ປະຊາຊົນ 48.900 ກວ່າຄົນໃນ 200 ກວ່າບ້ານ ທີ່ແຂວງຄໍາມ່ວນ ໄດ້ຮັບຜົນກະທົບຈາກໄພນໍ້າຖ້ວມ



 
 ແຂວງຄຳມ່ວນ ປະເຊີນໄພນໍ້າຖ້ວມຄັ້ງໃຫຍ່ໃນຮອບຫລາຍປີເຊິ່ງມີຫລາຍເມືອງ ໄດ້ຮັບຜົນກະທົບ ຄື: ເມືອງໜອງບົກ, ເມືອງເຊບັ້ງໄຟ, ເມືອງມະຫາໄຊ, ເມືອງຍົມມະລາດ ແລະເມືອງບົວລະພາ ທີ່ໜັກໜ່ວງ ເຊິ່ງມີປະຊາຊົນ 48.900 ກວ່າຄົນໃນ 200 ກວ່າບ້ານ, 13.500 ຄອບຄົວ, ຈຳນວນພົນ 34.290 ກວ່າຄົນ ໄດ້ຮັບຜົນກະທົບ.

    ສະພາບນໍ້າຖ້ວມຢູ່ແຂວງຄຳມ່ວນປີນີ້ເກີດຂຶ້ນແຕ່ວັນທີ1 ກັນຍາ2019ເຊິ່ງ ມີເນື້ີອທີ່ເກືອບ16.000 ເຮັກຕາ, ໂຄງການຊົນລະປະທານ 27 ໂຄງການ, ໜອງປາ 223 ໜອງ ຖືກນໍ້າຖ້ວມ; ເສັ້ນທາງ46 ສາຍມີຄວາມຍາວ77.660 ແມັດ, ຂົວ10 ແຫ່ງ, ຊົນລະປະທານ 41ໂຄງການ ຖືກກະທົບ. ມີບ້ານທີ່ຖືກຕັດກະແສໄຟຟ້າ 15 ບ້ານ, ມີປະຊາຊົນທີ່ຖືກຍົກຍ້າຍຈໍານວນ 39 ບ້ານ, 1.300 ກວ່າຄອບຄົວເຊິ່ງມາຮອດວັນທີ14 ກັນຍາຍັງເຫລືອ 750 ກວ່າຄອບຄົວ, ສ່ວນຫລາຍໄດ້ກັບຄືນບ້ານ ຍ້ອນວ່ານໍ້າບົກແຫ້ງ. ມີ ໂຮງຮຽນ 35 ແຫ່ງໄດ້ປິດການຮຽນຊົ່ວຄາວ ແລະ ສຸກສາລາຈໍານວນ 4 ຫລັງ ຖືກນໍ້າຖ້ວມ, ສັດລ້ຽງປະເພດຕ່າງຕາຍຈຳນວນໜຶ່ງ.
      

ຄະນະກໍາມະການປ້ອງກັນ ແລະ ຄວບຄຸມໄພພິບັດຂັ້ນແຂວງ ແລະ ບັນດາເມືອງທີ່ໄດ້ຮັບຜົນກະທົບໄດ້ປະສານສົມທົບກັບອໍານາດການປົກຄອງແຂວງ, ພະແນກການ, ຜູ້ປະກອບການ, ນັກທຸລະກິດຕະຫລອດເຖິງຜູ້ທີ່ມີຈິດສັດທາ ໄດ້ຮ່ວມກັນໃຫ້ຊ່ວຍເຫລືອຜູ້ປະສົບໄພນໍ້າຖ້ວມ ນັບແຕ່ມື້ເກີດໄພພິບັດ.
    


