ກອງປະຊຸມ ກອງທຶນໜຶ່ງດວງໃຈບໍລິຄຳໄຊຊ່ວຍເຫຼືອສັງຄົມ


ໃນຕອນບ່າຍຂອງວັນທີ 17 ກັນຍາ 2019 ຢູ່ຫ້ອງປະຊຸມຫ້ອງວ່າການປົກຄອງແຂວງ ໄດ້ຈັດກອງປະຊຸມສະຫຼຸບການເຄື່ອນໄຫວ ຈັດຕັ້ງປະຕິບັດວຽກງານກອງທຶນໜຶ່ງດວງໃຈບໍລິຄຳໄຊຊ່ວຍເຫຼືອສັງຄົມ 3 ເດືອນ ( 7,8,9 ) ຂຶ້ນ ໂດຍການເປັນປະທານຂອງ ທ່ານ ນາງ ແອງ ໄຊສົງຄາມ ປະທານກອງທຶນໜຶ່ງດວງໃຈບໍລິຄຳໄຊຊ່ວຍເຫຼືອສັງຄົມ ມີຊະມາຊິກກອງທຶນໜຶ່ງດວງໃຈ ພ້ອມດ້ວຍແຂກທີ່ຖືກເຊີນ ເຂົ້າຮ່ວມ.




     ໃນພິທີ ທ່ານ ນາງ ສົມໄທ ບຸຈະເລີນ ຮອງປະທານກອງທຶນໜຶ່ງດວງໃຈບໍລິຄຳໄຊຊ່ວຍເຫຼືອສັງຄົມ ໄດ້ລາຍງານວ່າ: ໃນ 3  ເດືອນຜ່ານມາກອງທຶນໄດ້ເຄື່ອນໄຫວປະກອບສ່ວນຊ່ວຍເຫຼືອສັງຄົມຢ່າງຕໍ່ເນື່ອງ ເປັນຕົ້ນແມ່ນສຳເລັດມອບຮັບ ສ້ອມແປງໂຮງໝໍຊຸມຊົນ ປາກກະດິງ ມູນຄ່າ 42.013.000 ກີບ, ປະກອບເຄື່ອງຕັດຫຍິບ ໃຫ້ສູນຮຽນຮູ້ຂອງຊຸມຊົນບ້ານບົວແວງຄຳ ເມືອງປາກຊັນ ມູນຄ່າ 24.445.000 ກີບ, ສ້ອມແປງໂຮງຮຽນອະນຸບານ ບ້ານສວນສະຫວັນ ແລະ ມອບອຸປະກອນການຮຽນ ຕັ່ງ ແລະ ເຄື່ອງຫຼິ້ນ ລວມມູນຄ່າ 88.560.000 ກີບ, ມອບເງິນຊ່ວຍເຫຼືອດ້ານອຸປະກອນໄຟຟ້າ ແລະ ພັດລົມ ປະກອບເຂົ້າໂຮງຮຽນ ມສ ໂພນສີ ເມືອງໄຊຈຳພອນ ມູນຄ່າ 17.035.000 ກີບ, ສົມທົບທຶນຊ່ວຍເຫຼືອ ບໍໍລິຈາກຜູ້ປະສົບໄພນ້ຳຖ້ວມ ແຂວງຈຳປາສັກ ມູນຄ່າ 80 ລ້ານກີບ.

   ພ້ອມດຽວກັນ ຍັງຈະໄດ້ສືບຕໍ່ຕິດຕາມບັນດາໂຄງການຊ່ວຍເຫຼືອທີ່ໄດ້ຮັບອະນຸມັດ ເປັນຕົ້ນແມ່ນການກໍ່ສ້າງໂຮງຮຽນອະນຸບາານບ້ານປາກປຶງ ເມືອງປາກຊັນ, ໂຮງຮຽນມັດທະຍົມຕົ້ນ ບ້ານນາແຈ້ງ ເມືອງໄຊຳພອນ, ສ້ອມແປງເພດານ ແລະ ຫຼັງຄາ ໂຮງຮຽນມັດທະຍົມສົມບູນບໍລິຄັນ, ໂຮງຮຽນອະນຸບານ ບ້ານສົມສະໜຸກ ເມືອງປາກກະດິງ, ສືບຕໍ່ຂະຫຍາຍ ການເຮັດທອດປາແດກແຊບ ສິນຄ້າຂອງກອງທຶນໜຶ່ງດວງໃຈບໍລິຄຳໄຊຊ່ວຍເຫຼືອສັງຄົມ ເພື່ອເປັນລາຍຮັບທີ່ໝັ້ນຄົງເຂົ້າກອງທຶນ ແລະ ສືບຕໍ່ ລົງຕິດຕາມເກັບກຳຂໍ້ມູນໃນການໃຫ້ການຊ່ວຍເຫຼືອສ້ອມແປງ ແລະ ສ້າງໃໝ່ໂຮງຮຽນ ໃນ 7 ເມືອງ.

Post a Comment

0 Comments