ຈັບໄວລຸ້ນຂີ່ລົດກວນເມືອງ-ທ່ຽວເດິກ 54 ຄົນ ມາສຶກສາອົບຮົມ



     ໃນຕອນເຊົ້າວັນທີ 28 ກັນຍາ 2019 ຢູ່ກອງພັນປ້ອງກັນເຄື່ອນທີ່ ປກສ ນະຄອນຫຼວງວຽງຈັນ ພັທ ອິນກອງ ລິດາພອນ ຮັກສາການຫົວໜ້າກອງພັນປ້ອງກັນເຄື່ອນທີ່ ປກສ ນວ ໄດ້ສຶກສາອົບຮົມກຸ່ມໄວລຸ້ນໃນເກນອາຍຸ 13-18 ປີ ທີ່ລະເມີດກົດລະບຽບຈະລາຈອນຕາມທ້ອງຖະໜົນ ຈໍານວນ 54 ຄົນ, ຍິງ 12 ຄົນ; ໃນນັ້ນຂີ່ລົດກວນເມືອງ 20 ຄົນ, ທ່ຽວເດິກ 34 ຄົນ, ຍິງ 12 ຄົນ ແລະ ໄດ້ກັກລົດທີ່ດັດແປງສະພາບເຕັກນິກເຊັ່ນ: ແຕ່ງສຽງດັງ, ໃສ່ຢາງນ້ອຍ ແລະອື່ນໆ ໄດ້ 27 ຄັນ, ໂດຍມີຄະນະກອງຮ້ອຍຂອງກອງພັນ ແລະ ບັນດາຜູ່ປົກຄອງ ພ້ອມດ້ວຍຜູ່ລະເມີດເຂົ້າຮ່ວມ.



     ພັທ ອິນກອງ ລິດາພອນ ໃຫ້ຮູ້ວ່າ: ໃນເວລາ 00:00 ໂມງຂອງວັນທີ 28 ກັນຍາ 2019 ກອງພັນປ້ອງກັນເຄື່ອນທີ່ ປກສ ນວ ໄດ້ນໍາກໍາລັງວິຊາສະເພາະລົງສະກັດກັ້ນ ແລະ ແກ້ໄຂກຸ່ມແກ້ງກວນເມືອງ ຢູ່ຖະໜົນລ້ານຊ້າງ ເມືອງສີໂຄດຕະບອງ ນວ, ສາມາດກັກຕົວໄວ້ລຸ້ນທີ່ຂີ່ລົດກວນເມືອງ ແລະ ທ່ຽວເດິກໄດ້ 54 ຄົນ, ຍິງ 12 ຄົນ ພ້ອມທັງກັກລົດ 27 ຄັນ, ມາສຶກສາອົບຮົມໃນຄັ້ງນີ້ ເພື່ອເຮັດໃຫ້ແຕ່ລະຄົນໄດ້ຮັບຮູ້ ແລະ ເຂົ້າໃຈ ກ່ຽວກັບກົດໝາຍຈະລາຈອນທາງບົກ ແລະ ຄວາມສະຫງົບ,ຄວາມເປັນລະບຽບຮຽບຮ້ອຍຂອງສັງຄົມ ເພື່ອປ້ອງກັນບໍ່ໃຫ້ເກີດອຸບັດຕິເຫດ ແລະ ພ້ອມກັນຈັດຕັ້ງປະຕິບັດຢ່າງເຂັ້ມງວດ ເປັນຕົ້ນແມ່ນ ປະຕິບັດຕາມດຳລັດ 188 ໃນມາດຕາ 3 ວ່າດ້ວຍການຂັບຂີ່ລົດໂດຍອາຍຸບໍ່ເຖີງກະສຽນ, ມາດຕາ 4 ວ່າດ້ວຍການຂັບຂີ່ລົດ, ຜູ່ຊ້ອນທ້າຍລົດຈັກ ບໍ່ໃສ່ໝວກກັນກະທົບ, ມາດຕາ 8 ການຂັບຂີ່ລົດແຂ່ງກັນ ໂດຍບໍ່ໄດ້ຮັບອະນຸຍາດ, ມາດຕາ 27 ການດັດແປງລະບົບເຕັກນິກລົດ ຫຼື ຂາດການກວດກາເຕັກນິກ, ມາດຕາ 28 ສະພາບເຕັກນິກບໍ່ໄດ້ມາດຕະຖານ; ເຊີ່ງບໍ່ຮັບປະກັນຄວາມປອດໄພ, ມາດຕາ 29 ການຂັບຂີ່ລົດທີ່ບໍ່ມີເອກະສານຄົບຖ້ວນ ເຊັ່ນ: ໃບຂັບຂີ່, ໃບທະບຽນ,  ໃບກວດກາເສຍຄ່າທາງ, ໃບປະກັນໄພ, ມາດຕາ 30 ການຂັບຂີ່ລົດບໍ່ຖືເອກະສານລົດຈະຖືກປັບໃໝ, ມາດຕາ 31 ການຂັບຂີ່ໂດຍໃຊ້ເອກະສານໝົດກຳນົດຈະຖືກປັບໃໝ, ມາດຕາ 32 ການຂັບຂີ່ບໍ່ຕິດປ້າຍທະບຽນ, ຕິດປ້າຍທະບຽນບໍ່່ຖືກ ຫຼື ໝົດອາຍຸການນໍາໃຊ້ ແລະ ກົດໝາຍເລກທີ 23/ສພຊ, ລົງວັນທີ 12 ທັນວາ 2012 ວ່າດ້ວຍການຈະລາຈອນທາງບົກ, ຄຳສັ່ງເລກທີ 829/ ປກສ, ລົງວັນທີ 21 ມັງກອນ 2015 ວ່າດ້ວຍການສະກັດກັ້ນ ແລະ ແກ້ໄຂກຸ່ມແກ້ງຂີ່ລົດກວນເມືອງ, ແລ່ນລົດໄວ ແລະ ດັດແປງສະພາບເຕັກນິກລົດ ຫຼື ບໍ່ຕິດປ້າຍທະບຽນ. 




     ຫຼັງຈາກນັ້ນ ກໍ່ໄດ້ນໍາຕົວຜູ່ລະເມີດ 54 ຄົນ ມາເຮັດບົດບັນທຶກປ່ຽນແປງການກະທໍາຜິດດັ່ງກ່າວ ແລະ ແຈ້ງໃຫ້ບັນດາຜູ່ປົກຄອງຂອງຜູ່ລະເມີດ ນໍາລົດໄປສ້ອມແປງໃຫ້ຢູ່ໃນສະພາບເດີມ ກ່ອນເອົາໄປນໍາໃຊ້ຕາມປົກກະຕິ ພັທ ອິນກອງ ລິດາພອນ ຍັງໄດ້ກ່າວເນັ້ນໃຫ້ບັນດາຜູ່ລະເມີດ ທີ່ໄດ້ຮັບການສຶກສາອົບຮົມໃນຄັ້ງນີ້ວ່າ: ຈົ່ງພ້ອມກັນປະຕິບັດກົດລະບຽບຈະລາຈອນ ແລະ ບົດບັນທຶກຢ່າງເຂັ້ມງວດ ຖ້າເຈົ້າໜ້າທີ່ກວດພົບເຫັນວ່າຍັງຜິດອີກ ແມ່ນຈະປະຕິບັດຕາມລະບຽບກົດໝາຍ ໂດຍບໍ່ມີຂໍ້ຍົກເວັ້ນ.

Post a Comment

0 Comments