ສປ ຈີນກະກຽມສະຫລອງວັນຊາດຄົບຮອບ 70 ປີຢ່າງຍິ່ງໃຫຍ່



 
ຂປລ. ລັດຖະບານ ສປ ຈີນປະກາດອາທິດນີ້ວ່າໃນວັນທີ 1 ຕຸລາ 2019 ຈະສະເຫລີມສະຫລອງວັນສ້າງຕັ້ງສາທາລະນະລັດ ປະຊາຊົນຈີນຄົບຮອບ 70 ປີ ຢ່າງຍິ່ງໃຫຍ່ກັບການກ້າວຂຶ້ນເປັນຜູ້ນໍາເສດເຖດກະກິດເບີ 2 ຂອງໂລກ ຮອງຈາກ ສະຫະລັດອາເມລິກາ ແລະ ຄາດວ່າຈະໃຊ້ກໍາລັງພົນຫລາຍກວ່າ 1 ແສນກວ່າຄົນເຂົ້າຮ່ວມສະແດງຂະບວນສວນສະໜາມກ້ອນກໍາລັງ ແລະ ກິດຈະກໍາປິ່ນອອ້ມ ຂະນະທີ່ລັດຖະບານຈີນຢືນຢັນວ່າປີນີ້ບໍ່ໄດ້ເຊື້ອເຊີນບັນດາກອງກໍາລັງເພື່ອນມິດຈາກຕ່າງປະເທດ.



 
 
ລັດຖະບານ ສປ ຈີນເປີດເຜີຍວ່າ: ຕະຫລອດ 70 ປີຂອງສ້າງຕັ້ງສາທາລະນະລັດ ປະຊາຊົນຈີນໄດ້ສະທ້ອນໃຫ້ເຫັນການບຸກບືນຜ່ານຜ່າຄວາມຫຍຸ້ງຍາກລໍາບາກ ແລະ ຜົນສໍາເລັດນາໆປະການທີ່ພັກ-ລັດ ແລະ ປະຊາຊົນຈີນໄດ້ຮ່ວມກັນອຸທິດເລືອດເນື້ອ, ເຫື່ອແຮງ, ສະຕິປັນຍາ ແລະ ກໍາລັງວັງຊາຢ່າງບໍ່ຮູ້ອິດບໍ່ຮູ້ເມື່ອຍ ເຊິ່ງຍາດໄດ້ມາ ແລະ ນໍາພາປະເທດຊາດສູ່ເປົ້າໝາຍທີ່ວາງໄວ້ດ້ວຍປະລິມານ ແລະ ຄຸນນະພາບຢ່າງໜັກແໜ້ນ.



 
ໃນວັນທີ 24 ກັນຍາ 2019 ທີ່ນະຄອນຫລວງປັກກິ່ງ ສປ ຈີນ, ບັນດາຄະນະນໍາຮັບຜິດຊອບການກະກຽມງານສະຫລອງວັນສ້າງຕັ້ງ ສປ ຈີນໄດ້ຈັດພິທີຖະແຫລງຂ່າວເພື່ອຮັບຕ້ອນວັນດັ່ງກ່າວໂດຍມີນັກຂ່າວພາຍໃນ ແລະ ຕ່າງປະເທດຫລາຍຮ້ອຍຄົນ ລວມທັງນັກຂ່າວຕາງໜ້າສໍານັກຂ່າວສານປະເທດລາວເຂົ້າຮ່ວມ ໃນໂອກາດດັ່ງກ່າວ ທ່ານ ໜິງ ຈືຊື (Ning Jizhe)  ຮອງຫົວໜ້າ ຄະນະກຳມະການພັດທະນາ ແລະ ປະຕິຮູບແຫ່ງຊາດໄດ້ກ່າວວ່າ: ຕະຫລອດ 70 ພາຍໃຕ້ການນໍາພາຂອງພັກກອມມູນິດຈີນຜ່ານມານີ້ຍອມຮັບວ່າຊີວິດການເປັນຢູ່ຂອງປະຊາຊົນຈີນໄດ້ຮັບການປັບປຸງດີຂຶ້ນຢ່າງຈະແຈ້ງ ແລະ ເຮັດປະຊາຊົນຈີນຖ້ວນໜ້າກິນອິ່ມນຸ່ງອຸ່ນ ໃນນັ້ນຜະລິດຕະພັນລວມພາຍໃນຂອງ ສປ ຈີນ ຫລື ຈີດີພີໄດ້ຂະຫຍາຍຕົວແບບກ້າວກະໂດດຈາກ 67.91 ຕື້ຢວນໃນປີ 1952ມາເປັນ 90.03 ລ້ານໆຢວນໃນປີ 2018 ແລະ  ລາຍໄດ້ຕໍ່ຫົວຄົນຈາກ 119 ຢວນ ມາເປັນ 64.600 ຢວນ; ສປ ຈີນກາຍເປັນປະເທດທີ່ມີເສດຖະກິດຂະຫຍາຍຕົວໃຫຍ່ເປັນອັນດັບທີ 2 ຂອງໂລກ; ໄລຍະທາງລົດໄຟທີ່ມີການໃຫ້ການບໍລິການບັນລຸໄດ້ເຖິງ 132.000 ກິໂລແມັດ, ໄລຍະທາງລົດໄຟຄວາມໄວສູງໄດ້ບັນລຸ 30.000 ກິໂລແມັດ, ເປັນອັນດັບທີ 2 ແລະອັນດັບ ໜຶ່ງ ຂອງໂລກ; ປະຊາກອນຫລາຍກວ່າ 80 ລ້ານຄົນທີ່ອາໃສຢູ່ເຂດຊົນນະບົດຂອງຈີນໄດ້ຮັບການຫລຸດຜ່ອນຈາກຄວາມທຸກຍາກ; ການປະກັນໄພດ້ານການແພດ ແລະ ການປະກັນຜູ້ອາວຸໂສຂັ້ນພື້ນຖານໄດ້ກວມເອົາຫລາຍກ່ວາ 1 ຕື້ຄົນ.
 


