ເມືອງໝື່ນ ຈູດທຳລາຍສິນຄ້າໝົດອາຍຸ ແລະ ເຄື່ອງສຳອາງຕ້ອງຫ້າມ



ວັນທີ 24 ກັນຍາ 2019 ນີ້, ຫ້ອງການສາທາລະນາສຸກເມືອງໝື່ນ ແຂວງວຽງຈັນ ນຳໂດຍທ່ານ ດຣ ຊົ່ວທ່າວ ເຍ້ຍຕູ້ ຫົວໜ້າຫ້ອງການ ສາທາລະນະສຸກເມືອງ, ພ້ອມດ້ວຍພະນັກງານວິຊາການຈາກຫ້ອງການສາທາເມືອງ ແລະ ຫ້ອງການທີ່ກ່ຽວຂ້ອງ ໄດ້ພ້ອມກັນຈັດພິທີ ຈູດທຳລາຍສິນຄ້າໝົດອາຍຸເຊື່ອມຄຸນນະພາບ ເເລະ ເຄື່ອງສຳອາງຕ້ອງຫ້າມ ປະກອບມີ: ສິນຄ້າປະເພດອາຫານມີ 17 ແລະ ເຄື່ອງສຳອາງຕ້ອງຫ້າມ ແລະ ໝົດອາຍຸ 9 ລາຍການ ລວມມູນຄ່າທັງໝົດ 1.547.800 ກີບ.




ເຄື່ອງທີ່ນຳມາທຳລາຍໃນຄັ້ງນີ້ ໄດ້ມາຈາກການລົງກວດກາບັນດາຮ້ານຂາຍສົ່ງ-ຂາຍຍ່ອຍ ພາຍໃນເມືອງໝື່ນ ໂດຍການຈັດຕັ້ງປະຕິບັດ 3 ຄັ້ງ ຈາກຈຸດສຸມທີ່ມີຮ້ານຂາຍເຄື່ອງສົ່ງ-ຂາຍເຄື່ອງຍ່ອຍ ໃນກຸ່ມບ້ານວັງ, ກຸ່ມໂນນໄຮ ແລະ ຕະຫລາດໂນນໄຮ ຜ່ານການລົງກວດທັງ 3 ຄັ້ງສາມາດກວດພົບສິ້ນຄ້າໝົດອາຍຸເຊື່ອມຄຸນນະພາບ ແລະ ເຄື່ອງສຳອາງຕ້ອງຫ້າມ ພ້ອມທັງຍຶດເຄື່ອງດັ່ງກ່າວມາຈູດທຳລາຍ. ຈາກນັ້ນ ກໍໄດ້ສຶກສາອົບຮົມກ່າວເຕືອນຫົວໜ່ວຍທຸລະກິດທີ່ກະທຳຜິດ ທີ່ລັກລອບນຳເຂົ້າສິນຄ້າຕ້ອງຫ້າມ, ຈຳໜ່າຍສິນຄ້າອຸປະໂພກບໍລິໂພກໝົດອາຍຸ ແລະ ເຊື່ອມຄຸນນະພາບ ພ້ອມທັງສ້າງບົດບັນທຶກ ກັບຫົວໜ່ວຍທຸລະກິດຜູ້ລະເມີດ ເພື່ອເປັນບ່ອນອີງ ຖ້າຍັງມີການລະເມີດຄັ້ງຕໍ່ໄປ ເຈົ້າໜ້າທີ່ຈະດຳເນີນການຕາມລະບຽບກົດໝາຍ.

ຂ່າວ: ແຫວນຄຳ

Post a Comment

0 Comments