ທ່ານ ໂອໄດ ສຸດາພອນ ເຈົ້າແຂວງຄຳມ່ວນໃຫ້ສໍາພາດວ່າ: "ເມື່ອເບິ່ງສະພາບໂດຍລວມ, ລະດັບນໍ້າຂອງ ໃນຂັ້ນເຕືອນໄພຢູ່ແຂວງຄໍາມ່ວນແມ່ນ 13,50 ແມັດ(14,50 ແມັດແມ່ນເຂດອັນຕະລາຍ), ແຕ່ປີນີ້ລະດັບນໍ້າຂອງຢູ່ເຂດຄໍາມ່ວນຂຶ້ນສູງສຸດມີແຕ່ 8,80 ແມັດ. ສະພາບນໍ້າຖ້ວມທີ່ເກີດຂຶ້ນແມ່ນມາຈາກການແມ່ນໍ້າເຊບັ້ງໄຟນອງຂຶ້ນ ໃນໄລຍະທ້າຍເດືອນສິງຫາຫາຕົ້ນເດືອນກັນຍານີ້. ສະພາບກ່ອນໜ້ານັ້ນແຂວງຄໍາມ່ວນພວມຕົກຢູ່ໃນສະພາບອ່າວແຫ້ງແລ້ງ, ແຕ່ມາຮອດໄລຍະທ້າຍເດືອນສິງຫາກໍ່ເລີ່ມມີຝົນຕົກ ແລະ ຈາກນັ້ນກໍ່ມີພາຍຸໂພດຸ ແລະ ກາຈິກິ ພັດເຂົ້າມາ ເຊິ່ງພາຍຸແຕ່ລະຫົວລ້ວນແຕ່ຖືກແຂວງຄໍາມ່ວນ. ສະນັ້ນຈຶ່ງເຮັດໃຫ້ແມ່ນໍ້າເຊບັ້ງໄຟນອງຂຶ້ນໄວ ເຊິ່ງທໍາອິດສະພາບນໍ້າຖ້ວມໄດ້ເກີດຂຶ້ນຢູ່ເມືອງບົວລະພາ(ຢູ່ທິດຕາເວັນອອກ), ຕໍ່ມາເປັນເມືອງມະຫາໄຊ, ເມືອງເຊບັ້ງໄຟ, ເມືອງໜອງບົກ ແລະເມືອງອື່ນໆ, ເວົ້າລວມແລ້ວແຂວງຄໍາມ່ວນໄດ້ຮັບຜົນກະທົບຈາກນໍ້າຖ້ວມມີ 6 ເມືອງ, ສ່ວນຫລາຍແມ່ນເມືອງທີ່ຢູ່ລຽບແມ່ນໍ້າເຊບັ້ງໄຟ, ສ່ວນເມືອງໄຊບົວທອງ ແມ່ນເກີດຈາກແມ່ນໍ້ານ້ອຍ ແລະ ຫ້ວຍ ທີ່ເປັນສາຂາຂອງແມ່ນໍ້າເຊບັ້ງໄຟ. 


ໃນ 6 ເມືອງທີ່ໄດ້ຮັບຜົນກະທົບຈາກໄພນໍ້າຖ້ວມຄັ້ງນີ້ ມີຢູ່ 231 ບ້ານ,ມີເນື້ອທີ່ນາຂອງປະຊາຊົນຖືກນໍ້າຖ້ວມ 16.000  ກວ່າເຮັກຕາ. ນອກຈາກ ນໍ້າຖ້ວມກະທົບບ້ານເຮືອນ ແລະ ນາຂອງປະຊາຊົນແລ້ວ, ຍັງກະທົບໃສ່ເສັ້ນທາງຕ່າງໆ ເປັນຕົ້ນເສັ້ນທາງຫລວງແຫ່ງຊາດເລກທີ 12 ເປ່ເພເກືອບ 4 ກິໂລແມັດ, ເປ່ເພເປັນຍ່ານໆ ແລະ ຢູ່ໄລຍະທາງຫ່າງຈາກຊາຍແດນ 10 ກວ່າກິໂລແມັດ ກໍ່ມີດິນເຈື່ອນໃສ່ທາງເປັນຍ່ານໆ ເຊິ່ງປັດຈຸບັນພວມຂຸ້ນຂ້ຽວປັບປຸງ ເພື່ອໃຫ້ການສັນຈອນໄປມາເປັນປົກກະຕິໃນໄວໆນີ້. ໃນຈໍານວນ 15 ບ້ານທີ່ຖືກຕັດກະແສໄຟຟ້າ, ພາຍຫລັງໄດ້ຂຸ້ນຂ້ຽວແກ້ໄຂ ມາຮອດປັດຈຸບັນ ຍັງເຫລືອ9 ບ້ານ. ໂຮງຮຽນ 154 ແຫ່ງຖືກປິດຊົ່ວຄາວ, ສຸກສາລາ 6 ແຫ່ງ. 


