ຜູ້ປະສົບໄພນໍ້າຖ້ວມຢູ່ແຂວງຈໍາປາສັກຍັງຕ້ອງການຄວາມຊ່ວຍເຫຼືອ



ຂປລ. ເຖິງວ່າສະພາບນໍ້າຖ້ວມຢູ່ໃນນະຄອນປາກເຊ  ແລະ ອີກ 9 ເມືອງຂອງແຂວງຈໍາປາສັກ ນໍ້າໄດ້ບົກແຫ້ງລົງສ່ວນຫລາຍ, ປະຊາຊົນທີ່ຍົກຍ້າຍອອກຈາກເຮືອນໄປຢູ່ບ່ອນປອດໄພໃນໄລຍະນໍ້າຖ້ວມໄດ້ພາກັນກັບຄືນເຂົ້າໄປອະນາໄມເຮືອນຊານຂອງຕົນແລ້ວ, ຍັງພຽງເລັກນ້ອຍທີ່ນໍ້າຍັງມີຖ້ວມຂັງ ເຊິ່ງຄາດວ່າຖ້າບໍ່ມີຝົນຕົກລົງມາອີກໃນວັນສອງວັນນີ້ ນໍ້າຖ້ວມທຸກບ່ອນຈະບົກແຫ້ງ. ຂະນະດຽວກັນ ການຟື້ນຟູພາຍຫລັງນໍ້າຖ້ວມແມ່ນພວມດໍາເນີນຢ່າງຂຸ້ນຂ້ຽວ ເປັນຕົ້ນການເຮັດອະນາໄມເຮືອນຊານບ້ານຊ່ອງ, ສໍານັກງານອົງການ, ຖະໜົນ ແລະ ອື່ນໆ. ເຖິງຢ່າງໃດກໍ່ດີ ຄວາມຕ້ອງການເຄື່ອງຊ່ວຍເຫລືອກໍ່ຍັງມີຫລາຍ ທັງເຂົ້າສານ, ອາຫານແຫ້ງ, ນໍ້າ, ຢາປົວພະຍາດ ແລະ ອື່ນໆ.

   ທ່ານ ບຸນຖອງ ດີວິໄຊ ເຈົ້າແຂວງຈໍາປາສັກ ໃຫ້ສໍາພາດວ່າ: ການໃຫ້ຄວາມຊ່ວຍເຫລືອປະຊາຊົນທີ່ໄດ້ຮັບຜົນກະທົບຈາກນໍ້າຖ້ວມແມ່ນໄດ້ຮັບການປະຕິບັດເປັນຢ່າງດີ. ພາຍຫລັງສະພາບເກີດຂຶ້ນ ກໍ່ໄດ້ຮັບຄວາມເຫັນໃຈ ແລະການຊ່ວຍເຫລືອຕະຫລອດມາ, ໂດຍສະເພາະການນໍາຂັ້ນສູງ ເປັນຕົ້ນທ່ານນາຍົກລັດຖະມົນຕີ ກໍ່ໄດ້ສະແດງຄວາມເຫັນໃຈ ແລະ ໄດ້ລົງມາຢ້ຽມຢາມ, ໃຫ້ການຊ່ວຍເຫລືອແກ່ປະຊາຊົນທີ່ໄດ້ຮັບຜົນກະທົບ. ນອກນັ້ນ ກໍ່ຍັງມີບັນດາຫົວໜ່ວຍທຸລະກິດ, ບຸກຄົນ, ນິຕິບຸກຄົນ ຕ່າງໆໄດ້ໃຫ້ການຊ່ວຍເຫລືອໃນດ້ານຕ່າງໆຕື່ມອີກ. ມາຮອດປັດຈຸບັນ ຖ້າທຽບໃສ່ເມື່ອກ່ອນແລ້ວ ປະຊາຊົນ ບໍ່ໄດ້ຫົນຫວາຍຄືແຕ່ກ່ອນແລ້ວຍ້ອນວ່າເຂົາເຈົ້າໃຫ້ຮັບຄວາມເຫັນອົກເຫັນໃຈ, ມີການນໍາຂັ້ນເທິງ ຕະຫລອດຮອດທຸກພາກສ່ວນເປັນຫ່ວງ ແລະໃຫ້ການຊ່ວຍເຫລືອ, ແຕ່ວ່າເຂົາເຈົ້າກໍ່ມີຄວາມເປັນຫ່ວງກັບສິ່ງທີ່ເຂົາເຈົ້າໄດ້ເສຍຫາຍໄປ ເຊິ່ງພວກເຮົາກໍ່ໄດ້ພະຍາຍາມຟື້ນຟູໃຫ້ດີທີ່ສຸດ, ການຊ່ວຍເຫລືອໄດ້ໄປຮອດໄປເຖິງໝົດ, ແຕ່ກໍ່ຍັງມີຄວາມຕ້ອງການຫລາຍຢູ່ ທັງ ເຂົ້າ, ນໍ້າ, ຢາປົວພະຍາດ ແລະ ເຄື່ອງນຸ່ງຫົ່ມ. ເພາະບາງຄົນໄດ້ແຕ່ເຄື່ອງຄາຄີງ, ດຽວນີ້ກັບເມືອເຮືອນແມ່ນອາໄສການຊ່ວຍເຫລືອຈາກພາກລັດ, ນໍາພີ່ນ້ອງ ໝູ່ຄູ່.

