ກຸ່ມບໍລິສັດ ຄຳໄພຊະນະ ມອບເງິນຊ່ວຍເຫຼືອແກ່ຜູ້ປະສົບໄພນໍ້າຖ້ວມ 200 ລ້ານກີບ



ໃນຕອນເຊົ້າຂອງວັນທີ 30 ກັນຍາ 2019 ທີ່ຫ້ອງວ່າການສຳນັກງານນາຍົກລັດຖະມົນຕີ ນະຄອນຫຼວງວຽງຈັນ ທ່ານ ເພັດ ພົມພິພັກ ລັດຖະມົນຕີ, ຫົວໜ້າຫ້ອງວ່າການສຳນັກງານນາຍົກລັດຖະມົນຕີ ໄດ້ຕາງໜ້າລັດຖະບານຮັບເງິນຊ່ວຍເຫຼືອຜູ້ປະສົບໄພນໍ້າຖ້ວມຈາກ ກຸ່ມບໍລິສັດ ຄຳໄພຊະນະ ຈຳນວນ 200.000.000 ກີບ ໂດຍແມ່ນ ທ່ານ ຄຳໄພ ສົມຊະນະ ປະທານກຸ່ມບໍລິສັດດັ່ງກ່າວເປັນຜູ້ມອບ ແລະ ມີພະນັກງານທີ່ກ່ຽວຂ້ອງຂອງຫ້ອງວ່າການສຳນັກງານນາຍົກລັດຖະມົນຕີ ແລະ ກຸ່ມບໍລິສັດດັ່ງກ່າວ ເຂົ້າຮ່ວມ.

ໃນໂອກາດນີ້, ທ່ານ ເພັດ ພົມພິພັກ ໄດ້ກ່າວສະແດງຄວາມຂອບໃຈ ແລະ ຊົມເຊີຍຕໍ່ ກຸ່ມບໍລິສັດ ຄຳໄພຊະນະ ທີ່ໄດ້ນຳເອົາເງິນມາມອບເພື່ອຊ່ວຍເຫຼືອຜູ້ປະສົບໄພນໍ້າຖ້ວມຢູ່ທາງພາກກາງ ແລະ ພາກໃຕ້ຂອງລາວໃນຄັ້ງນີ້. ເງິນຊ່ວຍເຫຼືອດັ່ງກ່າວຈະໄດ້ນຳໄປມອບໃຫ້ກະຊວງແຮງງານ ແລະ ສະຫວັດດີການສັງຄົມ ເພື່ອນຳໄປຊ່ວຍເຫຼືອບັນເທົາທຸກແກ່ຜູ້ປະສົບໄພນໍ້າຖ້ວມພາຍໃນປະເທດເຮົາໃນປີນີ້ຕໍ່ໄປ ເຊິ່ງການຊ່ວຍເຫຼືອດັ່ງກ່າວຈະເປັນກຳລັງໃຈອັນດີສຳລັບປະຊາຊົນ ແລະ ຈະປະກອບສ່ວນເຮັດໃຫ້ການແກ້ໄຂໄພພິບັດ ກໍຄືຜົນກະທົບຕໍ່ຊີວິດການເປັນຢູ່ຂອງຜູ້ປະສົບໄພນໍ້າຖ້ວມຢູ່ທ້ອງຖິ່ນຕ່າງໆສາມາດຜ່ານພົ້ນຄວາມຫຍຸ້ງຍາກ ແລະ ກັບຄືນສູ່ສະພາບປົກກະຕິໂດຍໄວ.


ໃນໂອກາດດຽວກັນ, ທ່ານ ຄຳໄພ ສົມຊະນະ ກໍໄດ້ກ່າວສະແດງຄວາມຊົມເຊີຍຕໍ່ພັກ - ລັດທຸກຂັ້ນ, ບັນດາບໍລິສັດ ແລະ ພາກສ່ວນຕ່າງໆ ທີ່ໄດ້ເອົາໃຈໃສ່ຊ່ວຍເຫຼືອໃນດ້ານຕ່າງໆໃຫ້ແກ່ປະຊາຊົນທີ່ໄດ້ຮັບຜົນກະທົບຈາກໄພພິບັດນໍ້າຖ້ວມຢູ່ທ້ອງຖິ່ນຕ່າງໆຂອງປະເທດເຮົາເປັນຢ່າງດີ ແລະ ທັນການພໍສົມຄວນ ເຊິ່ງອັນນີ້ເປັນການສະແດງເຖິງຄວາມຮັບຜິດຊອບສູງ, ຄວາມສາມັກຄີເປັນປຶກແຜ່ນ, ຄວາມເອື້ອເຟື້ອເພື່ອແຜ່ ແລະ ຄວາມມີນໍ້າໃຈເສຍສະຫຼະອັນສູງສົ່ງຂອງພາກສ່ວນຕ່າງໆ ກໍຄືຂອງປະຊາຊົນລາວບັນດາເຜົ່າ ແລະ ເພື່ອນມິດສາກົນຂອງພວກເຮົາທັງຫຼາຍ. ສຳລັບກຸ່ມບໍລິສັດ ຄຳໄພຊະນະ ກໍຈະຍັງສືບຕໍ່ໃຫ້ການຊ່ວຍເຫຼືອໃນດ້ານຕ່າງໆແກ່ສັງຄົມຢ່າງສຸດຄວາມສາມາດຂອງຕົນ ໃນຍາມທີ່ຈຳເປັນເຊັ່ນນີ້ຕໍ່ໆໄປ.

ຂ່າວ,​ ຮູບ: ຫສນຍ

Post a Comment

0 Comments