ກອງກວດກາປ່າໄມ້ ແຂວງໄຊຍະບູລີ ຈັດພິທີປ່ອຍສັດປ່າຫາຍາກສູ່ທຳມະຊາດ



ເພື່ອເປັນການອານຸລັກຮັກສາເຮັດສັດທີ່ຫາຍາກໄດ້ມີການແຜ່ພັນຕໍ່ໄປຈົນຮອດລຸ້ນລູກ,ລຸ້ນໄດ້ເຫັນໄດ້ສຶກສາ ດັ່ງນັ້ນ,ຕອນບ່າຍ ວັນທີ  28 ມິຖຸນາ 2019ຜ່ານມາ ນີ້ ກອງກວດກາປ່າໄມ້ ພະແນກກະສິກຳ ແລະ ປ່າໄມ້ແຂວງໄຊຍະບູລີ ໄດ້ນຳເອົາສັດປ່າທີ່ຢືດມາຈາກແມ່ຄ້າມູນຄ່າ2000,000ກີບ ມີ ເຕົ່າ ຈຳນວນ 6 ໂຕ ,ແລນ ຈຳນວນ 1 ໂຕ ແລະ ອົ້ນ ຈຳນວນ 1 ໂຕ ປ່ອຍຄືນສູ່ທຳມະຊາດເຂດອານຸລັກຊ້າງລາວອ່າງນ້ຳຕຽນ ເມືອງ ແລະ ແຂວງໄຊຍະບູລີ .  




ເປັນກຽດເຂົ້າຮ່ວມໃນພິທີມີ  , ທ່ານ ກອງທຽນ ວິໄລພອນ ຮອງຫົວໜ້າກອງກວດກາປ່າໄມ້ແຂວງ ແລະ ທ່ານ ເດວິດ ຕ່າງໜ້າສູນອານຸລັກຊ້າງລາວອ່າງນ້ຳຕຽນ ,ທ່ານ ພອນວິໄລ ຈັນທະລັງສີ ຮອງຫົວໜ້າ ຫ້ອງການກະສິກຳ ແລະ ປ່າໄມ້ເມືອງໄຊຍະບູລີ ພ້ອມດ້ວຍ ແຂກຖືກເຊີນຈາກເມືອງໄຊຍະບູລີ, ພະນັກງານ ຫ້ອງການກະສິກຳ ແລະ ປ່າໄມ້ເມືອງ, ພ້ອມດ້ວຍພະນັກງານ ແລະ ເຈົ້າໜ້າທີ່ກ່ຽວຂ້ອງເຂົ້າຮ່ວມເປັນສັກຂີພະຍານ ພ້ອມກັນ ປ່ອຍສັດດັ່ງກ່າວຄືນສູ່ທຳມະຊາດ.




ທ່ານ ກອງທຽນ ໄຊຍະພອນ ຮອງຫົວໜ້າກອງກວດກາປ່າໄມ້ ແຂວງໄຊຍະບູລີໃຫ້ຮູ້ວ່າ: ເດືອນທ້າຍມີຖຸນາ ຜ່ານມາ, ທາງເຈົ້າໜ້າທີ່ປ່າໄມ້ແຂວງໄຊຍະບູລີ ໄດ້ສົມທົບກັບເຈົ້າໜ້າທີ່ປ່າໄມ້ເມືອງໄຊຍະບູລີ   ລົງກວດກາສະກັດກັ້ນການຊື້ - ຂາຍ ສັດປ່າຢູ່ຕະຫຼາດເທດສະບານ ເມືອງໄຊຍະບູລີ ແຂວງໄຊຍະບູລີ ພົບເຫັນປະຊາຊົນຍັງສຶບຕໍ່ວາງຈຳໜ່າຍ ສັດປ່າທີ່ຫວງຫ້າມ ເຈົ້າໜ້າທີ່ຈຶ່ງໄດ້ກວດກາຍຶດສັດປ່າດັ່ງກ່າວ ແລະ ນຳມາປ່ອຍ ເຊິງ ການກະທຳ ແມ່ນ ເປັນການກະທຳຜິດ ຕໍ່ກົດໝາຍວ່າດ້ວຍສັດນໍ້າ ແລະ ສັດປ່າ ສະບັບເລກທີ່ 07/ສພຊ, ລົງວັນທີ່ 24 ທັນວາ 2007. ທ່ານ ກອງທຽນ ໄຊຍະພອນ ຍັງໃຫ້ຮູ້ຕື່ມວ່າ: ໃນໄລຍະຜ່ານມາ  ເຈົ້າໜ້າທີ່ກອງກວດກາປ່າໄມ້ ແຂວງໄຊຍະບູລີ ໄດ້ຈັດຕັ້ງພະນັກງານ ລົງເຜີຍແຜ່ ກົດໝາຍກ່ຽວກັບການຄຸ້ມຄອງສັດນໍ້າ ແລະ ສັດປ່າໃຫ້ປະຊາຊົນບັນດາເຜົ່າຢູ່ບັນດາເມືອງ, ບ້ານທີ່ຫຼໍ່ແຫຼມມີຄວາມສ່ຽງສູງຕໍ່ການລ່າ, ຫາສັດນໍ້າ ແລະ ສັດປ່າ, ເຊິ່ງໄດ້ຕິດ ປ້າຍໂຄສະນາ ເພື່ອໃຫ້ປະຊາຊົນບັນດາເຜົ່າມີຄວາມເຂົ້າໃຈ, ມີຄວາມຮັບຮູ້ຕໍ່ລະບຽບກົດໝາຍສັດນໍ້າ ແລະ ສັດປ່າ, ພ້ອມກັນນີ້ ກໍ່ໄດ້ລົງຕິດຕາມກວດກາເປັນປະຈຳ ເພື່ອເກັບກໍາຂໍ້ມູນບຸກຄົນເປົ້າໝາຍທີ່ມີການຊື້ - ຂາຍສັດນໍ້າ ແລະ ສັດປ່າ ພ້ອມທັງ ແຈ້ງເຊີນບຸກຄົນເປົ້າໝາຍຕ່າງໆເຂົ້າມາສຶກສາອົບຮົມ ແລະ  ເຮັດບົດບັນທືກເພື່ອບໍ່ໃຫ້ກັບມາເຄື່ອນໄຫວທີ່ຜິດຕໍ່ລະບຽບກົດໝາຍອີກຕໍ່ໄປ.

Post a Comment

0 Comments