ມອບ-ຮັບ ໂຄງການກໍ່ສ້າງປັບປຸງຕະຫຼາດຫັດຖະກຳຊົນເຜົ່າ ນະຄອນ ຫຼວງພະບາງ



     ພິທີມອບ-ຮັບໂຄງການກໍ່ສ້າງ ປັບປຸງຕະຫຼາດຫັດຖະກຳຊົນເຜົ່າ ( ຕະຫຼາດແລງເກົ່າ ) ບ້ານປ່າຂາມ ນະຄອນຫຼວງພະບາງ ໄດ້ຈັດຂຶ້ນໃນຕອນເຊົ້າ ວັນທີ 18 ກັນຍາ 2019 ນີ້ ໂດຍໃຫ້ກຽດເຂົ້າຮ່ວມທ່ານ ສຸກັນ ບຸນຍົງ ຮອງເຈົ້າແຂວງໆຫຼວງພະບາງ, ທ່ານ ສົມດີ ພອນສະຫວັດ ຮອງເຈົ້ານະຄອນຫຼວງພະບາງ, ມີຕາງໜ້າ ບໍລິສັດຜູ້ຮັບເໝົາກໍ່ສ້າງ, ມີບັນດາພະແນກການກ່ຽວຂ້ອງຂອງແຂວງ, ນະຄອນ, ອົງການຈັດຕັ້ງບ້ານເຂົ້າຮ່ວມ.



     ທ່ານ ດາວວັນ ສິລິວົງ ຮອງຫົວໜ້າຫ້ອງການບໍລິຫານຕົວເມືອງ ນະຄອນຫຼວງພະບາງ ທັງເປັນຜູ້ປະສານງານໂຄງການຂັ້ນທ້ອງຖິ່ນ ໄດ້ລາຍງານກ່ຽວກັບໂຄງການປັບປຸງຕະຫຼາດຫັດຖະກໍາຊົນເຜົ່າວ່າ: ເນື່ອງຈາກວ່າໄລຍະຜ່ານມາ ສະຖານທີ່ແຫ່ງນີ້ ຍັງບໍ່ມີຄວາມເປັນລະບຽບຮຽບຮ້ອຍ ສ້າງຄວາມບໍ່ຈົບງາມໃຫ້ແກ້ຕົວເມືອງ ສະນັ້ນ ທາງອຳນາດການປົກຄອງນະຄອນຫຼວງ ຈຶ່ງໄດ້ສົມທົບກັບອຳນາດການປົກຄອງແຂວງ ຂົນຂວຍຊອກຫາແຫຼ່ງທືນເພື່ອມາພັດທະນາ ປັບປຸງ-ຍົກລະດັບ ພື້ນທີ່ຕະຫຼາດຫັດຖະກຳຊົນເຜົ່າ ຫຼື ຕະຫຼາດແລງເກົ່າແຫ່ງນີ້ ໃຫ້ກາຍເປັນສວນທາລະນະນ້ອຍ ທີມີຄວາມສະອາດ, ເປັນລະບຽບຮຽບຮ້ອຍ, ມີສີຂຽວ-ສວຍງາມ, ເປັນບ່ອນສະແດງສິນລະປະວັນນະຄະດີ ແລະ ໂຄສະນາເຜີຍແຜ່ ດ້ານການປົກປັກຮັກສາສິ່ງແວດລ້ອມທີ່ມີຄວາມສະອາດດ້ານການທ່ອງທ່ຽວຂອງເມືອງມໍລະດົກໂລກ, ເປັນບ່ອນບໍລິການຂາຍເຄື່ອງຫັດຖະກຳທ້ອງຖິ່ນ, ອາຫານ, ເຄື່ອງດື່ມ ແລະ ກາຍເປັນບ່ອນພັກຜ່ອນຂອງປະຊາຊົນ ແລະ ນັກທ່ອງທ່ຽວ. 