    ທ່ານເຈົ້າແຂວງຈໍາປາສັກ ຍັງໄດ້ເວົ້າເຖິງສະພາບນໍ້າຖ້ວມທີ່ເກີດຂຶ້ນວ່າ: ຖ້າວ່າເບິ່ງໃສ່ໄພນໍ້າຖ້ວມທີ່ເຄີຍເກີດຂຶ້ນໃນປີ 1978 ແມ່ນໜັກເທົ່າກັນ, ແຕ່ເທື່ອນີ້ນໍ້າໄຫລມາແຮງກວ່າ, ຍ້ອນວ່າປະລິມານນໍ້າຈາກຝົນຕົກແຮງຢູ່ທາງຕົ້ນນໍ້າໂຮມເປັນກ້ອນໃຫຍ່ໄຫລລົງມາໄວ ແລະແຮງ ຈຶ່ງເຮັດໃຫ້ປະຊາຊົນຂົນເຄື່ອງຂອງອອກເຮືອນບໍ່ທັນ ຖືກ ນໍ້າຖ້ວມ ຈໍານວນຫລວງ ຫລາຍ, ນັບທັງລົດລາພາຫະນະຕ່າງໆ ເຊິ່ງມັນເປັນປະກົດການທາງທໍາມະຊາດ.
        
ນໍ້າຖ້ວມຢູ່ແຂວງຈໍາປາສັກ ແມ່ນຍ້ອນໄດ້ຮັບຜົນສະທ້ອນຈາກພາຍຸໝູນເຂດຮ້ອນໂພດຸ ແລະ ກາຈິກິ ພັດເຂົ້າພາກກາງ ແລະ ພາກໃຕ້ຂອງລາວໃນໄລຍະທ້າຍເດືອນສິງຫາຫາວັນທີ 5 ກັນຍາ2019, ເຮັດໃຫ້ມີຝົນຕົກລິນຫລາຍວັນ ເຊິ່ງຢູ່ແຂວງຈໍາປາສັກ  ໄດ້ມີນໍ້າປ່າໄຫລຊຸແຮງລົງໃສ່ຕອນເໜືອແມ່ນໍ້າເຊທີ່ໄຫລຜ່ານແຂວງຈໍາປາສັກລົງສູ່ແມ່ນໍ້າຂອງ,  ໂດຍສະເພາະແມ່ນແມ່ນໍ້າເຊໂດນ ເຮັດໃຫ້ເກີດນໍ້າຖ້ວມຢ່າງໄວວາຢູ່ 396 ບ້ານ, 42.000 ກວ່າຄອບຄົວ ແລະມີພົນລະເມືອງກວ່າ 2 ແສນຄົນ ໄດ້ຮັບຜົນກະທົບ ໃນ 1 ນະຄອນ ແລະ 9 ເມືອງຄື: ນະຄອນປາກເຊ, ເມືອງຊະນະສົມບູນ, ບາຈຽງຈະເລີນສຸກ, ຊະນະສົມບູນ, ໂພນທອງ, ປາກຊ່ອງ, ປະທຸມພອນ, ຈໍາປາສັກ, ສຸຂຸມາ, ມູນລະປະໂມກ ແລະ ເມືອງໂຂງ. ເນື້ອທີ່ການຜະລິດກະສິກໍາກໍ່ເສຍຫາຍຫລາຍສິບພັນເຮັກຕາ.

Post a Comment

0 Comments