ແຕ່ງຕັ້ງຊັບຊ້ອນພະນັກງານຫຼັກແຫຼ່ງພະແນກການເງິນແຂວງຫຼວງພະບາງ


ປະກາດແຕ່ງຕັ້ງຊັບຊ້ອນພະນັກງານຫຼັກແຫຼ່ງພະແນກການເງິນແຂວງຫຼວງພະບາງ
    
    ພິທີປະກາດການຈັດຕັ້ງຊັບຊ້ອນພະນັກງານຫຼັກແຫຼ່ງພະແນກການເງິນແຂວງ, ສ່ວຍສາອາ ກອນ ແລະ ວິທະຍາໄລການເງິນພາກເໜືອ ໄດ້ຈັດຂຶ້ນໃນຕອນເຊົ້າ ວັນທີ 6 ກັນຍາ 2019 ນີ້ ຢູ່ຫ້ອງປະ ຊຸມພະແນກການເງິນແຂວງ ໂດຍການເປັນປະທານຮ່ວມຂອງ ທ່ານ ຄຳຂັນ ຈັນທະວີສຸກ ເຈົ້າແຂວງໆຫຼວງພະບາງ, ທ່ານ ບຸນໂຈມ ອຸບົນປະເສີດ ຮອງລັດຖະມົນຕີກະຊວງການເງິນ, ມີຫົວໜ້າກົມ, ຫົວໜ້າພະແນກການຂອງແຂວງ, ພ້ອມດ້ວຍພະນັກງານໃນແຕ່ລະຂະແໜງການເຂົ້າຮ່ວມ.

     ໃນພິທີຫົວໜ້າກົມຈັດຕັ້ງ-ພະນັກງານ ກະຊວງການເງິນ ໄດ້ຂຶ້ນຜ່ານຂໍ້ຕົກລົງຂອງທ່ານລັດຖະ ມົນຕີກະຊວງການເງິນ ວ່າດ້ວຍການຍົກຍ້າຍ, ຊັບຊ້ອນພະນັກງານຫຼັກແຫຼ່ງໃນຂະແໜງການເງິນ ຂອງແຂວງຫຼວງພະບາງ ໂດຍຍົກຍ້າຍເອົາ ທ່ານ ສີສຸພັນ ສີສະຫວັດ ກຳມະການພັກແຂວງ ຫົວໜ້າ ພະແນກການເງິນແຂວງ ໄປຮັບໜ້າທີໃໝ່ຢູ່ພະແນກວິທະຍາສາດ ແລະ ເຕັກໂນໂລຊີແຂວງ, ຍົກ ຍ້າຍ ທ່ານ ນາງ ບົວຈີນ ຈັນທະພອນ ຫົວໜ້າສ່ວຍສາອາກອນປະຈຳແຂວງ ມາຮັບໜ້າທີໃໝ່ຢູ່ພະແນກການເງິນແຂວງ, ຍົກຍ້າຍ ແລະ ແຕ່ງຕັ້ງ ທ່ານ ຄຳມົນ ຈັນມະວົງ ຮອງຫົວໜ້າພະແນກການເງິນແຂວງ ເປັນຫົວໜ້າສ່ວຍສາອາກອນປະຈຳແຂວງ, ຍົກຍ້າຍທ່ານ ພູຄຳ ແສງດາໄລ ຮອງຜູ້ອໍາ ນວຍວິທະຍາໄລການເງິນພາກເໜືອ ມາຮັບໜ້າທີໃໝ່ຢູ່ພະແນກການເງິນແຂວງ ແລະ ປະກາດແຕ່ງຕັ້ງ ທ່ານ ແກ່ນຈັນ ບຸນເຕີມ ຮອງຫົວໜ້າສະຖາບັນເສດຖະກິດ-ການເງິນ ເປັນຜູ້ອຳນວຍການວິທະ ຍາໄລການເງິນພາກເໜືອ, ແຕ່ງຕັ້ງ ທ່ານ ໄຊເສດຖາ ໄຊຊະນິດ ຫົວໜ້າພະແນກຈັດຕັ້ງ ສະຖາບັນເສດຖະກິດ-ການເງິນ ແລະ ທ່ານ ພອນໄຊ ສີອຸດົມພັນ ຫົວໜ້າຂະແໜງວິຊາການ ເປັນຮອງຜູ້ອຳ ນວຍການວິທະຍາໄລການເງິນພາກເໜືອ. ຈາກນັ້ນ ຕາງໜ້າຄະນະຈັດຕັ້ງແຂວງ ໄດ້ຂຶ້ນຜ່ານຂໍ້ຕົກລົງຂອງທ່ານເຈົ້າແຂວງຫຼວງພະບາງ ວ່າດ້ວຍການແຕ່ງຕັ້ງ, ຍົກຍ້າຍຊັບຊ້ອນ ບ່ອນປະຈຳການໃນຂະ ແໜງການເງິນແຂວງ ໂດຍຍົກຍ້າຍເອົາ ທ່ານ ສີສຸພັນ ສີສະຫວັດ ກຳມະການພັກແຂວງ ຫົວໜ້າພະແນກການເງິນແຂວງ ໄປປະຈຳການຢູ່ພະແນກວິທະຍາສາດ ແລະ ເຕັກໂນໂລຊີແຂວງ, ປະກາດແຕ່ງຕັ້ງເອົາ ທ່ານ ຄິນຄຳ ເລັ່ງສະຫວັດ ຮອງຫົວຫນ້າພະແນກການເງິນແຂວງ ຂຶ້ນເປັນຮັກສາການເລຂາຄະນະພັກຮາກຖານ, ຫົວໜ້າພະແນກການເງິນແຂວງ,  ແລະ ປະກາດແຕ່ງຕັ້ງທ່ານ ນາງ ບົວຈີນ ຈັນທະພອນ ແລະ ທ່ານ ພູຄຳ ແສງດາໄລ ເປັນຮອງຫົວໜ້າພະແນກການເງິນແຂວງ.

