ແຂວງຈໍາປາສັກ ມອບເງິນຊ່ວຍເຫລືອຄອບຄົວຜູ້ເສຍຊີວິດ ແລະສູນຫາຍຈາກໄພນໍ້າຖ້ວມ


ແຂວງຈໍາປາສັກໄດ້ຕົກລົງມອບເງິນນະໂຍບາຍໃຫ້ຄອບຄົວຜູ້ເສຍຊີວິດຈາກໄພນໍ້າຖ້ວມຈໍານວນ 7  ຄົນ ແລະ ສູນກາຍ 1 ຄົນ ເປັນເງິນທັງໝົດ 24 ລ້ານກີບ ເພື່ອບັນເທົາທຸກ ເຊິ່ງພິທີມອບ-ຮັບຈັດຂຶ້ນ ໃນວັນທີ 12 ທັນວາ ນີ້ ຢູ່ເມືອງໂພນທອງ ຕາງໜ້າການນຳແແຂວງມອບໂດຍ ທ່ານ ຄຳໃສ ໝື່ນຫລວງ ຫົວໜ້າພະແນກແຮງງານ ແລະ ສະຫວັດດີການສັງຄົມ,ຮອງປະທານ,ຜູ້ປະຈຳການຄະນະກຳມະການປ້ອງກັນ, ຄວບຄຸມ ແລະ ຟື້ນຟູໄພພິບັດ ແຂວງ ຈໍາປາສັກ ແລະ ຕາງໜ້າຄອບຄົວຜູ້ເສຍຊີວິດຮັບໂດຍທ່ານ ໄພສານ ອ່ອນໄຊວຽງ ປະທານກວດກາພັກ-ລັດເມືອງ, ທັງແມ່ນຍາດພີ່ນ້ອງຄອບຄົວຜູ້ເສຍຊີວິດ, ເຂົ້າຮ່ວມມີ ທ່ານ ສີສະຫວັນ ວໍລະລາດ ຮອງເຈົ້າເມືອງໂພນທອງ ແລະ ຫ້ອງການທີ່ກ່ຽວຂ້ອງ.



     ຜູ້ເສຍຊີວິດຈາກໄພນໍ້າຖ້ວມຢູ່ເມືອງໂພນທອງຈໍານວນ 3 ຄົນ, ຄົນລະ 3 ລ້ານກີບ ລວມເປັນເງິນ 9 ລ້ານກີບ ແລະ ເຄື່ອງໃຊ້ຄົວເຮືອນຈໍານວນໜື່ງ ເຊິ່ງ 3 ຄົນທີ່ເສຍຊີວິດ ແມ່ນຄອບຄົວດຽວກັນ ພໍ່ ແລະ ລູກ 2 ຄົນ ຢູ່ບ້ານໃໝ່ແສນຫລວງ ເມືອງໂພນທອງ, ແຕ່ໄປທຳມາຫາກິນຢູ່ບ້ານນໍ້າພາກເມືອງປະທຸມພອນ, ສາເຫດໃຫ້ເສຍຊີວິດເນື່ອງຈາກວ່າ: ເວລາທີ່ພວກກ່ຽວກໍາລັງພາຍເຮືອຂ້າມຫ້ວຍນໍ້າພາກຢູ່ນັ້ນ,ໄດ້ເກີດມີມວນນໍ້າມະຫາສານໄຫລລົງມາຢ່າງແຮງຊຸເອົາທັງຄົນ ແລະ ເຮືອຈົມໄປນໍານໍ້າຢ່າງກະທັນຫັນ.

        ນອກຈາກນີ້ ທ່ານ ຄໍາໃສ ໝື່ນຫລວງ ກໍໄດ້ເດີນທາງໄປມອບເງິນໃຫ້ຄອບຄົວຜູ້ເສຍຊີວິດຍ້ອນໄພນໍ້າຖ້ວມຢູ່ເມືອງປະທຸມພອນຕື່ມອີກຈໍານວນ 1 ຄົນ ເປັນເງິນ 3 ລ້ານກີບ ພ້ອມດ້ວຍເຄື່ອງຮັບໃຊ້ຄົວເຮືອນອີກຈໍານວນໜື່ງ.



       ພ້ອມນີ້ ໃນວັນທີ 13 ກັນຍາ ການນໍາແຂວງຈໍາປາສັກຍັງໄດ້ນໍາເງິນໄປມອບໃຫ້ຄອບຄົວຜູ້ທີ່ເສຍຊີວິດຢູ່ເມືອງບາຈຽງຈະເລີນສຸກຈຳນວນ 2 ຄົນ, ຜູ້ສູນຫາຍຢູ່ເມືອງ ປາກຊ່ອງ 1 ຄົນ ແລະ ເສຍຊີວິດຢູ່ເມືອງຊະນະສົມບູນ 1 ຄົນ.
        ການມອບເງິນນະໂຍບາຍໃນຄັ້ງນີ້, ແມ່ນປະຕິບັດ ຕາມການຕົກລົງຂອງເຈົົ້າແຂວງຈໍາປາສັກ ເພື່ອສະແດງເຖິງຄວາມເສົ້າສະຫລົດໃຈ, ຊ່ວຍເຫລືອບັນເທົາທຸກ ແລະ ໃຫ້ກຳລັງໃຈຄອບຄົວຜູ້ເສຍຊີວິດ ແລະ ສູນຫາຍຈາກໄພທຳມະຊາດໃຫ້ຄືນສູ່ສະພາບປົກກະຕິໂດຍໄວ.

ຂ່າວ: ເກດສະໜາ ແກ້ວສຸວັນນະແສງ

Post a Comment

0 Comments