ແຕ່ສະພາບລວມແລ້ວນໍ້າຖ້ວມປີນີ້ ຖືວ່າຍັງຫລຸດປີຜ່ານມາ,ໃນປີນີ້ການສະໜອງຂໍ້ມູນຂ່າວສານໄດ້ຮັບປະຕິບັດຕໍ່ເນື່ອງ ແລະ ປະຊາຊົນກໍ່ມີຄວາມສະດຸ້ງໄວ ເພື່ອກຽມພ້ອມປ້ອງກັນ, ແຕ່ວ່າບັນຫາແມ່ນນໍ້າຂຶ້ນໄວ ເພາະສະພາບດິນຟ້າອາກາດ, ປະຊາຊົນສ່ວນໜຶ່ງເຂົ້າໃຈວ່ານໍ້າຂອງບໍ່ຂຶ້ນ ລະບໍ່ຄຶດວ່ານໍ້າຈະຂຶ້ນໄວ ເພາະເຊື່ອວ່າໝັ້ນລະດັບນໍ້າຂອງ, ແຕ່ຕົວຈິງມັນບໍ່ແມ່ນຄືແນວນັ້ນ, ແຕ່ກໍ່ຍັງດີທີ່ຍັງຮັບປະກັນດ້ານຊີວິດ. ໃນສະເພາະໜ້າ ອັນສຳຄັນໜຶ່ງແມ່ນທາງແຂວງຈະຮີບຮ້ອນເກັບກໍາຄວາມເສຍຫາຍ, ນໍ້າຖ້ວມຢູ່ແຂວງຄຳມ່ວນປີກາຍແມ່ນເດືອນກໍລະກົດ, ແຕ່ປີນີ້ແມ່ນໄລຍະເຂົ້າພວມມານ ແລະ ແຕກຮ່ວງ ກໍ່ຍິ່ງຈະເສຍຫາຍ, ແຕ່ອັນສໍາຄັນກວ່ານັ້ນແມ່ນນັ້ນແມ່ນຕ້ອງໄດ້ເຝົ້າລະວັງພະຍາດ, ປະຊາຊົນສ່ວນໜຶ່ງ ໂດຍສະເພາະເດັກນ້ອຍພາກັນຫລິ້ນນໍ້າ, ດັ່ງນັ້ນຈຶ່ງໄດ້ມີການແນະນໍາໃຫ້ລະວັງ ໂດຍມີແພດລົງແນະນໍາຕົວຈິງ ເຊິ່ງມາເຖິງປັດຈຸບັນຢູ່ເມືອງບົວລະພາ ສັດລ້ຽງເລີ່ມມີບັນຫາແລ້ວ ເຊິ່ງລວມແລ້ວພວກເຮົາໄດ້ມີການກະກຽມ ແລະ ແກ້ໄຂໄປແຕ່ລະບັນຫາ, ໂດຍສະເພາະແມ່ນບັນຫາທີ່ຈະກະທົບສຸຂະພາບຂອງຄົນ ແລະສັດ.


 ໃນດ້ານການຜະລິດ, ພາຍຫລັງນໍ້າຖ້ວມແມ່ນຈະມີການສໍາຫລວດຄືນຊົນລະປະທານ ເຊິ່ງການສໍາຫລວດເບື້ອງຕົ້ນແມ່ນຖືກກະທົບກວ່າ 50 ຫົວງານ, ລາຍລະອຽດແມ່ນຍັງຈະມີການສໍາຫລວດຕື່ມ, ອັນໃດທີ່ປະຊາຊົນສາມາດຮ່ວມແກ້ໄຂໄດ້ ກໍ່ຈະສົມທົບກັນເຮັດກ່ອນ. ໃນໄລຍະປະສົບໄພ, ການນໍາຂັ້ນສູງຂອງພັກ-ລັດ ກໍ່ໄດ້ຊີ້ນໍາມາແຕ່ຫົວທີໃຫ້ເອົາໃຈໃສ່ແທ້ໆ, ໃຫ້ຮີບຮ້ອນຊ່ວຍເຫລືອປະຊາຊົນແຕ່ຫົວທີຄືແນວນີ້ ເຊິ່ງໃນຄວາມເປັນຈິງທາງແຂວງ ແລະ ເມືອງແມ່ນໄດ້ກະກຽມຮັບມືແຕ່ຫົວທີ, ໄດ້ສົ່ງພະນັກງານລົງແຕ່ລະຮາກຖານ, ເງື່ອນໄຂທີ່ມີ ກໍ່ແມ່ນສຸມໃສ່ ເປັນຕົ້ນ ການຜະລິດນໍ້າແມ່ນໄດ້ມີການຕິດຕັ້ງເຄື່ອງຕອງນໍ້າສະອາດເພື່ອແຈກຢາຍປະຊາຊົນພຽງພໍ, ນອກນັ້ນດ້ານເຂົ້າປາອາຫານ ເທົ່າທີ່ມີງົບປະມານ ແລະ ຍາດແຍ່ງການຊ່ວຍເຫລືອກໍ່ແມ່ນໄດ້ແບ່ງປັນໃຫ້ກັນຢ່າງທົ່ວເຖິງ. 