ແນວໃດກໍດີ ອີງຕາມຂໍ້ມູນພື້ນຢ່າງເປັນທາງການຂອງລັດຖະບານ ສປ ຈີນຍັງເປີດເຜີຍວ່າ: ມາຮອດປັດຈຸບັນ ສປ ຈີນສາມາດຫລຸດຜ່ອນ ແລະ ລົບລ້າງຄວາມທຸກບັນລຸຫລາຍກວ່າ 750 ລ້ານຄົນ; ສປ ຈີນໄດ້ບັນລຸຂໍ້ຕົກ 17 ສະບັບດ້ານການຄ້າເສລີກັບ 25 ປະເທດ; ສປ ຈີນປະສົບຜົນສໍາເລັດພາຍໃຕ້ຂໍ້ລິເລີ່ມໜຶ່ງແລວໜຶ່ງເສັ້ນທາງກັບຫລາຍກວ່າ 160 ປະເທດ ໃນນັ້ນມີບັນດາປະເທດເພື່ອນມິດ, ຂົງເຂດພາກພື້ນ-ສາກົນ, ອົງການຈັດຕັ້ງສາກົນ ແລະ ສປ ຈີນພວມຫ້າງຫາກະກຽມເປັນເຈົ້າພາບມະຫະກໍາກິລາໂອລິມປິກພາຍໃນ 2022.
 
ໃນລະຫວ່າງການສະເຫລີມສະຫລອງວັນດັ່ງກ່າວນີ້ຈະມີການຝຶກຊ້ອມກະກຽມກ້ອນກໍາລັງສວນສະໜາມ, ສະແດງກໍາລັງທາງອາກາດ, ສະແດງສິລະປະ,  ການນໍາຂັ້ນສູງຈະເຄື່ອນຢ້ຽມຢາມພົບປະພໍ່ແມ່ປະຊາຊົນ ແລະ ຍ້ອງຍໍຜູ້ມີຜົນງານດີເດັ່ນຕໍ່ປະເທດຊາດ. ສ່ວນການເດີນຂະບວນສະແດງກ້ອນກໍາລັງ ແລະ ໂຮມຊຸມນຸມໃຫຍ່ເພື່ອຂໍ່ານັບຮັບຕ້ອນວັນດັ່ງກ່າວຄາດວ່າຈະມີຜູ້ເຂົ້າຮ່ວມສວນສະໜາມສະແດງກ້ອນກໍາລັງຈາກກອງທັບ, ພະນັກງານ-ຜູ້ອາວຸໂສ, ນັກຮຽນຮູ້ປັນຍາຊົນ, ເອກະຊົນ ແລະ ພາກລັດກ່ຽວຂ້ອງປະມານ 1 ແສນກວ່າຄົນ ນອກຈາກນັ້ນຍັງຈະມີປະຊາຊົນຈີນເຂົ້າຮ່ວມຊົມນັບລ້ານຄົນໃນວັນທີ 1 ກັນຍາ 2019 ນີ້ທີ່ນະຄອນຫລວງປັກກິ່ງ ສປ ຈີນ.
 ໂດຍ: ເກີດຂວັນໃຈ ມາລີຈັນສີ

Post a Comment

0 Comments