ສປປ ລາວ ມີເຂື່ອນໄຟຟ້າແລ້ວ 61 ແຫ່ງ ແລະ ອີກ 36 ແຫ່ງກໍາລັງສ້າງ


ປັດ­ຈຸ­ບັນ ປະ­ເທດ​ລາວ​ມີ​ແຫຼ່ງ​ຜະ­ລິດ​ພະ­ລັງ­ງານ​ໄຟ­ຟ້າ​ທັງ​ໝົດ 61 ແຫ່ງ ລວມ​ກຳ­ລັງ​ການ​ຕິດ​ຕັ້ງ 7207,24 ເມ​ກາ​ວັດ ສາ­ມາດ​ຜະ­ລິດ​ພະ­ລັງ­ງານ​ໄຟ­ຟ້າ​ໄດ້ 37.366,66 ກິ​ກາ​ວັດ​ໂມງ​ຕໍ່​ປີ ໃນ​ນີ້ ມີ​ເຂື່ອນ​ຜະ­ລິດ​ກະ­ແສ​ໄຟ­ຟ້າ​ຂະ­ໜາດ​ກາງ​ຫາ​ໃຫຍ່ 32 ແຫ່ງ.

ເຂື່ອນ​ຂະ­ໜາດ​ນ້ອຍ 15 ເມ​ກາ​ວັດ​ລົງ​ມາ​ມີ 21 ແຫ່ງ ໄຟ­ຟ້າ​ຖ່ານ​ຫີນ 1 ໂຄງ­ການ ໄຟ­ຟ້າພະ­ລັງ­ງານ​ທົດ​ແທນ 2 ແຫ່ງ ແລະ ໂຄງ­ການ​ໄຟ­ຟ້າ​ແສງ​ຕາ­ເວັນ 5 ແຫ່ງ ພ້ອມ​ນີ້ ຍັງ​ມີ​ໂຄງ­ການ​ກໍ່­ສ້າງ​ແຫຼ່ງ​ຜະ­ລິດ​ພະ­ລັງ­ງານ​ໄຟ­ຟ້າ​ທີ່​ພວມ​ດຳ­ເນີນ​ການ​ກໍ່­ສ້າງ ແລະ ຄາດ​ວ່າ​ຈະ​ສຳ­ເລັດ​ປີ 2019-2020 ຈຳ­ນວນ 36 ໂຄງ­ການ ມີ​ກຳ­ລັງ​ຕິດ​ຕັ້ງ 4.184,10 ເມ​ກາ​ວັດ ສາ­ມາດ​ຜະ­ລິດ​ພະ­ລັງ­ງານ​ໄດ້ 20.892,99 ກິ​ກາ​ວັດ​ໂມງ​ຕໍ່​ປີ.



​ຜົນ­ສຳ­ເລັດ​ຂອງ​ບັນ­ດາ​ໂຄງ­ການ​ພັດ­ທະ­ນາ​ອຸດ­ສາ­ຫະ­ກຳ​ໄຟ­ຟ້າ​ຢູ່​ປະ­ເທດ​ເຮົາ ໃນ​ໄລ­ຍະ​ຜ່ານ​ມາ ມີ​ຄວາມ​ສຳ­ຄັນ ມີ​ລັກ­ສະ­ນະ​ເປັນ​ພື້ນ​ທີ່​ໜັກ​ແໜ້ນ​ໃຫ້​ແກ່​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຂອງ​ປະ­ເທດ ແຕ່​ການ​ພັດ­ທະ­ນາ​ອຸດ­ສາ­ຫະ­ກຳ​ພະ­ລັງ­ງານ ກໍ​ຄື ການ​ດຳ­ເນີນ​ກິດ­ຈະ­ການ​ກໍ່­ສ້າງ ແລະ ຕິດ​ຕັ້ງ​ໄຟ­ຟ້າ​ຍັງ​ມີ​ຈຸດ​ອ່ອນ ແລະ ຂໍ້­ຄົງ­ຄ້າງ​ຫຼາຍ​ດ້ານ​ທີ່​ຈະ​ຕ້ອງ​ເອົາ­ໃຈ­ໃສ່​ປັບ­ປຸງ​ແກ້​ໄຂ​ໃຫ້​ສອດ­ຄ່ອງ.