 ຕອນທ້າຍ ທ່ານ ຄຳຂັນ ຈັນທະວີສຸກ ເຈົ້າແຂວງຫຼວງພະບາງ ໄດ້ມີຄຳເຫັນໂອ້ລົມ ເຊິ່ງທ່ານໄດ້ເນັ້ນໃຫ້ພະນັກງານທີຖືກແຕ່ງຕັ້ງ ແລະ ຍົກຍ້າຍ ຕ້ອງໄດ້ສືບຕໍ່ເພີມທະວີຄວາມຮັບ ຜິດຊອບຕໍ່ ໜ້າທີການເມືອງໃຫ້ສູງຂຶ້ນຕື່ມໃນການຊີ້ນຳໆພາ, ເປັນເຈົ້າການຝຶກຝົນຫຼໍ່ຫຼອມຕົນເອງທາງດ້ານການເມືອງ-ແນວຄິດ ຄຸນສົມບັດສິນທຳປະຕິວັດໃຫ້ມີຄວາມໜັກແໜ້ນເຂັ້ມແຂງ, ເອົາໃຈໃສ່ປັບປຸງແບບແຜນນຳພາແບບແຜນວິທີເຮັດວຽກໃຫ້ສອດຄອງ ແລະ ແທດເໜາະກັບສະພາບຕົວຈິງ, ເພີ່ມທະວີຄວາມສາມັກຄີເປັນເອກະພາບ ເຮັດວຽກເປັນໜູ່ຄະນະ ລວມສູນປະຊາທິປະໄຕ ມີການແບ່ງງານຄືນ ໃໝ່ໃຫ້ບຸກຄົນຮັບຜິດຊອບຢ່າງລະອຽດ, ສືບຕໍ່ເປັນເຈົ້າການປະຕິບັດລະບຽບ-ກົດໝາຍຢ່າງເຂັ້ມງວດ, ເອົາໃຈໃສ່ແກ້ໄຂປະກົດການຫຍໍ້ທໍ້ຕ່າງໆໃນຂົງເຂດທີຕົນເອງຮັບຜິດຊອບໃຫ້ຫຼຸດລົງເທື່ອລະກ້າວ, ສືບຕໍ່ສູ້ຊົນຮັບປະກັນເຮັດໃຫ້ການເກັບລາຍຮັບຂອງແຂວງໄດ້ຕາມແຜນ, ຄຸ້ມຄອງລາຍຈ່າຍ ແລະ ອັດຊອງວ່າງຂອງການຮົ່ວໄຫຼ ໂດຍຖືກເອົາຫຼັກການປະຢັດ.  ສໍາລັບການປັບປຸງຊັບຊ້ອນຈັດວາງຕໍາແໜ່ງພະນັກງານຫຼັກແຫຼ່ງໃນຂະແໜງການເງິນແຂວງຄັ້ງນີ້ຖືວ່າເປັນເລື່ອງປົກກະຕິ ເພື່ອແນໃສ່ເຮັດໃຫ້ການຮັບໃຊ້ໜ້າທີການເມືອງ ສອດຄອງຕາມແນວທາງນະໂຍບາຍຂອງພັກ-ລັດ ແລະ ເປັນການກະກຽມບຸກຄະລາກອນໃຫ້ແກ່ການດຳເນີກອງປະຊຸມໃຫຍ່ຂອງແຂວງ ເພື່ອຮັບປະກັນເຮັດໃຫ້ແຂວງຫຼວງພະບາງ ມີການພັດທະນາດີຂຶ້ນກວ່າເກົ່າ.

Post a Comment

0 Comments