃບຍ້ອງຍໍຂອງລັດຖະມົນຕີກະຊວງປ້ອງກັນປະເທດ ຈໍານວນ 27 ສະຫາຍ ແລະ ໃບຍ້ອງຍໍກົມໃຫຍ່ການເມືອງ ກະຊວງປ້ອງກັນປະເທດ ໃຫ້ 1 ສະຫາຍ ຕື່ມອີກ.

ພາບ-ຂ່າວ: ປກສ ແຂວງວຽງຈັນ, ທອງສີ
ແຂວງວຽງຈັນ

Post a Comment

0 Comments