​ຫຼາຍ​ບັນ­ຫາ​ທີ່​ເປັນ​ສິ່ງ​ທ້າ​ທາຍ​ທີ່​ຈະ​ຕ້ອງ​ເອົາ­ໃຈ­ໃສ່​ປັບ­ປຸງ​ແກ້​ໄຂ ເປັນ­ຕົ້ນ ການ​ພັດ­ທະ­ນາ​ບາງ​ໂຄງ­ການ​ບໍ່​ດຳ­ເນີນ​ໄປ​ຕາມ​ແຜນ­ການ ຂັ້ນ​ຕອນ​ທີ່​ໄດ້​ກຳ­ນົດ​ຢູ່​ໃນ​ລະ­ບຽບ ແລະ ກົດ ໝາຍ​ວ່າ​ດ້ວຍ​ໄຟ­ຟ້າ ມີ​ລັກ­ສະ­ນະ​ຟ້າວ​ຟັ່ງ ເຫຼືອ​ບໍ່​ພໍ ຫຼາຍ​ໂຄງ­ການ​ກໍ່­ສ້າງ​ເຂື່ອນ​ໄຟ­ຟ້າ​ທາງ​ພາກ​ເໜືອ​ສຳ­ເລັດ ແຕ່​ການ​ພັດ­ທະ­ນາ​ລະ­ບົບ​ສາຍ​ສົ່ງ-ສະ­ຖາ­ນີ ເພື່ອ​ຮອງ​ຮັບ​ການ​ລຳ­ລຽງ​ພະ­ລັງ­ງານ​ໄຟ​ຟ້າ­ລົງ​ມາ​ທາງ​ພາກ​ກາງ ແລະ ພາກ​ໃຕ້​ຊ້ຳ​ຜັດ​ຂະ­ຫຍາຍ­ຕົວ​ບໍ່​ທັນ​ກັບ​ຄວາມ​ຕ້ອງ­ການ ເຮັດ​ໃຫ້​ບາງ​ເຂື່ອນ​ໄດ້​ປ່ອຍ​ນ້ຳ​ໄຫຼ​ຖິ້ມ​ໂດຍ​ບໍ່​ໄດ້​ຜະ­ລິດ​ພະ­ລັງ­ງານ​ໄຟ­ຟ້າ ແຕ່​ກົງ­ກັນ­ຂ້າມ​ທາງ​ພາກ​ກາງ ພາກ​ໃຕ້ ຊ້ຳ​ຜັດ​ຂາດ­ເຂີນ​ພະ­ລັງ­ງານ ຈຳ­ເປັນ​ຕ້ອງ​ນຳ​ເຂົ້າ​ຈາກ​ຕ່າງ­ປະ­ເທດ




ນອກ​ນີ້ ການ​ຂະ­ຫຍາຍ​ລະ­ບົບ​ຕາ​ຂ່າຍ​ໄຟ­ຟ້າ ໄປ​ສູ່​ຊົນ­ນະ­ບົດ​ເຂດ​ຫ່າງ​ໄກ​ສອກ­ຫຼີກ ໄລ­ຍະ​ຜ່ານ​ມາ ມີ​ມູນ​ຄ່າ​ສູງ ການ­ຈັດ­ຕັ້ງ​ປະ­ຕິ­ບັດ​ຊັກ​ຊ້າ ສ່ວນ​ໃຫຍ່​ແມ່ນ​ລໍ­ຖ້າ​ງົບ­ປະ­ມານ​ລັດ ລວມ​ໄປ​ເຖິງ​ການ​ບໍ­ລິ­ການ​ຕິດ​ຕັ້ງ​ໄຟ­ຟ້າ ແລະ ບັນ­ຫາ​ອື່ນໆ ທີ່​ຈະ​ຕ້ອງ​ພ້ອມ​ກັນ​ສຸມ​ໃສ່​ຄົ້ນ­ຄວ້າກວດ­ກາ ຕີ​ລາ­ຄາ​ໜ້າ​ວຽກ​ໃຫ້​ລະ­ອຽດ​ກັບ​ການ­ເຄື່ອນ­ໄຫວ​ພຶດ­ຕິ​ກຳ​ຕົວ​ຈິງ ເພື່ອ​ຫາ​ທາງ​ແກ້​ໄຂ​ໃຫ້​ຖືກ­ຕ້ອງ​ສອດ­ຄ່ອງ ກັບ​ລະ­ບຽບ​ກົດ­ໝາຍ​ວ່າ​ດ້ວຍ​ໄຟ­ຟ້າ ເພື່ອ​ພັດ­ທະ­ນາ​ຂອດ​ວຽກ​ງານ​ຕ່າງໆ ໃຫ້​ມີ​ປະ­ສິດ­ທິ­ພາບ​ດີ​ຂຶ້ນ​ກວ່າ​ເກົ່າ

ໂດຍ: ໜັງສືພິມວຽງຈັນໃໝ່

Post a Comment

0 Comments