ການນໍາ ນະຄອນປາກເຊ ນຳພາ ອະນາໄມຫລັງໄພນ້ຳຖ້ວມ



ຂະບວນການຮ່ວມໃຈອະນາໄມຫລັງໄພນ້ຳຖ້ວມທີ່ນະຄອນ ປາກເຊ ໄດ້ຈັດຂຶ້ນໃນຕອນເຊົ້າຂອງ ວັນທີ 11 ກັນຍາ 2019 ໂດຍການເຂົ້າຮ່ວມພ້ອມທັງນໍາພາຂະບວນການດັ່ງກ່າວ ຂອງ ທ່ານ ບຸນຖອງ ດີວິໄຊ ເຈົ້າແຂວງຈຳປາສັກ, ພະແນກ ການອ້ອມຂ້າງ,ກຳລັງ ປກສ, ປກຊ ແລະ ມວນຊົນເຂົ້າ ຮ່ວມຢ່າງຫລວງຫລາຍ.



ທ່ານ ສຸລິວັນ ສະຫວັດທະສິນ ເຈົ້ານະຄອນປາກເຊ ໄດ້ກ່າວຈຸດປະສົງໃນການສ້າງຂະບວນການອະນາໄມຄັ້ງນີ້ ເພື່ອແນໃສ່ຮັກສາສະພາບແວດລ້ອມໃນຕົວເມືອງ ປາກເຊ ໃຫ້ມີຄວາມສະອາດຈົບງາມພາຍຫລັງນ້ຳຖ້ວມ ເພາະສະພາບນ້ຳຖ້ວມໃນຄັ້ງນີ້ ນອກຈາກເຮັດໃຫ້ເຮືອນຊານບ້ານຊ່ອງ,ໄຮ່ນາ, ຮົ້ວສວນ ຖືກຖ້ວມແລ້ວ ສິ່ງທີ່ຫລົງເຫລືອກໍ່ຄືສິ່ງເສດເຫລືອ, ຂີ້ເຫຍື້ອ ຕ່າງໆທີ່ມານຳກະແສນ້ຳອັນເຮັດໃຫ້ບ້ານເຮືອນມີຄວາມເປິ ເປື້ອນ ໂດຍສະເພາະແມ່ນຕົວນະຄອນປາກເຊ ເຊິ່ງຕ້ອງໄດ້ ຂຸ້ນຂ້ຽວຮ່ວມກັນອະນາໄມໃຫ້ມີຄວາມສະອາດຈົບງາມ. 



      ສໍາລັບການສ້າງຂະບວນການອະນາໄມໃນຄັ້ງນີ້ແມ່ນ ມີຈໍານວນ 10 ບ້ານໃນເທດສະບານນະຄອນປາກເຊ ທີ່ຖືກນ້ຳຖ້ວມ ໄດ້ປັດກວດຂີ້ເຫຍື້ອ, ສິ່ງເສດເຫລືອ, ພ້ອມທັງລ້າງຖະໜົນ, ຫົນທາງ ໂດຍນຳໃຊ້ລົດດັບເພີງ, ພາຫະນະຈາກພາກສ່ວນຕ່າງໆເຂົ້າຊ່ວຍ.



ຂ່າວຍັງໃຫ້ຮູ້ອີກວ່າ: ໃນ ວັນທີ 10 ກັຍາ 2019 ນີ້ ຢູ່ສະໂມສອນຫລັກ 4 ທ່ານ ອາລຸນໄຊ ສູນນະລາດ ເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ ພ້ອມດ້ວຍຄະນະ ໄດ້ນຳເອົາເຄື່ອງຊ່ວຍເຫລືອປະເພດເຄື່ອງອຸປະໂພກ-ບໍລິໂພກ ມູນຄ່າ 20 ລ້ານກວ່າກີບ ມາມອບໃຫ້ແກ່ແຂວງຈຳປາສັກ ເພື່ອນໍາໄປມອບຕໍ່ໃຫ້ແກ່ປະຊາຊົນທີ່ຖືກນໍ້າຖ້ວມ ໃຫ້ກຽດຮັບໂດຍ ທ່ານ ບຸນຖອງ ດີວິໄຊ ເຈົ້າແຂວງຈຳປາສັກ ພ້ອມດ້ວຍພະແນກການທີ່ກ່ຽວຂ້ອງ.



ທ່ານ ອາລຸນໄຊ ສູນນະລາດ ໃຫ້ສຳພາດວ່າ: ການມອບເຄື່ອງຊ່ວຍເຫຼືອໃນຄັ້ງນີ້ ເປັນການບັນເທົາທຸກແກ່ປະຊາຊົນໃຫ້ສາມາດຜ່ານຜ່າ ຄວາມຫຍຸ້ງຍາກ ແລະ ເຮັດໃຫ້ຊີວິດການເປັນຢູ່ໃຫ້ ດີຂຶ້ນ,ໂດຍໄດ້ຈາກກຳລັງແຮງປະກອບສ່ວນຂອງຊາວໜຸ່ມທຸກສະຫາຍ.




     ພາຍຫລັງພິທີມອບ -ຮັບ ເຄື່ຶອງຊ່ວຍເຫລືອ ຄະນະດັ່ງກ່າວ ໄດ້ນຳເຄື່ອງຊ່ວຍເຫລືອໄປມອບ ໃຫ້ປະຊາຊົນຜູ້ປະສົບໄພນໍ້າຖວ້ມຢູ່ບ້ານ ໂສໂລນ້ອຍ ກຸ່ມ 4 ເມືອງຊະນະສົມບູນ ອີກດ້ວຍ. 




       ບ້ານໂສໂລນ້ອຍກໍແມ່ນບ້ານໜຶ່ງທີ່ໄດ້ຮັບຜົນກະທົບຈາກໄພນໍ້າຖ້ວມໜັກສົມຄວນ ເນື່ອງຈາກເປັນບ້ານທີ່ຕັ້ງຢູ່ລຽບແຄມແມ່ນໍ້າເຊໂດນ ມີທັງໝົດ 154 ຄອບຄົວ, 150 ຫລັງຄາເຮືອນ, ປະຊາຊົນໄດ້ຮັບຜົນກະທົບຈາກນໍ້າຖ້ວມທັງໝົດ 135 ຄອບຄົວ, ເຮືອນຖືກນໍ້າຖ້ວມຊຸເປ່ເພ 10 ຫລັງ,ເສຍຫາຍໜັກ 4 ຫລັງ, ເນື້ອທີ່ນາປີ ຖືກຖ້ວມ 147 ເຮັກຕາ. ມາຮອດປັດຈຸບັນນໍ້າໄດ້ບົກລົງ, ເສັ້ນທາງເຂົ້າບ້ານສາມາດສັນຈອນໄປມາໄດ້ປົກະຕິແລ້ວ.


ນອກຈາກໄດ້ຮັບເຄື່ອງຊ່ວຍເຫລືອແລ້ວເປັນນໍ້າດື່ມ,ເຂົ້າສານອາຫານແຫ້ງ ແລ້ວ ຜູ້ປະສົບໄພ ຍັງໄດ້ຮັບການກວດພະຍາດ,ຮັບຢາ,ຮັບການສຸຂະສຶກສາຈາກຄະນະຊາວໜຸ່ມແພດ-ໝໍ ທີ່ລົງບໍລິການປະຊາຊົນຢູ່ກັບບ້ານອີກດ້ວຍ.

ຂ່າວ: ປະພິດ-ເກດສະໜາ

Post a Comment

0 Comments