ບັນຫາສໍາຄັນຕໍ່ໄປນີ້ແມ່ນການປູກເຂົ້່ານາແຊງ ເຊິ່ງໄດ້ມີແຜນເຮັດແນວໃດໃຫ້ສາມາດເຮັດທັນລະດູການ ເຊິ່ງການນໍາຂັ້ນສູງພັກ-ລັດ ໄດ້ແນະນໍາເຮັດແນວໃດໃຫ້ສາມາດເລີ່ມປູກໄດ້ໄວເທົ່າໃດຍິ່ງດີ, ໃນໄລຍະເດືອນ 11 ຫລື 12 ຍິ່ງເປັນການດີ. ດັ່ງນັ້ນ, ຈຶ່ງຈະຫ້າງຫາກະກຽມໃຫ້ໄວແຕ່ຫົວທີ ແລະ ການນໍາຂັ້ນສູງພັກ-ລັດ ຍັງມີຄວາມເປັນຫ່ວງແມ່ນເລື່ອງແນວພັນ, ເຊິ່ງກໍ່ໄດ້ມີການປະສານໄປທາງກະຊວງກະສິກໍາ-ປ່າໄມ້ ໄປແລ້ວ, ທັງເຂົ້າ ແລະ ສາລີ. ສ່ວນໃນໄລຍະຍາວນານ ກໍ່ໄດ້ມີການປະສານໄປທາງກະຊວງກະສິກໍາ ແລະ ປ່າໄມ້ ໃຫ້ສົ່ງພະນັກງານວິຊາການລົງມາຊ່ວຍ, ຢູ່ທ້າຍນໍ້າເຊບັ້ງໄຟປີກາຍ, ໂດຍສະເພາະຢູ່ເມືອງໜອງບົກແມ່ນນໍ້າຖ້ວມຢູ່ເດືອນກວ່າ ເຊິ່ງເປັນອູ່ເຂົ້າອູ່ປາ, ຜະລິດເຂົ້າໄດ້ຫລາຍ ຕ້ອງຫາວິທີປ້ອງກັນໄລະຍາວເຊິ່ງມາຮອດເວລານີ້ ນໍ້າພວມຍື່ງຂຶ້ນ ເພາະຢູ່ທ້າຍນໍ້າ, ຕໍ່ໄປຈະມີການວາງແຜນປ້ອງກັນສະພາບນໍ້າຖ້ວມຕື່ມອີກໃນໄລຍະຍາວນານ ເຊິ່ງໃນໄລຍະຜ່ານມາກໍ່ໄດ້ມີການປຶກສາກັນໄວ້ແລ້ວ ເປັນຕົ້ນແມ່ນການສ້າງລະບົບຄອງລະບາຍນໍ້າລັດຊື່ບ່ອນມີເງື່ອນໄຂ ແລະ ອື່ນໆ".

 ມາເຖິງປັດຈຸບັນສະພາບນໍ້າຖ້ວມຢູ່ແຂວງຄຳມ່ວນສ່ວນໜຶ່ງນໍ້າເລີ່ມບົກແຫ້ງລົງ, ແຕ່ກໍ່ຍັງມີຫລາຍເມືອງຍັງໜັກໜ່ວງເປັນຕົ້ນແມ່ນທີ່ຕັ້ງຢູ່ແຄມແມ່ນໍ້າເຊບັ້ງໄຟ.

Post a Comment

0 Comments