ສໍາລັບໂຄງການ ປັບປຸງຕະຫຼາດຫັດ ຖະກຳຊົນເຜົ່າ ໂດຍແມ່ນນະຄອນຫຼວງພະບາງ ເປັນເຈົ້າຂອງໂຄງການ ແລະ ບໍລິສັດແສງເພັດກໍ່ສ້າງ-ສ້ອມແປງ ຈໍາກັດ ເປັນຜູ້ຮັບເໝົາກໍ່ສ້າງ ເຊິ່ງປະກອບມີ ອາຄານສຳລັບຂາຍອາຫານ 3 ຫຼັງ ມີ 14 ຫ້ອງ, ມີຮ່ອງລະບາຍນ້ຳດ້ານຫຼັງອາຄານ, ສ້ອມແປງອາຄານເກົ່າເປັນບ່ອນຂາຍເຄື່ອງຫັດຖະກຳ ຈຳນວນ 5 ຫ້ອງ, ປັບປຸງເວທີແລະ ພື້ນເດີ່ນ, ປູກຫຍ້າ ແລະ ດອກ ໄມ້ອ້ອມຮອບຕະຫຼາດ ແລະ ເທິງຫຼັງຄາ, ຕິດຕັ້ງໄຟຟ້າແສງສະຫວ່າງ ປະກອບດ້ວຍເຄື່ອງເຟີນີເຈີ ໂຕະຕັ່ງ ຈຳນວນ 52 ຊຸດ, ຕັ້ງນັ່ງ 208 ໜ່ວຍ. ລວມມູນຄ່າການກໍ່ສ້າງທັງໝົດ 41.000 ໂດລາສະຫະລັດ ເທົ່າກັບ 950 ລ້ານກີບ. ໃນນີ້ ທືນຂອງແຂວງ 600 ລ້ານກວ່າກີບ ແລະ ທືນຊ່ວຍເຫຼືອລ້າຈາກຕ່າງ ປະເທດ 349 ລ້ານກວ່າກີບ. ເຊິ່ງໃຊ້ເວລາໃນການກໍ່ສ້າງ 2 ເດືອນ ນັບແຕ່ຕົ້ນເດືອນກຸມພາ ຫາ ຕົ້ນເດືອນ ເມສາ 2019 ແມ່ນສຳເລັດ 100% ດັ່ງນັ້ນ, ຈຶ່ງຈັດພິທີມອບຄືນໃຫ້ແກ່ເຈົ້າຂອງໂຄງການເປັນຜູ້ນຳໃຊ້ ແລະ ປົກປັກຮັກສາ.



     ພ້ອມນີ້ ທ່ານຮອງເຈົ້າແຂວງຍັງໄດ້ມີຄໍາເຫັນຊີ້ນໍາ ໂດຍເນັ້ນໃຫ້ຄະນະຮັບຜິດຊອບເປັນເຈົ້າການປະສານສົມທົບກັບພາກສ່ວນທີ່ກ່ຽວຂ້ອງ ເພື່ອສືບຕໍ່ເປັນເຈົ້າການປົກປັກຮັກສາສະຖານທີ່ແຫ່ງນີ້ ໃຫ້ມີຄວາມຈົບງາມ, ເປັນລະບຽບຮຽບຮ້ອຍ ນຳໃຊ້ໄດ້ຢ່າງຍາວນານ ແລະ ສາມາດເຮັດໃຫ້ສະຖານທີ່ແຫ່ງນີ້ ກາຍເປັນຈຸດໃຈກາງໃນການດຶງດູດເອົານັກທ່ອງທ່ຽວໃຫ້ເຂົ້າມາທ່ຽວຊົມແຂວງຫຼວງພະບາງ ນັບມື້ໃຫ້ຫຼາຍຂຶ້ນ. ຈາກນັ້ນ ທ່ານ ສົມໃຈ ແສງເພັດ ຫົວໜ້າ ບໍລິສັດ ແສງເພັດກໍ່ສ້າງ-ສ້ອມແປງ ຈໍາກັດ ກໍ່ໄດ້ມອບກະແຈໃຫ້ແກ່ນະຄອນຫຼວງພະບາງຕາງໜ້າຮັບແມ່ນ ທ່ານ ສົມດີ ພອນສະຫວັດ ຮອງເຈົ້າຄອງນະຄອນ ຫຼວງພະບາງ ເພື່ອປົກປັກຮັກສາ ແລະ ນຳໃຊ້ຕໍ່ໄປ ໃຫ້ເກີດຜົນປະໂຫຍດສູງສຸດ.

Post a Comment

0 Comments